تۇركىستان وبلىسىنىڭ پروكۋرورى مۇرات تلەۋبەرديەۆتىڭ توراعالىعىمەن القا ماجىلىسىندە جەر زاڭناماسىنىڭ ساقتالۋى جونىندەگى ماسەلە قارالدى. ماجىلىستە تەكسەرۋ بارىسىندا انىقتالعان زاڭسىزدىقتار مەن كەمشىلىكتەردىڭ سەبەپ سالدارى تالقىلانىپ, جەرگىلىكتى اكىمدەر تاراپىنان جىبەرىلگەن زاڭ بۇزۋشىلىقتارعا نازار اۋدارىلدى.
— سوڭعى 3 جىل ىشىندە (2023-2025 جج.) وبلىس كولەمىندە جەرگىلىكتى اتقارۋشى ورگاندارمەن 6 مىڭ گەكتاردان استام (قۇنى 1,8 ملرد تەڭگە) 190 جەر ۋچاسكەلەرى زاڭسىز تابىستالعانى انىقتالدى. بۇل رەتتە, اكىمدەر جەر زاڭناماسىندا كوزدەلگەن كونكۋرس تالاپتارىن اينالىپ ءوتىپ, باۋ-باقشا شارۋاشىلىعىن جۇرگىزۋ, جەكە قوسالقى شارۋاشىلىق جانە قوسىمشا جەر تابىستاۋ جولىمەن مەملەكەت جەرلەرىن زاڭسىز يەلىكتەن شىعارعانى بەلگىلى بولدى. ونىمەن قوسا, 400 گەكتار جەردىڭ (150 جەر ۋچاسكەسى) نىسانالى ماقساتى زاڭسىز كاسىپكەرلىككە وزگەرتىلگەن. بىردە ءبىر جاعدايدا ساۋلەت جانە قالا قۇرىلىسى قۇجاتتامالارىنىڭ تالاپتارى ساقتالماعان, — دەلىنگەن حابارلامادا.
وتىرىستا, زاڭسىز قۇرىلىستار, جەكە تۇرعىن ءۇي كەزەكتىلىگى, جەرلەردى ۇتىمدى پايدالانۋ ماسەلەلەرى دە تالقىلاندى.
ءماجىلىس قورىتىندىسىمەن وسى سالاعا جاۋاپتى مەملەكەتتىك ورگاندارعا ءتيىستى حاتتامالىق تاپسىرمالار بەرىلىپ, زاڭ بۇزۋشىلىقتارعا جول بەرگەن لاۋازىم يەلەرىنىڭ جاۋاپكەرشىلىگىن قاراۋ جونىندە ەسكەرتىلدى.
