بۇل اۋىل تۇرعىندارى ءۇشىن عانا ەمەس, بۇكىل ءوڭىر سپورتشىلارى ءۇشىن اقجولتاي حابار بولىپ وتىر.
جاڭا سپورت نىسانى اۋىلدىڭ كەلبەتىن ايشىقتاپ, ۇلتتىق ءداستۇر مەن زاماناۋي ينفراقۇرىلىمنىڭ ۇيلەسىمىن كورسەتتى. الاڭ قۇرىلىسىنا دەمەۋشىلىك جاساعان — Halyk قايىرىمدىلىق قورى, ال جوبانى ىسكە اسىرۋ جۇمىستارىنا «قىزىلشا جەر» كومپانياسى ۇيىتقى بولعان.
كوكپار الاڭى 300-دەن اسا كورەرمەنگە ارنالعان تريبۋنامەن جابدىقتالعان. سپورتشىلارعا ارنالعان ارنايى ايماقتار مەن ويىن وتكىزۋگە قاجەتتى جاعدايدىڭ ءبارى قاراستىرىلعان. ەندى بەلباساردا تەك اۋىلدىق ەمەس, وبلىستىق دەڭگەيدەگى سايىستار دا ۇيىمداستىرىلماق.
اۋىلداعى العاشقا دودادا ءوڭىردىڭ سەگىز كومانداسى باق سىنادى. ولاردىڭ قاتارىندا مەركى, «امانات» (بەلباسار), «بىرلەس – اۋليەاتا», ء«تاتتى», ت.رىسقۇلوۆ, «اقسۋ», «بالۋان شولاق» جانە «شۋ» قۇرامالارى بار.
كورەرمەننىڭ دەلەبەسىن قوزدىرعان دودادا مەركى كومانداسى ۇزدىك شىعىپ, 3 ميلليون تەڭگە جۇلدەنى قانجىعالادى. ال تۋعان جەردىڭ نامىسىن قورعاعان «امانات» (بەلباسار) ەكىنشى ورىندى يەلەنىپ, 2 ميلليون تەڭگەگە يە بولدى. ءۇشىنشى ورىن «بىرلەس – اۋليەاتا» كومانداسىنا بۇيىرىپ, ولارعا 1 ميلليون تەڭگە تابىستالدى.
جامبىل وبلىسى
شۋ اۋدانى
