ايدا بالاەۆا ۇلى عالىم, اعارتۋشى ءارى ساياحاتشىعا ارنالعان عىلىمي ەڭبەكتىڭ جارىق كورۋىمەن بارشا زەرتتەۋشىنى قۇتتىقتادى. ءمينيستردىڭ ايتۋىنشا شوقان ءۋاليحانوۆتىڭ مۇراسىن يتاليالىق وقىرماندارعا تانىستىرۋ – قازاقستان مەن يتاليا اراسىنداعى رۋحاني بايلانىستى تەرەڭدەتەتىن ماڭىزدى قادام.
«شوقان ءۋاليحانوۆ – ۇلى دالانىڭ عانا ەمەس, الەمدىك دەڭگەيدەگى تۇلعا. ونىڭ زەرتتەۋلەرى حالىقارالىق عىلىمي قاۋىمداستىققا ورتالىق ازيا حالىقتارىنىڭ باي مادەنيەتى مەن وركەنيەتىن, سونداي-اق قازاق حالقىنىڭ رۋحاني مۇراسىن كەڭىنەن تانىتتى. ونىڭ ەڭبەكتەرىنىڭ يتاليان تىلىندە جارىق كورۋى – ءبىلىم مەن عىلىم ارقىلى ەكى ەلدىڭ جاقىنداسۋىنىڭ جارقىن ۇلگىسى. بۇل كىتاپ يتاليالىق وقىرماندارعا قازاقتىڭ تاريحىن, مادەنيەتىن جانە وي الەمىن جاقىنىراق تانۋعا مۇمكىندىك بەرەدى», دەدى ايدا بالاەۆا.
سونداي-اق مينيستر ەكى ەلدىڭ عالىمدارىنا, زەرتتەۋشىلەرىنە, اۋدارماشىلارىنا شىنايى العىسىن جەتكىزدى. ول بۇل كەزدەسۋ قازاقستان مەن يتاليا اراسىنداعى عىلىمي بايلانىستاردى نىعايتىپ, جاس عالىمدار مەن زەرتتەۋشىلەردى جاڭا ىزدەنىستەرگە جەتەلەيتىنىنە سەنىم ءبىلدىردى.
شوقان ءۋاليحانوۆتىڭ ءومىربايانىن يتاليا پروفەسسورى فەدەريكو پاستورە جازعان. ول ۇزاق جىلدار بويى عالىمنىڭ ءومىرى مەن قىزمەتىنە قاتىستى قازاقستاندىق دەرەككوزدەردى زەرتتەگەن. سونداي-اق مونوگرافيادا ش.ءۋاليحانوۆ ومىرىندە كەزدەسكەن بەلگىلى قازاق تۇلعالارىنا ارنالعان اۋقىمدى ءبولىم بار.
كىتاپ قازاقستان رەسپۋبليكاسىنىڭ يتاليا رەسپۋبليكاسىنداعى ەلشىلىگىنىڭ قولداۋىمەن, «Sandro Teti Editore» باسپاسىنان, قازاقستاندىق «كاسپي نەفت» اق مەن «Doscar Foundation Charity Fund» كورپوراتيۆتىك قورىنىڭ دەمەۋشىلىگىمەن جارىق كوردى. زەرتتەۋ سونىمەن قاتار اعىلشىن تىلىندە دە قولجەتىمدى.
