پرەزيدەنتتىك جاستار كادر رەزەرۆىنىڭ ۇلگىسىندە جاسالعان جوبا ناتيجەسىندە 2023-2024 جىلدارى 583 پەداگوگ رەزەرۆيست اتاندى. ونىڭ ىشىندە 397 باسشىنىڭ ورىنباسارى, 186 پەداگوگ بار. قازىرگى ۋاقىتتا ولاردىڭ 419-ى نەمەسە 71%-ى لاۋزىمدارعا تاعايىندالعان. 40 ديرەكتور «كەلەشەك مەكتەپتەرى» ۇلتتىق جوباسى اياسىندا اشىلعان مەكتەپتەردى باسقارىپ وتىر.
ال 2025 جىلى پەداگوگيكالىق شەبەرلىك ورتالىعىندا مەكتەپ ديرەكتورلارىنىڭ ورىنباسارلارىن وقىتۋ 21 شىلدەدە باستالىپ 12 قىركۇيەكتە اياقتالدى. ءبىلىم بەرۋدەگى وزگەرىس كوشباسشىلارى بىرنەشە كەزەڭ بويى ىرىكتەلىپ, ءۇش دەڭگەيدە بىلىكتىلىگىن ارتتىردى. سونىڭ ىشىندە بازالىق دەڭگەيدەن باستاپ, ساراپتامالىق, كاسىبي دايىندىق دەڭگەيىنە دەيىن ءارتۇرلى باعدارلامالار قامتىلعان. بۇل وقۋ باعدارلامالارى مەكتەپتى ءتيىمدى باسقارۋعا قاجەتتى داعدىلاردى جەتىلدىرۋگە باعىتتالعان.
بولاشاق مەكتەپ ديرەكتورلارىن وقىتۋعا ارنايى دايىندىقتان وتكەن, سەرتيفيكاتتالعان ترەنەرلەر تارتىلدى. ولار مەكتەپ باسشىلارىڭ بىلىكتىلىگىن ارتتىرۋدا 12 جىلدان استام تاجىريبەسى بار, اتالعان باعدارلاما بويىنشا كەمبريدج باعالاۋ كەڭەسىنىڭ سەرتيفيكاتتارىنا يە ماماندار.
ناتيجەسىندە, 411 كانديدات قورىتىندى باعالاۋدان ءوتىپ, اڭگىمەلەسۋگە جىبەرىلدى. اڭگىمەلەسۋدىڭ قورىتىندىسى بويىنشا ۇسىنىلعان 403 كانديداتقا وقۋ-اعارتۋ ءمينيسترى جۇلدىز سۇلەيمەنوۆا سەرتيفيكاتتار تابىستاپ, كادرلىق رەزەرۆكە قابىلدادى.
ەسكە سالا كەتەيىك, ء«بىلىم بەرۋدەگى وزگەرىستەردىڭ 1000 كوشباسشىسى» جوباسىن ءساتتى اياقتاعان جانە كادر رەزەرۆىنە كىرگەن ماماندار كونكۋرستىق راسىمدەردەن وتپەي-اق ءبىرىنشى باسشىنىڭ بوس ورنىنا تاعايىندالادى.
