قازاقستاندىق تاراپ ءوزارا ىنتىماقتاستىقتاعى وڭ سەرپىندى اتاپ ءوتىپ, «Honeywell»-گە قازاقستانمەن مۇددەلى ۇزاقمەرزىمدى ارىپتەستىككە دەگەن نيەتى ءۇشىن العىس ءبىلدىردى. اەروعارىشتىق تەحنولوگيا, ونەركاسىپتىك اۆتوماتتاندىرۋ مەن جاڭا ماتەريالدار جاساۋ سالاسىندا الەمدىك كوشباسشى بولىپ سانالاتىن كومپانيا قازاقستاندا 1998 جىلدان بەرى 500-دەن اسا جوبانى جۇزەگە اسىرعان.
ەربولات دوساەۆ ەلىمىز اناعۇرلىم ارتاراپتاندىرىلعان, ەكولوگيالىق جانە تەحنولوگيالىق ەكونوميكانى قالىپتاستىرۋعا ارنالعان اۋقىمدى ەكونوميكالىق ترانسفورماتسيانى باستان كەشىپ جاتقانىن اتاپ ءوتتى. وسىعان بايلانىستى ەل «Honeywell» ءوندىرىسىن لوكاليزاتسيالاپ, ودان ءارى كەڭەيتۋگە, تەحنولوگيالاردى ەنگىزۋگە مۇددەلى. ول كومپانيانىڭ قازاقستاندا ورتالىق ازيا, كاۆكاز ەلدەرىنە, ازەربايجان جانە ايماقتاعى باسقا دا مەملەكەتتەرگە قىزمەت كورسەتە الاتىن ايماقتىق حابىن قۇرۋدى قاراستىرۋدى ۇسىندى.
ءبىزدىڭ تاراپ «Honeywell»-ءدىڭ قاتىسۋىن كەڭەيتە ءتۇسۋ ءۇشىن بىرنەشە الەۋەتتى باعىتتى بەلگىلەدى. ولار – قازاقستان كاسىپورىندارىندا ونەركاسىپتىك قاۋىپسىزدىك پەن مونيتورينگتىك ماقساتتا قولدانۋ ءۇشىن «Honeywell» ونەركاسىپتىك قاۋىپسىزدىك جانە گاز تالداۋىن قاداعالاۋ جۇيەسىن كەڭەيتۋ, قالدىقتاردى ازايتۋ, ەنەرگيا جيناقتاۋ جونىندەگى ۇلتتىق ماقساتتارعا قول جەتكىزۋ شەڭبەرىندەگى ونەركاسىپ پەن ەنەرگەتيكا سالاسىنداعى جوبالار.
سونداي-اق كەزدەسۋگە قاتىسۋشىلار ەلىمىزدىڭ مۇناي-گاز نىساندارىنداعى تەحنولوگيالىق ۇدەرىستەردى باسقارۋ جۇيەسىنە جي-شەشىمدەرىن ەنگىزۋ تۋرالى كومپانيانىڭ ۇسىنىسىن تالقىلادى. جي-اگەنتتەردى ەنگىزۋ ءوندىرىستىڭ تيىمدىلىگىن, قاۋىپسىزدىگى مەن سەنىمدىلىگىن ارتتىرۋعا, ۇدەرىستەردى وڭتايلاندىرۋعا جانە شىعىندى ازايتۋعا مۇمكىندىك بەرەدى.
