مەشىت «Semey Smart City» ىقشام اۋدانىنداعى ەڭ ءىرى ءارى ساۋلەتتىك كەلبەتى ەرەكشە نىسانداردىڭ ءبىرى بولماق. مۇندا ءبىر مەزەتتە 5 000 ادام قۇلشىلىق ەتە الادى.
وبلىس اكىمى قۇرىلىس باسىندا مەشىتتىڭ وبلىس اۋماعىنداعى ەڭ ءىرى عيبادات ورنى بولاتىنىن ايتتى.
«ارحيتەكتۋرالىق ساۋلەتى كەلىسكەن, ەرەكشە مەشىت سالىنايىن دەپ تۇر. اباي ەلى, سەمەي جۇرتى كوپتەن كۇتكەن مۇنداي اۋقىمدى مەشىت وبلىسىمىزدا عانا ەمەس, وسى توڭىرەكتە جوق. حالىققا تەك رۋحاني عانا ەمەس, مادەني قىزمەت كورسەتەتىن ورتالىق بولادى. ابايدىڭ 180 جىلدىق مەرەيتويى اياسىنداعى مۇسىلمان جاماعاتتىڭ بىرلەسكەن جوباسى دەپ ايتۋعا بولادى. بۇل مەشىت الاشتىڭ رۋحاني استاناسىنا وتە قاجەت. وسىنداي قولى اشىق, جومارت جانداردىڭ دەمەۋشىلىگىمەن سالىنعالى جاتىر. «ابايعا قۇرمەت» اكتسياسى اياسىنداعى العاشقى ۇلكەن جوبا دەپ ايتۋعا بولادى», دەدى وبلىس اكىمى.
جاڭا اۋداندا 75 مىڭ تۇرعىنعا ارنالعان زاماناۋي تۇرعىن ءۇي كەشەندەرى, 40-تان استام اكىمشىلىك, كوممەرتسيالىق جانە الەۋمەتتىك نىساندار, ساياباقتار مەن دەمالىس ايماقتارى سالىنادى.
مەملەكەت باسشىسى قاسىم-جومارت توقاەۆتىڭ قولداۋىمەن باستالعان «ابايعا قۇرمەت» اكتسياسى اياسىندا ەلىمىزدىڭ بىرنەشە ءوڭىرى سەمەي قالاسىندا ءبىر نىسان سالىپ بەرۋگە ءوز ۇسىنىستارىن بەردى. اتاپ ايتقاندا, ماڭعىستاۋ وبلىسى دوستىق ءۇيىن, شىمكەنت قالاسى شىعارماشىلىق ورتالىعىن, تۇركىستان وبلىسى كورمە ورتالىعىن, استانا قالاسى «كەلەشەك» مەكتەبىن, اقتوبە وبلىسى جەكپە-جەك ورتالىعىن, پاۆلودار وبلىسى ۇستەل تەننيسى ورتالىعىن, سولتۇستىك قازاقستان وبلىسى رامىزدەر الاڭىن, قىزىلوردا وبلىسى «اناعا تاعزىم» ورتالىعىن, باتىس قازاقستان وبلىسى جەلىلىك ساياباقتى, اتىراۋ وبلىسى «اباي الەمى» ورتالىعىن, شىعىس قازاقستان وبلىسى ەرتىس جاعاجايىن اباتتاندىرۋدى جوسپارلاپ وتىر. سونداي-اق وبلىس اكىمدىگى مەن «سامۇرىق قازىنا» ءال اۋقات قورىنىڭ بىرلەسۋىمەن جاقىندا قالادا دەنە شىنىقتىرۋ ساۋىقتىرۋ كەشەنىنىڭ قۇرىلىسى باستالدى.
