وسىعان دەيىن ورتالىققا 160-تان استام ءوتىنىش ءتۇسىپ, ولاردىڭ باسىم بولىگىنە الەۋمەتتىك, قۇقىقتىق جانە پسيحولوگيالىق قولداۋ كورسەتىلىپتى. اسىرەسە كوپبالالى جانە از قامتىلعان وتباسىلارعا, ايەلدەر مەن بالالارعا ەرەكشە كوڭىل ءبولىنىپ, قاجەتتى جاعدايدا ۋاقىتشا باسپانا بەرىلىپ, وڭالتۋ جۇمىستارى ءجۇرىلىپ جاتىر.
سەمەي قالاسىنداعى پاپانين كوشەسى, 34ا مەكەنجايىندا ورنالاسقان ورتالىققا ارنايى بارىپ, الەۋمەتتىك نىساندى ءوز كوزىمىزبەن كورىپ قايتقان ەدىك. ورتالىق زاماناۋي تالاپتارعا ساي ينفراقۇرىلىممەن جابدىقتالىپتى. مۇندا قابىلداۋ ءبولىمى, انا مەن بالا ءبولىمى, بالالارعا ارنالعان ويىن الاڭى, ترەنينگ زالدارى جانە ماماندار قابىلدايتىن كابينەتتەر بار ەكەن. ورتالىقتىڭ قىزمەتى – ءبىلىم, دەنساۋلىق ساقتاۋ, جۇمىسپەن قامتۋ بولىمدەرىمەن, پوليتسيامەن, ۇكىمەتتىك ەمەس ۇيىمدارمەن جانە ايەلدەر بىرلەستىكتەرىمەن ارىپتەستىك نەگىزىندە جۇمىس ىستەيدى.
– ورتالىققا جۇگىنگەن ازاماتتاردىڭ اراسىندا تۇرمىستىق زورلىق-زومبىلىققا ۇشىراعان ايەلدەر مەن بالالار دا بار. ولارعا ۋاقىتشا باسپانا ۇسىنىلىپ, قۇقىقتىق جانە پسيحولوگيالىق قولداۋ كورسەتىلەدى. سونىمەن قاتار قۇجاتتاردى راسىمدەۋدە, جۇمىسقا ورنالاسۋدا, بالالاردى مەكتەپ پەن بالاباقشاعا ورنالاستىرۋدا, تۇرعىن ءۇي ماسەلەسىن شەشۋدە ناقتى كومەك بەرىلدى, – دەيدى ورتالىق ديرەكتورى نازىم شاقاەۆا.
ونىڭ ايتۋىنشا, مۇنداعى باستى ماقسات – قيىندىققا تاپ بولعان ءاربىر وتباسىنا جان-جاقتى كومەك كورسەتىپ, تۇراقتىلىق پەن قوعامنىڭ قولداۋىن قالىپتاستىرۋ. الداعى ۋاقىتتا ءموبيلدى توپتاردىڭ جۇمىسىن كۇشەيتىپ, الەۋمەتتىك وسال توپتارعا ارنالعان ءتۇرلى ءىس-شارالار ۇيىمداستىرۋ جوسپارلانىپ وتىر.
قولداۋ ورتالىعىنىڭ كومەگىنە جۇگىنىپ جۇرگەن جالعىزىلىك انا زاۋرە مۇراتقىزىمەن دە تىلدەسۋدىڭ ءساتتى تۇسكەن. زاۋرە اپامىز ورتالىقتان تەگىن قۇقىقتىق كەڭەس الىپ, مامانداردىڭ اقپاراتتىق قولداۋىنا ريزا ەكەنىن ايتتى.
– ءار كىمنىڭ ىزدەنىپ كەلگەن تاقىرىبىنا ساي قولداۋ-كومەك بولا جاتىر. وسىنداي ورتالىق بار دەگەندى ەستىپ, زاڭ تۇرعىسىندا كومەككە جۇگىنگەن ەدىم. مەن ءۇي كەزەگىندە تۇرعان اداممىن, بىراق ءالى بولماي جاتىر. قازىر بالالارىم كامەلەت جاستان اسىپ كەتتى. جولداسىم ومىردەن وزعان. وسىعان بايلانىستى قۇقىقتىق كەڭەس الىپ جۇرگەن جايىم بار. ورتالىق ءبارىن الدىڭا اكەلىپ بەرمەس, ءبىر-اق كۇندە ءبارىمىزدىڭ پروبلەمامىزدى شەشىپ بەرە المايتىنى دا تۇسىنىكتى, دەي تۇرعانمەن مۇنداي قوعامدىق قولداۋدىڭ ءوزى از كومەك ەمەس, – دەيدى اپامىز.
ءاربىر وتباسىنىڭ تاعدىرى ارقيلى بولعانىمەن, بارىنە ورتاق نارسە – قولداۋعا دەگەن مۇقتاجدىق. وسىندايدا مەملەكەت پەن قوعام بىرلەسە ارەكەت ەتكەندە عانا قيىندىققا تاپ بولعان جاندارعا كومەكتەسە الاتىنى تۇسىنىكتى. وتباسىن قولداۋ ورتالىعى سونىڭ ايعاعى ىسپەتتى.
اباي وبلىسى
