سۋرەت: gov.kz
قازاقستان دامۋ بانكىنىڭ (قدب) باسقارما توراعاسى مارات ەلىباەۆتىڭ ايتۋىنشا, جاھاندىق تسيفرلىق ترانسفورماتسيا جاعدايىندا بارىنشا باسەكەگە قابىلەتتى ەتۋگە باعىتتالعان جوبالاردى قولداۋ ماڭىزدى.
«بۇگىندە ءبىز تەك ينفراقۇرىلىم مەن ونەركاسىپكە عانا ەمەس, ەكونوميكانىڭ تيىمدىلىگىن ەسەلەيتىن زاماناۋي تسيفرلىق شەشىمدەرگە دە ينۆەستيتسيا سالىپ جاتىرمىز. بۇل ءوز كەزەگىندە بيزنەسكە, ەكسپورتقا جانە جوعارى تەحنولوگيالىق جاڭا جۇمىس ورىندارىن اشۋعا مۇمكىندىك جاسايدى», دەيدى م.ەلىباەۆ.
ماسەلەن, جىل باسىندا قدب «ۇلتتىق اقپاراتتىق تەحنولوگيالار» اق-مەن كەلىسىم جاسادى. سونىڭ نەگىزىندە استاناداعى دەرەكتەردى وڭدەۋ ورتالىعىنا مەملەكەتتىك كىرىستەر كوميتەتىنە قاجەت سەرۆەرلىك جابدىق بەرىلدى. سونداي-اق ەكىباستۇز قالاسىندا جاڭا دەرەكتەر ورتالىعىن سالۋ ءۇشىن كرەديتتىك جەلى اشىلدى. بۇل دەرەكتەر ورتالىعى ەل ازاماتتارىنىڭ جەكە دەرەكتەرىن قورعايدى جانە اقپاراتقا ءۇزىلىسسىز قولجەتكىزۋگە جول اشادى. جۇيەنىڭ توقتاپ قالۋ قاۋپىن دە ازايتادى. سونىمەن قاتار 55 تۇراقتى جۇمىس ورنى ىسكە قوسىلادى. IT, اۆتوكولىك ءوندىرىسى جانە كۇردەلى حيميا سياقتى سالالاردى دا قارجىلاندىرىپ وتىر. بۇل جاڭا بىلىكتىلىك پەن داعدىنى قاجەت ەتەتىن زاماناۋي جۇمىس ورىندارىنىڭ اشىلۋىنا ىقپال ەتەدى.
ء«بىز ەلىمىزدىڭ بولاشاق ەكونوميكاسىنا قاجەتتى ينفراقۇرىلىمدى قۇرۋعا باسا نازار اۋدارامىز. ونىڭ نەگىزىندە تسيفرلىق شەشىمدەر جاتىر. تسيفرلىق ورتا ەكونوميكانىڭ بارشا قاتىسۋشىسى ءۇشىن اشىق, قولايلى ءارى قاۋىپسىز بولۋى قاجەت ەكەنىن جاقسى تۇسىنەمىز. سوندىقتان قدب تسيفرلىق وزگەرىستەردىڭ باستى قوزعاۋشى كۇشىنە اينالۋعا دايىن. بۇل – ءىرى IT-جوبالاردى قولداۋدان باستاپ, بانكتىڭ ءوز جۇمىسىندا يننوۆاتسيالاردى ەنگىزۋگە دەيىنگى كەڭ اۋقىمدى قامتيدى», دەدى م.ەلىباەۆ.
سونىمەن قاتار بانك نەسيە ۇدەرىسىنە قاتىساتىن بارلىق تاراپقا ارنالعان بىرىڭعاي تسيفرلىق پلاتفورما – «KDB Product Space» جۇيەسىن ىسكە قوستى. مۇندا ءار كەزەڭ ناقتى ۋاقىت رەجىمىندە كورىنىپ, تولىق باقىلاۋدا بولادى. پلاتفورما ميكروسەرۆيستىك ارحيتەكتۋرا نەگىزىندە قۇرىلعان. ونىڭ قۇرامىنداعى «KDB Document Service» قۇجاتتارمەن جۇمىس ىستەۋگە ارنالعان. بۇل جۇيەدە «OpenAI» ازىرلەگەن OSS ۇلگىسى نەگىزىندە قۇرىلعان جاساندى ينتەللەكت اگەنتتەرى بانك ىشىندە ءتيىمدى قىزمەت كورسەتەدى. قازىر جاساندى ينتەللەكت قارىز الۋشىلاردىڭ قۇجاتتارىن تانۋ مەن تالداۋ جۇيەسىندە قولدانىلىپ جاتىر. دەگەنمەن تۇپكىلىكتى شەشىمدى ءار سالاداعى ساراپشىلار قابىلدايدى. ال جاساندى ينتەللەكت ولارعا كومەكشى رەتىندە ۋاقىتتى ۇنەمدەۋگە جانە تالداۋدىڭ ساپاسىن كوتەرۋگە مۇمكىندىك بەرەدى.
ء«بىز بانك IT-ارحيتەكتۋراسىن تەك بۇگىنگى قاجەتتىلىكتەرگە ەمەس, كەلەشەكتىڭ مىندەتتەرىنە دە تولىق جاۋاپ بەرەتىندەي ەتىپ قالىپتاستىرىپ جاتىرمىز. ۇلكەن دەرەكتەر مەن جاساندى ينتەللەكت نەگىزىندەگى شەشىمدەردى ەنگىزۋ جوبالاردى الدەقايدا ءدال باعالاۋعا ءارى تاۋەكەلدەردى ازايتۋعا جول اشادى. بۇل ءوز كەزەگىندە شەشىم قابىلداۋ ۇدەرىسىن جەدەلدەتىپ, پەرسپەكتيۆالى باستامالاردى كەڭىنەن قولداۋعا مۇمكىندىك بەرەدى», دەيدى قدب اقپاراتتىق تەحنولوگيالار دەپارتامەنتىنىڭ ديرەكتورى سەرگەي شماگين.
بانك قارجى اينالىمىنىڭ اشىقتىعىن ارتتىرۋ ءۇشىن بيىل ۇلتتىق بانك جۇرگىزىپ وتىرعان تسيفرلىق تەڭگەنى ەنگىزۋ جونىندەگى قاناتقاقتى جوباعا قاتىسۋدى جوسپارلاپ وتىر. بۇل باستاما قارجى قوزعالىسىن تولىق باقىلاۋعا مۇمكىندىك بەرىپ, قاراجاتتىڭ ورىنسىز جۇمسالۋىنىڭ جولىن كەسەدى.
