دەپۋتات مەملەكەت باسشىسى قاسىم-جومارت توقاەۆ قازاقستاننىڭ حالىق جازۋشىسى تولەن ابدىكتىڭ «Egemen Qazaqstan» گازەتىندە جاريالانعان سۇحباتىنا جوعارى باعا بەرگەنىن, پرەزيدەنت بۇل قادامىمەن قالامگەرلەردىڭ قوعام الدىنداعى ميسسياسىنا قۇرمەت كورسەتىپ, مەملەكەتتىڭ رۋحاني ساياساتىندا ادەبيەتتىڭ وزىندىك ورنى بار ەكەنىن بايقاتىپ وتىرعانىن تىلگە تيەك ەتتى.
«مەملەكەت باسشىسىنىڭ جازۋشىعا جەدەلحات جولداپ, قازاق ادەبيەتىنىڭ بولاشاعىنا الاڭداۋى مەملەكەت پەن ادەبيەت اراسىنداعى جاڭا رۋحاني بايلانىستىڭ باستالعانىن اڭعارتادى. ۇكىمەت بۇل ۇنقاتىسۋدى داستۇرگە اينالدىرىپ, ادەبيەتتى ۇلتتىق سانا مەن رۋحتى جاڭارتۋدىڭ نەگىزگى تەتىگى رەتىندە دامىتىپ, قازاق ادەبيەتىندە جاڭا زامان كەيىپكەرىن قالىپتاستىرۋدى رۋحاني ستراتەگيالىق ساياساتتىڭ باسىم باعىتىنا اينالدىرۋى كەرەك», دەدى قازىبەك يسا دەپۋتاتتىق ساۋالىندا.
ول قوعامدىق سانانى قالىپتاستىرۋدا جازۋشىلاردىڭ رۋحاني كوشباسشىلىق ءرولىن مويىنداپ, ادەبيەتتى ۇلتتىق يدەيانى جۇزەگە اسىرۋ قۇرالى دەپ تانيتىن كەز كەلگەنىن, ادەبيەتتىڭ مەملەكەتتىك ساياساتتاعى مارتەبەسىن ارتتىرىپ, «رۋحاني تاۋەلسىزدىك» يدەياسىن ناقتى ىسكە اسىرۋعا كىرىسۋ كەرەك ەكەنىن مالىمدەدى.
«ادەبيەت – مەملەكەتتىڭ مادەني جانە يدەولوگيالىق كۇشى. ادەبي شىعارمالار حالىقتى ءبىر ماقساتقا ۇيىستىرىپ, ءپاتريوتيزمدى وياتادى.
تاۋەلسىزدىك جىلدارىندا قازاق پوەزياسى ۇلتتىق بىرەگەيلىك پەن رۋحتى قالىپتاستىردى. قازىر ساياسي تۇراقتىلىق مادەني جانە رۋحاني ۇيلەسىمگە تاۋەلدى. مىسالى, ەۋروپاداعى اعارتۋ ءداۋىرى (XVIII عاسىر) ادەبيەت پەن فيلوسوفيانىڭ ورلەۋى ارقىلى عىلىم مەن ساياساتتىڭ دا وركەندەۋىنە جول اشىپ بەردى. ادەبيەت – مەملەكەتتىڭ رۋحاني كودى, عىلىمنىڭ يدەيالىق تىرەگى جانە ۇلتتىڭ ماڭگىلىك جانى. ياعني مەملەكەتتىڭ دامۋى دا, عىلىمنىڭ دامۋى دا ەڭ الدىمەن ادەبيەتتەن, ياعني رۋحانياتتان باستالادى», دەدى دەپۋتات.
قازىبەك يسا ادەبيەت پەن يدەولوگيا اراسىنداعى ءوزارا ىقپال السىرەپ, قازىرگى ادەبيەت زاماناۋي كەيىپكەر بەينەسىن سومداۋدا كەنجەلەپ قالعانىن, سوندىقتان دا بۇل باعىتتا جۇيەلى مادەني ساياسات پەن رۋحاني باعدار قاجەتتىگىن ايتتى.
«بۇگىندە ادەبيەتتە رۋحاني داعدارىس بايقالادى. كوپ تۋىندىدا وتكەن زامانىڭ سۇرلەۋىنەن شىعا الماي وتىر. قازىر ەلدىڭ بولاشاعىنا سەنىم بىلدىرەتىن, جارقىن جول كورسەتەتىن شىنايى شىعارمالار كەرەك. اسىرەسە جاستارعا ۇلتتىق ۇستانىم مەن تەحنولوگيالىق جاڭا زاماندى ۇشتاستىرا بىلگەن ۇلتتىق كەيىپكەرلەر قاجەت», دەدى قازىبەك يسا.
دەپۋتات ۇلتتىق ادەبيەتتەگى تۇلعالىق, رۋحاني جاڭارۋ يدەياسىن جۇزەگە اسىرۋ ءۇشىن قالامگەرلەردى رۋحاني تەرەڭدىك پەن كەمەلدىككە باعىتتايتىن ادەبيەت ينستيتۋتىن اشۋدى ۇسىندى. مۇنداي ينستيتۋت اقش, قىتاي, گەرمانيا, ءۇندىستان سەكىلدى مەملەكەتتەردە بار ەكەنىن مىسالعا كەلتىرىپ, الەمدىك دەڭگەيدە مويىندالعان 100 پروزالىق, 100 پوەزيالىق تۋىندىنى قازاق تىلىنە اۋدارۋ قاجەتتىگىنە توقتالدى. سونىمەن قاتار قازاق ادەبيەتىنىڭ وزىق شىعارمالارىنىڭ ساپالى اۋدارمالارىن جاساپ, ورتا ازيا, تۇرىك مەملەكەتتەرىنەن باستاپ, الەمگە ناسيحاتتاۋ ءىسىن جولعا قويۋ كەرەك دەگەن ويىن دا ورتاعا سالدى.
سونداي-اق ءماجىلىس دەپۋتاتى قازىبەك يسا: «ۇكىمەت پەن جازۋشىلار وداعى اراسىندا تۇراقتى «رۋحاني كەڭەس» قۇرۋدى ۇسىنامىز. جىلىنا ەكى رەت ادەبيەت, ءتىل, مادەنيەت ماسەلەلەرىن تالقىلايتىن كونسۋلتاتيۆتىك كەڭەس وتكىزىپ تۇرۋ كەرەك. ول كەڭەستىڭ قۇرامىنا بەلگىلى جازۋشىلار, ادەبيەتتانۋشىلار, مادەنيەت قايراتكەرلەرى, ساياساتكەرلەر ەنگىزىلۋگە ءتيىس. وسى قادام ارقىلى ادەبيەتتى ۇلتتىق يدەولوگيانى قالىپتاستىرۋ ىسىنە باعىتتاي الامىز», دەپ تۇيىندەدى ءوز ويىن.
