فوتو: اقوردا
بۇعان دەيىن ەكى ەل پرەزيدەنتتەرى «ورتالىق ازيا – رەسەي» ءسامميتى, تمد مەملەكەتتەر باسشىلارىنىڭ كەڭەسى وتىرىسىنا قاتىسقان بولاتىن.
«12 قاراشا كۇنى ءسىزدىڭ شاقىرۋىڭىزبەن رەسەيگە ساپارمەن بارامىن. ءبىز بۇعان ەرەكشە ءمان بەرىپ وتىرمىز. بۇل ساپار ەكى ەل اراسىنداعى ستراتەگيالىق سەرىكتەستىك پەن وداقتاستىق قاتىناستارعا تىڭ سەرپىن بەرەدى دەپ ويلايمىن. قازاقستان مەن رەسەيدى شىن مانىندە ماڭگى وداقتاستىق, ستراتەگيالىق سەرىكتەستىك جانە دوستىق قارىم-قاتىناستار بايلانىستىرادى. كورسەتكىشتەرگە كوڭىل تولادى. مەنىڭ رەسەيگە جاسايتىن ساپارىمنىڭ الدىندا ءوزارا ساۋدا كولەمى جوعارى دەڭگەيگە جەتتى. بىلتىر ونىڭ كولەمى 28 ميلليارد دوللاردى قۇرادى. رەسەي ءبىزدىڭ ەكونوميكاعا قارجى قۇيىپ وتىرعان نەگىزگى ينۆەستورلاردىڭ ءبىرى. وسى جىلدار ىشىندە رەسەي بيزنەسى قازاقستانعا 26 ميلليارد دوللاردان استام ينۆەستيتسيا سالدى. وتكەن جىلدىڭ وزىندە ەلىمىزگە 4 ميلليارد دوللار ينۆەستيتسيا كەلدى. بىرقاتار ءىرى جوبالار جۇزەگە اسىرىلىپ جاتىر. جالپى قۇنى 22 ميلليارد دوللارعا جۋىق 114 جوبانىڭ ىسكە اسىرىلعانىن مىسالعا الساق تا جەتكىلىكتى. بۇل باعىتتاعى جۇمىس ءالى دە جالعاسادى», دەدى مەملەكەت باسشىسى.
ۆلاديمير پۋتين ءوز كەزەگىندە قازاقستانمەن قارىم-قاتىناستى جوعارى باعالايتىنىن اتاپ ءوتتى.
«ەكى ەل اراسىنداعى بايلانىستاردىڭ سيپاتى ەرەكشە. بۇعان ءسىز بەن ءبىزدىڭ دوستىعىمىز عانا ىقپال ەتىپ وتىرعان جوق. ويتكەنى قازاقستان مەن رەسەي پوستكەڭەستىك كەڭىستىكتەگى ينتەگراتسيالىق ۇدەرىستەرگە باستاماشى بولىپ كەلە جاتقانى بەلگىلى. بىزدە تۇراقتى تۇردە نازار اۋداراتىن ەكىجاقتى ماسەلەلەر جەتكىلىكتى. ءوز تاراپىمنان قازاقستان-رەسەي بايلانىستارىن دامىتۋعا قوسقان ۇلەسىڭىز ءۇشىن سىزگە العىس ايتامىن. ەكىجاقتى فورماتتاعى وسىنداي كەزدەسۋلەرىمىز ىنتىماقتاستىعىمىزدى دامىتۋ ءۇشىن پايدالى بولاتىنىنا سەنىمدىمىن», دەدى رەسەي پرەزيدەنتى.
