القالى جيىنعا وقۋ اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا, ماجىلىستەگى الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ, بالا قۇقىقتارى جونىندەگى ۋاكىل دينارا زاكيەۆا, يسلام دامۋ بانكىنىڭ, حالىقارالىق جانە ۇكىمەتتىك ەمەس ۇيىمداردىڭ وكىلدەرى قاتىستى.
«قازاقستاندا تالىمگەرلىك ينستيتۋتىنىڭ دامۋىنا مەملەكەتتىڭ, ۇكىمەتتىك ەمەس ۇيىمداردىڭ جانە بەلسەندى ازاماتتاردىڭ كۇش-جىگەرىن بىرىكتىرۋ ناتيجەسىندە قول جەتكىزىپ وتىرمىز. تالىمگەرلىك ينستيتۋتىن بەكىتۋ ءۇشىن اۋقىمدى جۇمىس اتقارىلدى: بالا قۇقىقتارى تۋرالى زاڭعا وزگەرىستەر ەنگىزىلدى, بىرنەشە نورماتيۆتىك-قۇقىقتىق اكتىلەر قابىلداندى. بۇل ءىس-شارا – جاي عانا وقيعا ەمەس, تالىمگەرلىك ينستيتۋتىنىڭ جاڭا دەڭگەيگە كوتەرىلىپ, تانىلۋىنىڭ ايعاعى», دەدى مينيسترلىك وكىلى ن.وسپانوۆا.
بالالار ۇيلەرىنىڭ تاربيەلەنۋشىلەرىن الەۋمەتتەندىرۋدىڭ ءتيىمدى قۇرالى رەتىندە تالىمگەرلىكتى دامىتۋ مەن قولداۋدى تالقىلاۋعا ارنالعان ءىس-شارا «دارا» قايىرىمدىلىق قورىنىڭ «تالىمگەرلەر» باعدارلاماسىنىڭ 10 جىلدىعىنا ورايلاستىرىلدى. وسى رەتتە تۇسىندىرە كەتەيىك, تالىمگەر – بالالار ۇيىندەگى جاسوسپىرىممەن تاجىريبە بولىسەتىن, وعان ەرەسەك ءومىر ءسۇرۋ داعدىلارىن يگەرۋگە كومەكتەسەتىن, قيىن ساتتەردە قولداۋ كورسەتەتىن جانە بولاشاقتى تاڭداۋدا كومەكتەسەتىن ەرەسەك ادام. تالىمگەر بولۋ ءۇشىن قازاقستان ازاماتى ارنايى وقۋدان ءوتىپ, بەلگىلى ءبىر تالاپتارعا ساي بولۋى كەرەك. ال «دارا» قورى 2015 جىلدان بەرى جۇزەگە اسىرىپ كەلە جاتقان «تالىمگەرلەر» باعدارلاماسى بالالار ءۇيىنىڭ تاربيەلەنۋشىلەرىن تالىمگەرلەرىمەن قاۋىشتىرىپ, سول ارقىلى بالالاردى قولداۋ مەن الەۋمەتتەندىرۋدى كوزدەيدى.
بۇگىندە باعدارلاما قازاقستاننىڭ 18 قالاسىندا جۇمىس ىستەپ, 360-تان اسا جاسوسپىرىمگە دەربەس ومىرگە قادام باسۋعا كومەكتەستى. باعدارلامانىڭ اۋقىمى جىل سايىن كەڭەيىپ, قاتىسۋشىلار سانى ارتىپ كەلەدى.
«تالىمگەرلەر» باعدارلاماسى – ايقىن ادىستەمە مەن كاسىبي كوماندا. ءبىز كوپ جەتىستىككە جەتتىك, بىراق توقتاپ قالمايمىز, ويتكەنى ءاربىر مۇقتاج ءجاسوسپىرىمنىڭ ءوز تالىمگەرى بولۋى كەرەك ەكەنىنە سەنىمدىمىز», دەيدى «دارا» قايىرىمدىلىق قورىنىڭ نەگىزىن قالاۋشى گۇلنار دوساەۆا.
باعدارلاما العاشقى بولىپ استانا, الماتى جانە قاراعاندى قالالارىندا ىسكە قوسىلدى. سول كەزدە قاراعاندى وبلىسى ءبىلىم باسقارماسىنىڭ باسشىسى بولعان اسحات ايماعامبەتوۆ ۇزاق جىلعى جۇمىستىڭ ناتيجەلەرى مەن تالىمگەرلىكتى زاڭنامالىق دەڭگەيدە بەكىتۋ ماڭىزدىلىعى تۋرالى ايتىپ ءوتتى.
«ون جىل ىشىندە ءبىز تالىمگەرلىك جوباسىنىڭ تۇراقتى, ءتيىمدى جانە شىن مانىندە قاجەتتى ەكەنىنە كوز جەتكىزدىك. بۇل جوبانى زاڭ دەڭگەيىندە نەگە بەكىتۋ قاجەت؟ ەڭ الدىمەن بارلىق مۇددەلى تاراپتىڭ جاۋاپكەرشىلىگى مەن قۇقىقتارىن بەكىتۋگە كەرەك. «تالىمگەرلەر» باعدارلاماسىنىڭ تاجىريبەسى بارلىق نەگىزگى اسپەكتىنى ەسكەرۋگە مۇمكىندىك بەردى: كىم تالىمگەر بولا الادى, ونىڭ قۇقىقتارى مەن مىندەتتەرى قانداي, تالىمگەرلەر مەكتەبى قالاي جۇمىس ىستەيدى, سەرتيفيكاتتاۋ ماسەلەلەرى جانە بارلىق تاراپتىڭ, سونىڭ ىشىندە مەملەكەتتىك ورگانداردىڭ جاۋاپكەرشىلىگى. باعدارلامانىڭ كوپجىلدىق تاجىريبەسى زاڭنامالىق تۇردە قانداي نورمالاردى بەكىتۋ ماڭىزدى ەكەنىن كورسەتتى», دەدى اسحات ايماعامبەتوۆ.
فورۋمدا سونداي-اق تالىمگەرلەر مەن ولاردىڭ ءتالىم الۋشىلارى ءسوز سويلەپ, ءوز دوستىقتارى تۋرالى اڭگىمەلەدى: بالانىڭ سەنىمىن قالاي جاۋلاپ العانى, ونىڭ الەۋەتىن قالاي اشقانى, وزىنە سەنۋگە كومەكتەسكەنى تۋرالى, سونداي-اق ءتالىم الۋشىلاردىڭ ەرەسەك ومىرىندەگى ناقتى جەتىستىكتەرىن ايتىپ بەردى.
