سۋرەت: 24.kz
مينيستر Facebook-تەگى جازباسىندا الدىمەن جۋىردا ءبىرتۋار كومپوزيتور نۇرعيسا تىلەنديەۆتىڭ تۋعانىنا 100 جىل تولۋىنا وراي ەسكەرتكىشى بوي كوتەرگەنىن جانە جاڭا مادەنيەت ءۇيى اشىلعانىن جەتكىزدى.
سونداي-اق ا.بالاەۆا ەلىمىزدەگى ەسكەرتكىش ورناتۋ ماسەلەسىنە توقتالدى. ونىڭ ايتۋىنشا, زاڭسىز ەسكەرتكىشتەر ءتىپتى رەسپۋبليكالىق كوميسسيا قولداماسا دا, ءوز بەتىمەن ورناتىلعان. ءارى ول كەيبىر ەسكەرتكىشتەر جەكەمەنشىك اۋماقتارعا قويىلىپ, ءتىپتى ەسكەرتكىش پەن شاعىن ارحيتەكتۋرالىق نىساننىڭ ايىرماسى مۇلدە ەسكەرىلمەي جاتاتىنىن سىنعا الدى.
«ەسكەرتكىش ورناتۋ – تەك ىقىلاس پەن نيەت ەمەس, ەڭ الدىمەن ءتارتىپ پەن جاۋاپكەرشىلىك ەكەنىن ەسكەرۋ كەرەك. اسىرەسە يگى نيەتپەن قولداۋ ءبىلدىرىپ جۇرگەن دەمەۋشىلەر, مەتسەناتتار بۇل ماسەلەنى ۇدايى نازاردا ۇستاسا دەيمىز. ال جەرگىلىكتى اتقارۋشى ورگاندار زاڭسىزدىققا جول بەرمەي, قاتاڭ باقىلاۋعا الۋى كەرەك. «تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى» زاڭعا سايكەس, ءاربىر جاڭا ەسكەرتكىش مونۋمەنتالدى ونەر قۇرىلىستارىن ورناتۋ جۇمىستارىن وبلىستاردىڭ, رەسپۋبليكالىق ماڭىزى بار قالالاردىڭ جانە استانانىڭ جەرگىلىكتى اتقارۋشى ورگاندارى جۇزەگە اسىرادى. مونۋمەنتالدى ونەر قۇرىلىستارىن ورناتۋ ءتارتىبى مينيسترلىك قاعيدالارمەن رەتتەلگەن. سونىمەن قاتار اكىمشىلىك قۇقىق بۇزۋشىلىق تۋرالى كودەكستە مونۋمەنتالدى ونەر نىساندارىن ورناتۋ ەرەجەسىن بۇزعاندارعا ايىپپۇل قاراستىرىلعان. ناقتىراق ايتقاندا, جەكە تۇلعالارعا – 10, لاۋازىمدى تۇلعالار مەن شاعىن كاسىپكەرلىك سۋبەكتىلەرىنە – 50, ورتا كاسىپكەرلىك سۋبەكتىلەرىنە – 100, ءىرى كاسىپكەرلىك سۋبەكتىلەرىنە – 250 ايلىق ەسەپتىك كورسەتكىش كولەمىندە, سونداي-اق جۇرگىزىلىپ جاتقان جۇمىستاردى ۋاقىتشا توقتاتۋ قاراستىرىلعان. كەي جاعدايلاردا ەسكەرتكىشتەر جەكەمەنشىك اۋماقتارعا ورناتىلىپ, قوعامدىق كەڭىستىكتىڭ ەستەتيكالىق كەلبەتى ەسكەرىلمەي جاتادى. مۇنىڭ ءبارى تۇپتەپ كەلگەندە تاريحي تۇلعالارعا دەگەن قۇرمەتتىڭ لايىقتى دەڭگەيدە كورىنىس تابۋىنا كەرى اسەرىن تيگىزەدى. تاريحقا ادالدىق تارتىپتەن باستالادى. ويتكەنى ەسكەرتكىش – وتكەنگە قۇرمەت بەلگىسى عانا ەمەس, كەلەر ۇرپاققا دەگەن ورتاق اماناتىمىز», دەدى مينيستر.
ايتا كەتەيىك, زاڭسىزدىقتار مينيسترلىك جۇرگىزگەن تالداۋ بارىسىندا بەلگىلى بولعان.
