بەلارۋس پرەزيدەنتىمەن كەزدەسكەندە ەلدەر اراسىنداعى ساۋدا مەن ەكونوميكالىق بايلانىستار تالقىلاندى. سونداي-اق ونەركاسىپ سالاسىندا ىنتىماقتاستىقتى كۇشەيتۋ ءارى جاڭا يننوۆاتسيالىق جوبالاردى بىرگە ىسكە اسىرۋ ماسەلەلەرىنە ەرەكشە كوڭىل ءبولىندى.
ەۋرازيالىق ۇكىمەتارالىق كەڭەستىڭ وتىرىسىنا بەلارۋس پرەمەر-ءمينيسترى الەكساندر تۋرچين, قىرعىز رەسپۋبليكاسى پرەزيدەنت اكىمشىلىگىنىڭ باسشىسى ءارى مينيسترلەر كابينەتى توراعاسى ادىلبەك كاسىماليەۆ, رەسەي ۇكىمەتىنىڭ توراعاسى ميحايل ميشۋستين, ارمەنيانىڭ ۆيتسە-پرەمەرى مگەر گريگوريان بەينەكونفەرەنتسيا ارقىلى قاتىستى. سونىمەن قاتار ەۋرازيالىق ەكونوميكالىق وداق (ەاەو) جانىنداعى باقىلاۋشى ەلدەردەن وزبەكستان پرەمەر-ءمينيسترى ابدۋللا اريپوۆ, يراننىڭ ونەركاسىپ, شاحتا جانە ساۋدا ءمينيسترى سەيەد موحامماد تاباك, كۋبانىڭ ونەركاسىپ ءمينيسترى ەلوي الۆارەس مارتينەس بولدى. شاقىرىلعان ەلدەردەن ازەربايجان پرەمەر-ءمينيسترى الي اسادوۆ قاتىستى. سونداي-اق ەۋرازيالىق ەكونوميكالىق كوميسسيا (ەەك) القاسىنىڭ توراعاسى باقىتجان ساعىنتاەۆ, تمد باس حاتشىسى سەرگەي لەبەدەۆ جانە باسقا دا وكىلدەر جينالدى.
شاعىن قۇرامداعى وتىرىستا بيىلعى 31 قاڭتاردا وتكەن جيىندا بەرىلگەن تاپسىرمالاردىڭ ورىندالۋ بارىسى قارالدى. بىرنەشە ۇيىمداستىرۋشىلىق ماسەلە شەشىلدى.
كەڭەيتىلگەن قۇرامداعى وتىرىستا قاتىسۋشىلار ەاەو-نىڭ ينتەگراتسيالانعان اقپاراتتىق جۇيەسىن, كولىك ينفراقۇرىلىمىن دامىتۋ مەن باسقا دا ماسەلەلەر تۋرالى پىكىر الماستى.
پرەمەر-مينيستر ولجاس بەكتەنوۆ ءوز سوزىندە ەكونوميكالىق ىنتىماقتاستىقتى تەرەڭدەتۋدىڭ ماڭىزىن اتاپ ءوتتى. ول كووپەراتسيا, كولىك-ترانزيت جانە تسيفرلىق سالادا ۇلكەن مۇمكىندىك بار ەكەنىن ايتتى. ەاەو-نىڭ جاھاندىق ەكونوميكاداعى ورنىن كۇشەيتۋ ءۇشىن حالىقارالىق ارىپتەستىكتى دامىتۋ ءارى جاڭا نارىقتارعا شىعۋعا قولايلى جاعداي جاساۋ قاجەت ەكەنى دە ايتىلدى.
جيىندا اگروونەركاسىپ كەشەنى ەرەكشە تاقىرىپ بولدى. ول – ازىق-ت ۇلىكپەن قامتاماسىز ەتۋ مەن ورنىقتى دامۋدىڭ نەگىزى. بۇعان دەيىن ونەركاسىپتىك جوبالارعا ءبولىنىپ كەلگەن ەاەو بيۋدجەتىن اۋىل شارۋاشىلىعىنا تارتۋ ماسەلەسى قاراستىرىلدى. بۇل قادام جاڭا تەحنولوگيالاردى ەنگىزۋدى جەدەلدەتىپ, جەتكىزۋ تىزبەگىن نىعايتۋعا جانە ەاەو ەلدەرىنىڭ ونىمدەرىن سىرتقى نارىقتا باسەكەگە قابىلەتتى ەتۋگە كومەكتەدى.
سونداي-اق تەحنيكالىق رەگلامەنتتەردى ازىرلەۋدە تسيفرلاندىرۋدىڭ ءرولى اتالدى. ول بىرىڭعاي قاۋىپسىزدىك تالاپتارىن جاڭارتۋدى, ۇدەرىستى جەدەلدەتۋدى, اشىقتىقتى ارتتىرۋعا جول اشادى. بىرلەسىپ ىسكە اسىرىلىپ جاتقان «تسيفرلىق تەحنيكالىق رەتتەۋ» جوباسى ينتەگراتسيانى جاڭا دەڭگەيگە كوتەرەدى.
«پرەزيدەنت قاسىم-جومارت توقاەۆ تاياۋداعى جولداۋىندا الداعى ءۇش جىل ىشىندە ەلىمىزدى شىنايى تسيفرلىق ەلگە اينالدىرۋ تۋرالى ستراتەگيالىق مىندەت قويدى. قازاقستان ۇكىمەتى قازىر تسيفرلاندىرۋ, جاساندى ينتەللەكت تەحنولوگيالارىن ەنگىزۋ بويىنشا قارقىندى جۇمىستار جۇرگىزىپ جاتىر. ءبىز جاقىن ارادا «Alem.ai» حالىقارالىق جاساندى ينتەللەكت ورتالىعىن اشامىز, ول تسيفرلىق ەكونوميكانى, شىعارماشىلىق يندۋستريانى ىلگەرىلەتۋدە ءارى جاساندى ينتەللەكت ەكوجۇيەسىن قۇرۋ درايۆەرىنە اينالماق. وتاندىق IT شەشىمدەردىڭ ەكسپورتىن ۇلعايتۋ بويىنشا دا جۇمىس ىستەپ جاتىرمىز. بارلىق ارىپتەسىمدى جي سالاسىنداعى جوبالاردى قارقىندى جۇزەگە اسىرۋعا شاقىرامىن. بۇل ءبىز ازىرلەپ جاتقان جول كارتاسىندا ەلەۋلى ورىن الۋعا ءتيىس», دەپ اتاپ ءوتتى ولجاس بەكتەنوۆ.
ەۋرازيالىق ۇكىمەتارالىق كەڭەس وتىرىسىنىڭ قورىتىندىسىندا بىرنەشە ماڭىزدى قۇجاتقا قول قويىلدى. قابىلدانعان شەشىمدەر ونەركاسىپ پەن اگروونەركاسىپتىك كووپەراتسيانى دامىتۋعا, تسيفرلىق سالاداعى ىنتىماقتاستىقتى كۇشەيتۋگە, وتكىزۋ نارىقتارىن كەڭەيتۋگە جانە مۇشە ەلدەردىڭ ەكونوميكالىق تۇراقتىلىعىن ارتتىرۋعا باعىتتالدى. كەلەسى ەۋرازيالىق ۇكىمەتارالىق كەڭەس وتىرىسى بيىلعى جەلتوقسان ايىندا ماسكەۋدە وتەدى.
