فوتو: istockphoto.com
باقىت قالاسى قايدا؟
Time Out باسىلىمىنىڭ زەرتتەۋىنە سايكەس, باقىتتىڭ كارتاسىندا ءبىرىنشى ورىن بىرىككەن اراب امىرلىكتەرىنىڭ استاناسى – ابۋ-دابي قالاسىنا تيەسىلى. مۇنداعى تۇرعىنداردىڭ 99 پايىزى ءوز قالاسى ولاردى باقىتتى ەتەتىنىن ايتقان, ال 93 پايىزى «ومىرىمدە مۇنداي جايلى ورتادا بولماعانمىن» دەپ جاۋاپ بەرگەن. زەرتتەۋ اۆتورلارىنىڭ ايتۋىنشا, «ابۋ-دابي – ادامداردىڭ ءوز قالاسىنا دەگەن ماقتانىشى مەن سۇيىسپەنشىلىگى ەڭ جوعارى دەڭگەيگە جەتكەن مەكەن». تۇرعىندار مۇندا كۇن سايىن جاڭارىپ جاتقان ينفراقۇرىلىممەن قاتار, ۇلتتىق ءداستۇردىڭ ساقتالىپ وتىرعانىنا ەرەكشە ءمان بەرەدى ەكەن.
كوشتىڭ ەكىنشى ساتىسىندا – كولۋمبيانىڭ مەدەلين قالاسى تۇر. ءبىر كەزدەرى قاۋىپتى ايماق سانالعان بۇل شاھار بۇگىندە الەمگە بەيبىت ءومىردىڭ, مادەني جاڭعىرۋدىڭ سيمۆولى رەتىندە تانىلعان. مەدەلين تۇرعىندارىنىڭ 97 پايىزى ءوز قالاسىنان كۇندەلىكتى قۋانىش تاباتىنىن ايتقان. بۇل قالاعا «ماڭگى كوكتەم قالاسى» دەگەن ات بەكەر بەرىلمەگەن. كوشەلەردە كوفە ءيىسى مەن مۋزىكا ءۇنى قاتار ەستىلىپ, ال قوعامدىق كەڭىستىكتەردە ءومىر قايناپ جاتادى دەسەدى.
«مەدەليندە باقىت دەگەن – تىنىش تاڭەرتەڭ, دوستارمەن كەزدەسۋ, جىميىستان باستالاتىن كۇن», دەيدى ساۋالناما قاتىسۋشىسى.
ءۇشىنشى ورىندا وڭتۇستىك افريكانىڭ ءىنجۋ-مارجانى سانالاتىن كەيپتاۋن. مۇندا تۇراتىنداردىڭ 97 پايىزى وزدەرىن باقىتتى سەزىنەتىنىن ايتقان. قالا مۇحيت پەن تاۋدىڭ اراسىندا ورنالاسقان, بىراق ونىڭ باستى قۇپياسى تابيعاتىندا عانا ەمەس ونداعى ادامداردىڭ ءومىر ءسۇرۋ مانەرىندە. مۇندا ونەر مەن ەركىندىك ەرەكشە قادىرلەنەدى. «كەيپتاۋندا ءار كۇن – شابىت. «تاڭەرتەڭ تەڭىزگە قاراپ ويلاناسىڭ, تۇستە بازاردا دوستارىڭمەن كۇلەسىڭ, كەشكە ونەر گالەرەياسىنا باراسىڭ. وسى ءومىردىڭ ءوزى – باقىت», دەگەن جەرگىلىكتى تۇرعىن.
ال 2025 جىلعى رەيتينگتىڭ العاشقى جيىرمالىعىنا ابۋ-دابي, مەدەلين, كەيپتاۋن, مەحيكو, مۋمباي, پەكين, شانحاي, چيكاگو, سەۆيليا, مەلبۋرن, برايتون, پورتۋ, سيدنەي, چيانگماي, مارراكەش, دۋباي, حانوي, دجاكارتا, ۆالەنسيا جانە گلازگو قالالارى ەنگەن. قاراساڭىز, بۇل تىزىمدە باي دا, كەدەي دە مەملەكەتتەردىڭ قالالارى بار. دەمەك, باقىت دەڭگەيىن ەكونوميكالىق كورسەتكىشتەر عانا ايقىندامايدى. زەرتتەۋ دالەلدەگەندەي, ادام ءوزىن جايلى سەزىنەتىن ورتا – ونىڭ ەڭ ۇلكەن كاپيتالى.
باقىتتى ورتا, باقىتتى ادام
قازاقتا «جەرۇيىق» دەگەن ۇعىم بار. اسان قايعى ىزدەگەن ول مەكەن جايلى تابيعات پەن ادىلەتتى قوعامنىڭ جانە رۋحاني تىنىشتىقتىڭ نىشانى ەدى. قازىرگى «باقىتتى قالالار» يدەياسى سول ارماننىڭ زاماناۋي كورىنىسى سەكىلدى. زەرتتەۋ ناتيجەسى باقىتتى قالا جاساۋ ءۇشىن ۇلكەن بايلىق كەرەك ەمەس, ادامداردىڭ ءبىر-بىرىنە دەگەن سەنىمى مەن قامقورلىعى جەتكىلىكتى ەكەنىن كورسەتكەندەي. ەگەر ادام ءومىر ءسۇرىپ وتىرعان جەرىنەن قۋانىش تاپسا, سول مەكەن ونىڭ «جەرۇيىعىنا» اينالادى. سايكەسىنشە, ونداي ورتادا ادام ءوزىن قوعامنىڭ بولشەگى ەمەس, ونىڭ جۇرەگى رەتىندە سەزىنەدى. بۇل سەزىمگە ەكونوميكا دا, ساياسات تا اسەر ەتە المايدى. ويتكەنى شىن مانىندە, باقىتتىڭ مەكەنى كارتادا ەمەس – ادامنىڭ ءوز جۇرەگىندە.
