سۋرەتتى تۇسىرگەن – اقادىل رىسماحان
وبلىس ورتالىعى تاراز قالاسىنا قاراستى قۇمشاعال تۇرعىن الابىندا 8 مىڭعا جەتەعابىل حالىق قونىستانعان. تۇرعىندار تىعىز شوعىرلانعان قۇمشاعالعا ۋاقىت تالابىنا ساي كەلەتىن رۋحانيات ورداسى كەرەكتىگى ىلگەرىدە ءجيى ايتىلاتىن. جەرگىلىكتى اتقارۋشى بيلىك وكىلدەرى حالىقتىڭ ءوتىنىشىن نازاردان تىس قالدىرماي, بىلتىر جىل سوڭىندا مادەنيەت ءۇيىنىڭ قۇرىلىسىن باستاعان. ەندى سول جاڭا نىسان پايدالانۋعا بەرىلدى.
تۇرعىن الابىندا بوي كوتەرگەن مادەنيەت ءۇيىنىڭ اشىلۋ سالتاناتىنا ءوڭىر باسشىسى ەربول قاراشوكەەۆ ارنايى بارىپ, قۇمشاعالدىقتاردىڭ قۋانىشىنا ورتاقتاستى. ءوز كەزەگىندە جەرگىلىكتى تۇرعىندار 140 ورىندىق مادەنيەت ءۇيىنىڭ بوي كوتەرۋىنە ىقپال ەتكەن بيلىك وكىلدەرىنە ريزاشىلىعىن جەتكىزىپ, اقجارما تىلەگىن ايتتى.
«مادەنيەتسىز ەل دە, ۇلت تا بولمايدى. ويتكەنى مادەنيەت – حالىقتىڭ رۋحاني قازىناسى. ونەرى ورىستەگەن وڭىردە مادەنيەت سالاسىنىڭ قىزمەتكەرلەرىنە قولداۋ توقتاماق ەمەس. سەبەبى جامبىل جەرى – ۇلتتىق دەڭگەيدەگى مادەنيەت مايتالماندارىن دۇنيەگە اكەلگەن ءوڭىر. ءبىز تۇعىرلى تۇلعالارىمىزدى قاي كەزدە دە ماقتان تۇتامىز. جەرگىلىكتى اتقارۋشى بيلىك وكىلدەرى سالا قىزمەتكەرلەرىنىڭ ءوتىنىشىن نازاردان تىس قالدىرمايدى. قاسيەت دارىپ, قۇت قونعان اۋليەاتا جەرىنەن, تاراز توپىراعىنان تالاي جاس دارىن تۇلەپ ۇشقان. سول ءداستۇر ساباقتاستىعىنىڭ جالعاسۋىنا قولدان كەلگەنشە جاعداي جاسايمىز. قۇمشاعالدا بوي كوتەرگەن جاڭا عيماراتتاعى ماماندار جاس ۇرپاقتىڭ رۋحاني مۇرامەن سۋسىنداۋىنا, ۇلتتىق ونەردىڭ ورىستەي تۇسۋىنە بارىنشا مۇددەلىلىك تانىتادى دەپ سەنەمىز. مۇندا جاستاردىڭ شىعارماشىلىق داعدىسىن دامىتۋعا بارلىق جاعداي قاراستىرىلعان. ەندى تەك ايانباي ەڭبەك ەتۋ كەرەك», دەدى ءوڭىر باسشىسى.
رەسمي دەرەككە جۇگىنسەك, بيىل وڭىردە 16 مادەنيەت نىسانىنىڭ قۇرىلىس جۇمىسىن جۇرگىزۋگە قوماقتى قاراجات قاراستىرىلعان. قازىرگە دەيىن 5 نىسان پايدالانۋعا بەرىلگەن. جىل سوڭىنا دەيىن تاعى 6 نىساننىڭ قۇرىلىسى اياقتالادى.
«سوڭعى ۋاقىتتا قۇمشاعالعا ايرىقشا كوڭىل ءبولىنىپ جاتىر. بىرنەشە الەۋمەتتىك نىسان سالىندى. جەرگىلىكتى جۇرت اسىعا كۇتكەن مادەنيەت ءۇيى دە بوي كوتەرىپ, تۇرعىندار ءۇشىن ەسىگىن ايقارا اشتى. تۇرعىنداردىڭ تىلەگىن قاپەردەن شىعارماعان ءوڭىر باسشىسى ەربول قاراشوكەەۆ پەن تاراز قالاسىنىڭ اكىمى باقىتجان ورىنبەكوۆكە ايتار العىسىمىز شەكسىز. ەكى ازامات ءبىر جىل بۇرىن قۇمشاعالدا مادەنيەت وشاعى بوي كوتەرەدى دەگەن ۋادە بەرىپ ەدى. بۇگىن سول ۋادەنىڭ ۇدەسىنەن شىعىپ, قۋانىشىمىزدى ءبولىسىپ وتىر. ۋاقىت سۇرانىسىنا ساي سالىنعان جاڭا نىسان جاستاردىڭ باس سۇعاتىن قاسيەتتى شاڭىراعىنا اينالادى دەگەن سەنىم زور», دەيدى قۇمشاعالدىق قاريا راحمەنبەك رىسداۋلەت ۇلى.
مادەنيەت ءۇيىنىڭ قۇرىلىس جۇمىسى وتكەن جىلدىڭ قاراشا ايىندا باستالىپ, قازىنادان 363 ملن تەڭگە قاراجات ءبولىندى. جۇمىستى ء«ال-مانسۇر» جشس جۇرگىزگەن. مادەنيەت وشاعى ۋاقىت تالابىنا ساي سالىنعان. مۇندا دەكوراتسيا قويماسى, اكىمشىلىك بولمە, كىتاپحانا, 12 ورىندىق وقۋ زالى بار. سونداي-اق بالالار مەن جاستاردى شىعارماشىلىققا باۋليتىن بىرنەشە ۇيىرمە جۇمىس ىستەيدى.
تاراز
