سۋرەتتى تۇسىرگەن – ەرلان ومار, «EQ»
وسى ماماندىقتىڭ قىرى مەن سىرىن بىلگىسى كەلگەن جاس بۋىن كوبىنە گازەت-جۋرنال رەداكتسياسىنا ارنايى كەلىپ, ونداعى قايناپ جاتقان كاسىبي ءومىردى كوزىمەن كورۋگە ىنتىعادى. بۇل – باياعىدان كەلە جاتقان كاسىپتىك داعدىنىڭ ءبىرى. كەشە ماقسۇت نارىكباەۆ ۋنيۆەرسيتەتىنىڭ حالىقارالىق جۋرناليستيكا ماماندىعىندا وقيتىن ءبىر توپ بولاشاق جۋرناليست باس باسىلىم «Egemen Qazaqstan» گازەتى رەداكتسياسىنا اتباسىن بۇردى. بۇيىمتايلارىن سۇراساق, اتالعان گازەتتىڭ جۇمىس بارىسىمەن تانىسىپ, ماتەريال دايىنداۋ دەيتىن جاۋاپتى ءىستىڭ ەرەكشەلىگىن ءتۇسىنۋ ەكەن.
گازەت قىزمەتكەرلەرى ءۇشىن ەڭ تاپشى دۇنيەنىڭ ءبىرى – ۋاقىت. سوندا دا تالاپتانىپ كەلگەن جاستارعا ءجون سىلتەيىك دەگەن ويمەن ساقا جۋرنالسيتەر ءوز تاجىريبەلەرىمەن ءبولىستى. «قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى قازىر جۋرناليستيكانىڭ بەدەلى ارتا تۇسكەنىن ايتا كەلە, سونىمەن بىرگە بۇل سالاعا جاۋاپكەرشىلىكتىڭ اۋاداي قاجەتتىگىن العا تارتتى. «گازەتتىڭ ىشكى ءومىرىن بىلمەي, جۋرناليست بولۋ مۇمكىن ەمەس. ونىڭ ۇستىنە بۇل سالادا قارىم-قاتىناس تا ماڭىزدى. گازەت جۋرناليستيكاسى ادامداردى ساۋاتتىلىققا ۇيرەتەدى. سول ءۇشىن وسى ماماندىقتىڭ قازانىندا قايناعىسى كەلگەن ادام ەڭ الدىمەن ساۋاتتى بولۋ كەرەك. ءبىر ايتا كەتەتىن جايت – گازەتتىڭ قوعامداعى ءرولى تۋرالى بولماق. شىندىعىندا, گازەت – تاريح. وسى كاسىپتىڭ جۇمىسىن اتقارىپ جۇرگەندەر – تاريح جاساۋشىلار» دەگەندى قوستى.
ال باس ديرەكتوردىڭ ورىنباسارى قامبار احمەت جاس جۋرناليستەرگە اقپارات دايىنداۋ, ونىڭ دۇرىس-بۇرىستىعىن قالاي تەكسەرۋ جانە اعىمداعى اقپارلاردى دەر كەزىندە گازەتكە قالاي ازىرلەۋ كەرەكتىگى جونىندە تاجىريبەسىمەن ءبولىستى. «Egemen Qazaqstan» گازەتى باس رەداكتورىنىڭ ورىنباسارى تالعات باتىرحان جۋرنالسيتيكانىڭ جۇمىسىنا شىداعان ادام عانا وسى سالادا ناتيجە شىعاراتىنىن ايتىپ, بولاشاق جۋرناليستەرگە ءسات-ساپار تىلەدى.
