ناۋقاس – 54 جاستا. دياگنوزى: MELD – 26 بالل, باۋىر تسيرروزى.
«ناۋقاس بىرنەشە جىل بويى گاستروەنتەرولوگتىڭ ديسپانسەرلىك باقىلاۋىندا بولعان. ۇزاق ۋاقىت ەم قابىلداعانىنا قاراماستان, جاعدايى ناشارلاپ, باۋىر ترانسپلانتاتسياسى ءومىرىن ساقتاپ قالۋدىڭ جالعىز جولى بولدى», - دەپ جازدى پورتال.
دونور – ناۋقاستىڭ 24 جاستاعى ۇلى. ول ءوز ەركىمەن دونور بولۋعا كەلىسىم بەرىپ, تولىق مەديتسينالىق تەكسەرۋدەن وتكەن. ابسوليۋتتىك قارسى كورسەتىلىمدەر انىقتالعان جوق.
وپەراتسيانى ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعى مەن تۇركىستان وبلىستىق كلينيكالىق اۋرۋحاناسىنىڭ ماماندارىنان قۇرالعان بىرلەسكەن كوماندا وتكىزدى.
قازىرگى تاڭدا ناۋقاس دارىگەرلەردىڭ ديناميكالىق باقىلاۋىندا. وپەراتسيادان كەيىنگى كەزەڭ اسقىنۋسىز ءوتىپ جاتىر, ترانسپلانتاتسيالانعان باۋىردىڭ قىزمەتى بىرتىندەپ تۇراقتانۋدا.
بۇل – تۇركىستان وبلىسىندا جاسالعان ەكىنشى باۋىر ترانسپلانتاتسياسى. اتالعان ماڭىزدى وقيعا وڭىردەگى ترانسپلانتولوگيانىڭ دامۋىنا جاڭا سەرپىن بەردى.
