قاتىسۋشىلاردىڭ باستى نازارى 2026 جىلدىڭ 1 قاڭتارىنان باستاپ كۇشىنە ەنەتىن جاڭا سالىق كودەكسىنە اۋدارىلدى.
ساراپشىلار جاڭارتىلعان قۇجات سالىقتاردى اكىمشىلەندىرۋگە دەگەن ءتاسىلدى وزگەرتىپ قانا قويماي, سونىمەن قاتار ەلدەگى بيزنەستىڭ دامۋىنا جاڭا سەرپىن بەرۋگە ارنالعانىن اتاپ ءوتتى. العاش رەت سالىق ساياساتى ورتالىعىنا باقىلاۋ جانە جازالاۋ شارالارى ەمەس, سالىق تولەۋشىلەردى قولداۋ جانە سۇيەمەلدەۋ ەنگىزىلەدى. كونفەرەنتسياعا قاتىسۋشىلاردىڭ پىكىرىنشە, مۇنداي ءتاسىل مەملەكەت پەن بيزنەس اراسىنداعى, اسىرەسە ەلىمىزدىڭ قارقىندى دامىپ كەلە جاتقان ەكونوميكالىق ورتالىعى – الماتىداعى سەنىمدى نىعايتۋعا باعىتتالعان ماڭىزدى قادام بولماق.
قازاقستانداعى گەرمان ەكونوميكاسى وداعىنىڭ (VDW) توراعاسى, Siemens Kazakhstan جشس باس ديرەكتورى دياس اسانوۆ ەكونوميكانى دامىتۋ جانە مەملەكەت پەن بيزنەس اراسىنداعى سەنىمدى نىعايتۋ ءۇشىن جاڭا سالىق ساياساتىنىڭ ماڭىزدىلىعىن اتاپ ءوتتى.
«سالىق كودەكسى – بيۋدجەتتى تولىقتىرۋ عانا ەمەس, بيزنەس پەن قوعامنىڭ مەملەكەتكە دەگەن سەنىمىنىڭ ماڭىزدى ينديكاتورى. كونفەرەنتسيا – جاي عانا ساراپشىلىق پىكىرتالاس ەمەس, تاجىريبە الماسۋ ءۇشىن پراكتيكالىق الاڭ بولىپ سانالادى. بۇگىندە بىزدە تاجىريبەلىك كەڭەستەر مەن ساراپشىلاردىڭ تاجىريبەسىن تىڭداۋعا, سونداي-اق وزگەرىپ جاتقان ىسكەرلىك كليماتقا بەيىمدەلۋدىڭ ىقتيمال جولدارىن تالقىلاۋعا مۇمكىندىك بار. بۇل جەتىلگەن جانە جاۋاپتى سالىق مادەنيەتىن قالىپتاستىرۋعا باعىتتالعان ماڭىزدى قادام», دەدى ول.
قازاقستانداعى گەرمان ەكونوميكاسى وداعىنىڭ (VDW) باقىلاۋ كەڭەسىنىڭ مۇشەسى, ورتالىق ازياداعى گەرمان ەكونوميكاسى وكىلدىگىنىڭ باسشىسى ەدۋارد كينسبرۋنەردىڭ ايتۋىنشا, نەمىس بيزنەسى قازاقستاندا بەلسەندى جۇمىس ىستەيدى.
ء«بىز تاۋارلار مەن قىزمەتتەردى ساتامىز, ينۆەستيتسيالايمىز, بىراق مۇنى كونسالتينگتىك كومپانيالاردىڭ كاسىبي قولداۋىنسىز ءتيىمدى جاساۋ مۇمكىن ەمەس», دەيدى ول.
«SCHNEIDER GROUP» جشس سالىق جونىندەگى ديرەكتورى ماريا نازاروۆانىڭ ايتۋىنشا, رەفورما اشىقتىقتى ارتتىرۋعا, راسىمدەردى جەڭىلدەتۋگە جانە مەملەكەت پەن بيزنەس اراسىنداعى سەرىكتەستىك قاتىناستاردى نىعايتۋعا باعىتتالعان.
«جاڭا سالىق كودەكسىندە ودان ءارى پىسىقتاۋدى جانە ناقتىلاۋدى تالاپ ەتەتىن تۇستار بار. سالىق تولەۋشىلەرمەن جۇمىس ىستەيتىن قاۋىمداستىقتار قۇجاتتى اكىمشىلەندىرۋ تۇرعىسىنان عانا ەمەس, بيزنەس ءۇشىن بارىنشا قولايلى ەتۋ ءۇشىن مەملەكەتتىك ورگاندارمەن بەلسەندى ءوزارا ءىس-قيمىل جاسايدى», دەدى ماريا نازاروۆا.
ساراپشىلار شەتەلدىك كومپانيالاردىڭ قىزمەتىن رەتتەۋگە قاتىستى وزگەرىستەردى, سونىڭ ىشىندە تولەم كوزىنەن سالىقتى ۇستاپ قالۋ ءتارتىبىن, تۇراقتى مەكەمەنى ايقىنداۋدىڭ جاڭا تاسىلدەرىن, سونداي-اق حالىقارالىق سالىق سالۋ جانە قوسارلانعان سالىق سالۋدى بولدىرماۋ تۋرالى كەلىسىمدەردى قولدانۋ ماسەلەلەرىن ەگجەي-تەگجەيلى قاراستىردى. ترانسفەرتتىك باعا بەلگىلەۋ, تسيفرلىق قىزمەتتەردەن تۇسەتىن تابىستارعا سالىق سالۋ جانە رەزيدەنت ەمەستەردىڭ سالىق ەسەپتىلىگىنە قويىلاتىن تالاپتاردى كۇشەيتۋ اسپەكتىلەرىنە ەرەكشە نازار اۋدارىلدى.
