قوس جۇلدەنىڭ ءبىرىنشىسى «Grand challenge award» دەپ اتالادى. بۇل – روبوتتاردىڭ بىلىكتىلىك ويىندارىندا رەكورد ورناتقان ءابسوليۋتتى چەمپيوندارعا بەرىلەتىن ءتۋرنيردىڭ باس جۇلدەسى. ال «Albert einstein award» اتاعى ۇزدىك ينجەنەرلىك ازىرلەمەسى بار, تەحنيكالىق شەبەرلىگى جوعارى كوماندالارعا بەرىلەدى.
بۇعان دەيىن ۇلتتىق قۇراما جەنەۆا-2022, سينگاپۋر-2023, گرەكيا-2024 جارىستارىندا دا ۇزدىك اتانىپ, حالىقارالىق STEM باعىتىندا الەمدىك كوشباسشى مارتەبەسىن يەلەنگەن. جاساندى ينتەللەكتىنىڭ قارقىنى كۇشەيىپ, تسيفرلىق تەحنولوگيالار كۇندەلىكتى ومىرىمىزگە دەندەپ ەنىپ جاتقان ۋاقىتتا روبوت قۇراستىرىپ, باعدارلامالاۋ ءتىلىن ەرتە جاستان مەڭگەرۋ زامان تالابىنا اينالعانى جاسىرىن ەمەس.
«دارا دارىندارىمىز ەكى بىردەي التىن ماراپاتتى قانجىعاسىنا بايلاپ, ءابسوليۋتتى چەمپيون اتاندى. ءتورت دۇركىن جەڭىمپاز اتانۋ ۇلكەن جەتىستىك. بۇل رەتتە, كوماندانىڭ قۇرامى بىردە-ءبىر رەت قايتالانباعانىن اتاپ وتكەن ءجون. جىل سايىن ەل نامىسىن قورعاۋعا جاڭا قاتىسۋشىلاردى دايىندايمىز», دەدى «USTEM Foundation» قوعامدىق قورىنىڭ جەتەكشىسى اسىلبەك مىرزاحمەتوۆ.
ەلىمىزدىڭ قۇراماسىن NIS الماتى-مەدەۋ مەكتەبىنىڭ 9–10 سىنىپ وقۋشىلارى راشات دوسىمجان, داۋلەت ءىلياس, ءاليحان ورىنباساروۆ, ماديار اسەت ۇلى جانە نۇراسىل تۇرسىنباەۆ تانىستىردى. ولاردىڭ جاتتىقتىرۋشىلارى – نۇرداۋلەت دوسماعامبەت, اسىلبەك مىرزاحمەتوۆ جانە دۋلات بايتۇلەنوۆ.
بيىلعى جارىستىڭ «Eco-Equilibrium» تاقىرىبى جاھاندىق ەكولوگيالىق پروبلەمالاردى شەشۋگە جانە بيوارتۇرلىلىكتى ساقتاۋعا ارنالعان ەدى. ۇلتتىق قۇراما روبوتتى ازىرلەۋ ارقىلى ەكوجۇيەلەردى قالپىنا كەلتىرۋگە باسىمدىق بەرىپ, ەرەكشە كوزگە ءتۇستى. ولاردىڭ روبوتى ويىن الاڭىنداعى كەدەرگىلەردى الىپ تاستاپ, بيوارتۇرلىلىك بىرلىكتەرىن ەكوجۇيەلەرگە ءدال ورنالاستىراتىن كۇردەلى تاپسىرمانى ءساتتى ورىنداپ شىقتى.
ايتا كەتەيىك, ۇلتتىق قۇرامانى وقۋ-اعارتۋ مينيسترلىگىنىڭ «دارىن» رەسپۋبليكالىق عىلىمي-پراكتيكالىق ورتالىعى, «USTEM Foundation» قوعامدىق قورى, Alem.AI حالىقارالىق جاساندى ينتەللەكت ورتالىعى, سونداي-اق وتاندىق «Cannect.AI» ستارتابى قولدادى.
