قوسشى قالاسىنىڭ قوعامدىق مادەني-سپورت كەشەنىندە «ساز اسپاپتارى شەبەرلەرىنىڭ وداعى» رەسپۋبليكالىق قوعامدىق بىرلەستىگىنىڭ قۇرىلۋىنا وراي ءى رەسپۋبليكالىق قۇرىلتاي ءوتتى. تاعىلىمدى ءىس-شاراعا سەنات دەپۋتاتى دارحان قىدىرالى, ءماجىلىس دەپۋتاتى اسحات ايماعامبەتوۆ, قوسشى قالاسى اكىمىنىڭ ورىنباسارى بەرگەن جۇمكەي ۇلى, كۇيشى جانعالي ءجۇزباي مەن قايرات ايتباەۆ, اقىن داۋلەتكەرەي كاپ ۇلى, كۇلاش بايسەيىتوۆا اتىنداعى قازۇوۋ پرورەكتورى راۋشان نۇرتازا, اتالعان وقۋ ورنىنىڭ پروفەسسورلىق-وقىتۋشىلار قۇرامى قاتىستى.
جيىندا اسحات ايماعامبەتوۆ بىرنەشە ماڭىزدى ماسەلەنىڭ ءتۇيىنىن اعىتتى. ولاردىڭ ىشىندە ۇلتتىق اسپاپتاردى مەكتەپتەر مەن كوللەدجدەرگە ساتىپ الۋ جۇيەسىن جەتىلدىرۋ, شەبەرلەردىڭ تاجىريبەسىن كەلەسى ۇرپاققا ۇيرەتۋ – ءداستۇر ساباقتاستىعىن ۇزبەۋ, ۇلتتىق مۇراگەرلەردىڭ ءتىزىمىن جاساپ, سەرتيفيكاتتاۋ ارقىلى رەسمي قولداۋ كورسەتۋ, «شەبەر», «ۇستا» سەكىلدى مارتەبەلەردى رەسمي مويىنداۋ جانە قورعاۋ قاجەتتىگى سىندى ەلەۋلى تارماقتار بار.
– بۇل – ماتەريالدىق ەمەس مادەني مۇرامىزدى ساقتاۋدىڭ ماڭىزدى جولى. ويتكەنى ءاربىر شەبەردىڭ قولىنان شىققان دومبىرا, قوبىز, سازسىرناي – جاي عانا اسپاپتار ەمەس, حالىقتىڭ ءۇنى, ۇلتتىڭ جانى. سوندىقتان شەبەرلەرگە تەك مادەنيەت قىزمەتكەرى ەمەس, ۇلت مۇراسىنىڭ ساقشىسى رەتىندە دە قاراۋىمىز كەرەك, – دەدى اسحات ايماعامبەتوۆ.
جاڭا قۇرىلعان ۇيىمنىڭ توراعاسى بولىپ ايتىسكەر اقىن ەركەبۇلان قاينازاروۆ سايلاندى. القالى جيىندا قولعا الىپ وتىرعان جۇمىس تۋرالى ايتقان سەنات دەپۋتاتى دارحان قىدىرالى بىرلەستىك جۇمىسىنا ءسات ساپار تىلەدى.
ءىس-شاراعا ەلىمىزدىڭ تۇكپىر-تۇكپىرىنەن جينالعان جولاۋشى تۇردىعۇلوۆ, ناربەك وحانوۆ, سۇلتان مۇساەۆ, باقىتجان ءدىلمانوۆ, بابىر ارعىنوۆ سىندى شەبەرلەر سالاعا قاتىستى جۇيەلى ماسەلە كوتەرىپ, قۋانىشىن ءبىلدىردى.
– قازاق حالقىنىڭ رۋحاني مۇراسى مەن مۋزىكالىق مادەنيەتى عاسىرلار بويى ساز اسپاپتارىنىڭ ۇنىمەن ۇشتاسىپ كەلەدى. قوبىز, دومبىرا, سازسىرناي, شەرتەر, جەتىگەن سياقتى اسپاپتار تەك مۋزىكالىق قۇرال ەمەس, ۇلتتىڭ رۋحاني جادىن ساقتاۋشى ءرامىز رەتىندە تانىلعان. قۇداي قالاسا, بۇكىل قازاق شەبەرلەرىنىڭ مۇڭ-مۇقتاجىن ايتاتىن, شەبەرلىكتىڭ جولىن ءارى قاراي جالعاستىراتىن, سوعان بايلانىستى ۇلكەن ماسەلەلەردى شەشە الاتىن ايتۋلى وداق بولادى دەپ سەنەمىز, – دەدى جولاۋشى تۇردىعۇلوۆ.
ءسوز العان ساراپشىلاردىڭ پىكىرىنشە, ەلىمىزدە 300-500 اراسىندا مۋزىكالىق اسپاپ شەبەرى بار. قۇرىلتايدا «ساز اسپاپتارى شەبەرلەرىنىڭ وداعى» بىرلەستىگى كاسىبي شەبەرلەردىڭ باسىن بىرىكتىرىپ, ۇلتتىق اسپاپ ءوندىرىسىنىڭ ساپاسىن ارتتىرۋ تۋرالى ءسوز بولدى. سونىمەن بىرگە ءداستۇرلى تەحنولوگيالاردى جاڭعىرتۋدى جانە جاس مامانداردى تاربيەلەۋدى باستى نازاردا ۇستاپ, وسى جولدا شاكىرت تاربيەلەيتىن ۇستازدار كەرەگى ايتىلدى. ۇيىم الداعى ۋاقىتتا شەبەرلەردىڭ بىلىكتىلىگىن ارتتىرۋ كۋرستارىن, كورمەلەر مەن فەستيۆالدار وتكىزۋ ارقىلى مادەنيەتتى ناسيحاتتاۋ ءىس-شارالارىن جوسپارلاپ وتىرعانىن العا تارتتى.
ايتا كەتسەك, قوسشى قالاسىنىڭ اكىمدىگى بيىل ناۋرىز ايىندا قولونەر شەبەرلەرىنىڭ باسىن قوسىپ, قوعامدىق مادەني-سپورت كەشەنىنىڭ ىشىنەن شەبەرلەر زالىن اشقان. ول زالدا ەلىمىزگە جانە الەمگە تانىمال شەبەرلەر بەكتاس كارىم ۇلى, اسحات بوزىمباي, نۇرجان ءدىلمانوۆ, ءاليا قالياسقاروۆالاردىڭ بۇيىمدارى بار. ەندى مۇندا «ساز اسپاپتارى شەبەرلەرىنىڭ وداعى» رەسپۋبليكالىق قوعامدىق بىرلەستىگىنىڭ جۇمىسى جالعاسادى.
