قونىس اۋدارۋشىلاردىڭ باسىم بولىگى وزبەكستاننان (143 وتباسى) كەلگەن. سونداي-اق رەسەيدەن – 17, تۇرىكمەنستاننان – 3, قىتايدان – 9, جانە موڭعوليادان – 1 وتباسى كەلگەن. ولاردىڭ ىشىندە 158 وتباسى اتىراۋ قالاسىندا, جەتى وتباسى جىلىوي اۋدانىندا, التاۋى قۇرمانعازى اۋدانىندا, ال ءبىر-ءبىر وتباسىنان ماقات جانە يساتاي اۋداندارىندا قونىستاندى.
اتىراۋ وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ەركەبۇلان ابىلقاسىموۆتىڭ ايتۋىنشا, 2025 جىلعا ارنالعان وڭىرلىك كۆوتا بويىنشا قانداستاردى قابىلداۋعا 103 ورىن بولىنگەن.
«قاراشا ايىندا وتكەن كوميسسيا شەشىمىمەن 64 وتباسى, ياعني 103 ادام كۆوتاعا ەنگىزىلدى جانە ءتيىستى الەۋمەتتىك قولداۋ شارالارىمەن قامتىلدى. بۇل كۆوتا اياسىندا 62 وتباسى (100 ادام) قونىس اۋدارۋعا ارنالعان 70 اەك كولەمىندەگى الەۋمەتتىك تولەم – 27,5 ملن تەڭگە الدى», دەدى ول.
سونىمەن قاتار, 23 وتباسىعا تۇرعىن ءۇيدى جالعا الۋ جانە كوممۋنالدىق قىزمەتتەردى تولەۋ ءۇشىن 6,4 ملن تەڭگە كولەمىندە كومەك كورسەتىلدى. بەس وتباسىعا جالپى سوماسى 22,7 ملن تەڭگەگە ەكونوميكالىق موبيلدىك سەرتيفيكاتتار تابىستالدى. قوسىمشا 21 ادامنىڭ «قانداس» مارتەبەسىنىڭ مەرزىمى التى ايعا ۇزارتىلدى.
