سۋرەت: apps.apple.com
«Aleem» – اعىلشىن ءتىلىن ۇيرەنۋدى جەڭىل ءارى قىزىقتى ەتۋدى ماقسات ەتكەن تولىقتاي تەگىن ءموبيلدى قوسىمشا. قوسىمشاسىنىڭ اۆتورلارى – اليدار كۇشىكوۆ پەن اسىلجان التاي. ولار ءوز ءونىمىن بار بولعانى ەكى كۇن بۇرىن «App Store»-عا جۇكتەگەن.
ء«بىزدىڭ ماقسات – اعىلشىن ءتىلىن ۇيرەنۋدى جەڭىل ءارى ءتيىمدى ەتۋ. وسى ويمەن «Aleem» قوسىمشاسىن جاسادىق. بۇل باعدارلاما ارقىلى اركىم ءوز قىزىعۋشىلىعىنا ساي ساباقتاردى تاڭداپ, سويلەۋدى, جازۋدى دامىتا الادى. ەڭ كەرەمەتى – پايدالانۋشىلارعا بارلىعى تەگىن. پرەزيدەنتتىڭ قولداۋى بىزگە ۇلكەن دەم بەردى. ىسكە قوسىلعانىنا ەكى-اق كۇن وتسە دە, «Aleem» «App Store»-دىڭ ۇزدىك بەس قوسىمشاسى قاتارىنا ەندى. وتانداستارىمىزعا اعىلشىن ءتىلىن ۇيرەنۋدىڭ قاراپايىم, قىزىقتى ءارى زاماناۋي جولىن ۇسىنعىمىز كەلەدى», دەيدى جوبا اۆتورى اسىلجان التاي.
بۇگىندە «Aleem» ەلىمىزدە عانا ەمەس, كورشىلەس مەملەكەتتەردە دە كەڭىنەن تانىلىپ جاتىر. قوسىمشا قىرعىزستاندا ءبىرىنشى, تاجىكستاندا ەكىنشى, تۇرىكمەنستاندا التىنشى, وزبەكستاندا ون ءبىرىنشى, ال رەسەيدە ون ەكىنشى ورىندا تۇر.
جاساندى ينتەللەكت نەگىزىندە جاسالعان باعدارلاما قولدانۋشىنىڭ قىزىعۋشىلىعىنا قاراي جەكە ساباقتار ۇسىنادى جانە سويلەۋ ماشىعىن جەتىلدىرۋگە باسىمدىق بەرەدى. جوبا اۆتورلارىنىڭ ايتۋىنشا, ەندىگى ماقسات الەمدىك رەيتينگتە كوش باستاۋ. «بۇل – تەك باستاماسى. ءبىز قازاق جاستارىنىڭ دا الەمدىك دەڭگەيدە ءونىم جاساي الاتىنىن دالەلدەگىمىز كەلەدى», دەيدى اۆتور.
