فوتو: جاساندى ينتەللەكت جانە تسيفرلىق دامۋ مينيسترلىگى
كەلىسىم اياسىندا ەلىمىزدەگى پەداگوگتەرگە ChatGPT-ءدىڭ ءبىلىم بەرۋ ۇيىمدارىنا ارنالعان نۇسقاسى – ChatGPT Edu پلاتفورماسىن قولدانۋ مۇمكىندىگى بەرىلەدى.
«پلاتفورما ءبىلىم بەرۋ سالاسىندا OpenAI-دىڭ زاماناۋي مودەلدەرىنە قولجەتىمدىلىكتى قامتاماسىز ەتەدى. سونىمەن قاتار, جۇيە دەرەكتەر قاۋىپسىزدىگى مەن قۇپيالىلىعىن جانە اكىمشىلىك باسقارۋدى جوعارى دەڭگەيدە قورعايدى. ChatGPT Edu قىزمەتىندە دەرەكتەردى تالداۋ, قۇجاتتاردى قىسقاشا مازمۇنداۋ جانە جەكە GPT-اسسيستەنتتەرىن قۇرۋ فۋنكتسيالارى بار. ناتيجەسىندە مۇعالىمدەردىڭ ۋاقىتى ۇنەمدەلىپ, اكىمشىلىك جانە تەحنيكالىق جۇمىستارى جەڭىلدەيدى», دەلىنگەن حابارلامادا.
مەموراندۋمعا سايكەس, پەداگوگتەرگە 3 جىلدا جىل سايىن كەمىندە 165 000 OpenAI ليتسەنزياسىن بەرۋ جوسپارلانىپ وتىر.
«بۇكىل الەمدەگى ۇستازدار اكىمشىلىك جۇكتەمەنى ازايتىپ, ۋاقىتىن وقىتۋ مەن وقۋشىلاردىڭ دامۋىنا ارناۋى ءۇشىن جاساندى ينتەللەكتىنى قولدانىپ كەلەدى. ءتيىستى قولداۋ كورسەتىلسە, مۇعالىمدەر مەن وقىتۋشىلار بۇل قۇرالداردى ءتيىمدى يگەرىپ, ءبىلىم بەرۋ ۇدەرىسىندە جاساندى ينتەللەكت مۇمكىندىكتەرىن بارىنشا پايدالانا الادى. قازاقستان ۇكىمەتىمەن جاسالعان كەلىسىم جەرگىلىكتى پەداگوگتەرگە ChatGPT-ءنى قولدانۋعا جانە جي-ءدىڭ ارتىقشىلىقتارىن ءبىلىم بەرۋ جۇيەسىنە ەنگىزۋگە جاعداي جاسايدى», دەيدى, OpenAI ءبىلىم بەرۋ جانە مەملەكەتتىك باعدارلامالار GTM باعىتى بويىنشا جەتەكشىسى كەۆين ميللس.
اتالعان باستاما قازاقستاننىڭ تسيفرلىق ترانسفورماتسيا جانە ادامي كاپيتالدى دامىتۋ جونىندەگى ۇلتتىق ستراتەگياسىن قولداي وتىرىپ, پەداگوگتەرگە وزىق حالىقارالىق تەحنولوگيالارعا قول جەتكىزۋگە جول اشادى. كەلىسىمدى ىسكە اسىرۋ يننوۆاتسيالىق ويلاۋ, سىني تالداۋ جانە كرەاتيۆتىلىك داعدىلارىن دامىتۋعا, سونداي-اق پەداگوگتەردىڭ تسيفرلىق قۇزىرەتتەرىن نىعايتۋعا ىقپال ەتەدى.
