باستاماعا سايكەس جوبا كەزەڭ-كەزەڭىمەن جۇزەگە اسىرىلادى. ونىڭ اياسىندا قازاقستاننىڭ تاۋەلسىز جي-حابى قۇرىلادى. ونى Freedom Holding Corp. باسقارىپ, NVIDIA-نىڭ وزىق ەسەپتەۋىش تەحنولوگيالارىمەن جابدىقتالادى. مينيسترلىك ءوز تاراپىنان اۋقىمدى AI-ينفراقۇرىلىمدى ورنالاستىرۋ مەن پايدالانۋعا قولايلى جاعداي جاسايدى, سونداي-اق ينجەنەرلەر مەن عالىمداردى دايارلاۋعا ارنالعان جي اكادەمياسى مەن عىلىمي-زەرتتەۋ زەرتحاناسىن قۇرۋ سىندى باستامالاردى قولدايدى.
جوباعا 2 ميلليارد دوللار ينۆەستيتسيا تارتۋ جوسپارلانىپ وتىر. ول قۋاتتىلىعى 100 مۆت بولاتىن قولجەتىمدى ەنەرگيامەن قازاقستان اۋماعىندا جۇزەگە اسىرىلادى. Freedom Holding Corp. جوبانىڭ نەگىزگى ينۆەستورى جانە وپەراتورى بولۋدى جوسپارلاپ وتىر.
سەرىكتەستىك قازاقستان مەن ورتالىق ازيانىڭ قارقىندى دامىپ كەلە جاتقان تسيفرلىق ەكونوميكاسى ءۇشىن قاجەتتى جي-ەكوجۇيەسىن دامىتۋعا, يننوۆاتسيالاردى ىلگەرىلەتۋگە جانە كادرلاردى دايارلاۋعا دەگەن ورتاق ۇمتىلىسىن كورسەتەدى.
«NVIDIA كومپانياسىمەن ىنتىماقتاستىق - قازاقستاننىڭ جاساندى ينتەللەكت سالاسىنداعى ۇلتتىق ستراتەگياسىن جۇزەگە اسىرۋداعى ماڭىزدى قادام. ءبىز تاۋەلسىز AI-ەكوجۇيەسىنىڭ ىرگەتاسىن قالىپتاستىرىپ جاتىرمىز. بۇل ەكونوميكامىزدى نىعايتىپ, باسەكەگە قابىلەتتىلىكتى ارتتىرادى, بۇكىل ءوڭىر ءۇشىن جاڭا مۇمكىندىكتەردى اشادى», - دەدى قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى, جاساندى ينتەللەكت جانە تسيفرلىق دامۋ ءمينيسترى جاسلان ماديەۆ.
«قازاقستاننىڭ الەمدىك جاساندى ينتەللەكت نارىعىنداعى پوزيتسياسىن نىعايتۋعا باعىتتالعان وسى اۋقىمدى باستامانىڭ ءبىر بولىگى بولعانىمىزعا قۋانىشتىمىز. ءبىزدىڭ تاجىريبەمىزدى NVIDIA-نىڭ وزىق تەحنولوگيالارىمەن جانە مينيسترلىكتىڭ ستراتەگيالىق كوزقاراسىمەن بىرىكتىرە وتىرىپ, جاساندى ينتەللەكت سالاسىنداعى يننوۆاتسيالاردىڭ دامۋى مەن سالانى ورتالىق ازيا وڭىرىندە دامىتۋعا اتسالىسامىز», - دەپ مالىمدەدى Freedom Holding Corp. كومپانياسىنىڭ باس اتقارۋشى ديرەكتورى تيمۋر تۋرلوۆ.
