فوتو: el.kz
ادەتتە ارتەريا تارىلعان كەزدە ەمدەۋ ءۇشىن باللون قولدانىلادى دا, ول زاقىمدانعان تامىر بولىگىنە ەنگىزىلىپ, 10-14 اتموسفەرالىق قىسىممەن ۇرلە ۋارقىلى تامىردى كەڭەيتىپ, قاننىڭ ءجۇرۋىن قالپىنا كەلتىرەتىن ستەنت ورناتۋعا مۇمكىندىك بەرەدى.
«الايدا ايقىن كالتسينوز كەزىندە جاعداي الدەقايدا كۇردەلى. كالتسيلەنگەن تۇيىنشەكتىڭ تىعىزدىعى سونداي, ونى 20 اتموسفەراعا دەيىنگى قىسىمدا دا كەڭەيتۋ مۇمكىن ەمەس, وسىلايشا باللون تولىق اشىلماي قالادى. مۇنداي جاعدايدا قىسىمدى 30 اتموسفەرا نە ودان جوعارى دەڭگەيگە دەيىن ارتتىرسا, ارتەريا جارىلىپ كەتەتىندىكتەن, بۇل پروتسەدۋرا وتە قاۋىپتى», دەيدى ينتەرۆەنتسيالىق كارديولوگيا بولىمشەسىنىڭ مەڭگەرۋشىسى ورازبەك ساحوۆ.
مەديتسيناداعى مۇنداي ماسەلەنى جاڭا تەحنولوگيا – ۋلترادىبىستىق ليتوتريپسيا قولدانۋ ارقىلى شەشۋگە بولادى. پروتسەدۋرا كەزىندە زاقىمدانعان ايماققا ارنايى باللون ەنگىزىلەدى. باللون ۇرلەنگەن كەزدە ونىڭ ىشىندە ۋلترادىبىستىق يمپۋلس ءتۇزىلىپ, ول كالتسيلەنگەن تۇيىنشەكتى بۇزادى. تولقىن كالتسيگە باعىتتالعان اسەر ەتەدى دە, ونىڭ قۇرىلىمىن بۇزادى, ال تامىر قابىرعاسىنىڭ جۇمساق تىنىنە زاقىم كەلتىرمەيدى.
مۇنداي وڭدەۋدەن كەيىن باللون قايتا ۇرلەنىپ, تامىر وڭاي كەڭەيەدى, ستەنت ورناتۋ قاۋىپسىز ءارى ءتيىمدى اتقارىلادى. ۋلترادىبىستىق ليتوتريپسيا ارتەريانىڭ جارىلۋ قاۋپىنسىز, جۇمساق اسەر ەتۋدى قامتاماسىز ەتەتىندىكتەن, كالتسيلەنگەن ءتۇيىندى ۇگىتىپ, كۇردەلى كالتسينوز كەزىندە دە ستەنتتى ءساتتى ورناتۋعا مۇمكىندىك بەرەدى ءارى قان اينالىمىن تەز قالپىنا كەلتىرەدى.
ء«بىزدىڭ ورتالىقتا ۋلترادىبىستىق ليتوتريپسيا ادىسىمەن ءۇش ءساتتى وتا وتكىزىلدى. بارلىق جاعدايدا ارتەريا تولىق اشىلىپ, ستەنت ەش قيىندىقسىز ورناتىلدى. پاتسيەنتتەردىڭ جاعدايى قاناعاتتانارلىق, قان اينالىمى قالپىنا كەلدى, اۋىرسىنۋ بەلگىلەرى جويىلدى», دەيدى ورازبەك ساحوۆ.
