شارتتى وزگەرتۋگە بولادى
ەگەر قارجىلىق جاعدايىڭىز قيىنداپ كەتسە, كرەديتتى تولەۋ شارتتارىن وزگەرتۋگە ءوتىنىش بەرە الاسىز. ول ءۇشىن بانككە, مقۇ-عا نەمەسە كوللەكتورلىق اگەنتتىككە جازباشا ءوتىنىش تاپسىرۋ كەرەك. وتىنىشكە جاعدايىڭىزدى دالەلدەيتىن قۇجاتتاردى قوسا بەرەسىز. بۇل قۇجاتتار – جۇمىسسىز رەتىندە تىركەلگەنىڭىز تۋرالى انىقتاما, جۇمىستان بوساتىلعانىڭىزدى راستايتىن اكت, جالاقىسىز دەمالىسقا شىققانىڭىزدى كورسەتەتىن قۇجات, جاقىن تۋىسىڭىزدىڭ اۋىرعانىن نەمەسە قايتىس بولعانىن دالەلدەيتىن انىقتاما, مۇگەدەكتىڭتىڭ بار ەكەنىن ايقىندايتىن قۇجاتى نەمەسە سوت اكتىلەرى بولۋى مۇمكىن.
تولىق ءتىزىم اگەنتتىكتىڭ سايتىندا بار. ءوتىنىشتى بانككە نەمەسە مقۇ-عا بارىپ جەكە تاپسىرۋعا بولادى. كەي جاعدايدا ءموبيلدى قوسىمشا نەمەسە ەلەكتروندىق پوشتا ارقىلى جولداۋعا مۇمكىندىك بار. كرەديتور ءوتىنىشتى 15 كۇن ىشىندە قاراۋعا مىندەتتى.
شاعىمدانۋعا دا قۇقىلىسىز
ەگەر بانك نەمەسە مقۇ قابىلداعان شەشىم كوڭىلىڭىزدەن شىقپاسا, ومبۋدسمانعا شاعىمدانۋعا قۇقىعىڭىز بار. بانكتىك قارىزدار بويىنشا – bank-ombudsman.kz سايتى ارقىلى, ال مقۇ قارىزدارى بويىنشا – mfombudsman.kz سايتى ارقىلى ءوتىنىش جولداۋعا بولادى.
شاعىمعا قارىز شارتى, تولەم كەستەسى, بانككە نەمەسە مقۇ-عا جازعان ءوتىنىشتىڭ كوشىرمەسى, ولاردىڭ جاۋابى جانە قيىن جاعدايىڭىزدى دالەلدەيتىن قۇجاتتار قوسا بەرىلۋى ءتيىس. ومبۋدسمان قىزمەتى تەگىن ءارى شەشىمى مىندەتتى تۇردە ورىندالادى. بىراق ومبۋدسمانعا تەك كرەديتورعا رەسمي ءوتىنىش جاساپ, جاۋاپ العاننان كەيىن عانا جۇگىنە الاسىز.
بانكروتتىق تا كومەكتەسەدى
ەگەر قارىزدى مۇلدە تولەۋ مۇمكىن بولماسا, «ازاماتتاردىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى» زاڭ بويىنشا بانكروتتىق ءراسىمىن باستاۋعا بولادى. ول ءۇشىن بىرنەشە شارت ورىندالۋى قاجەت: قارىز كولەمى 1600 اەك-تەن اسۋى; تابىس جەتىسپەۋى; ساتۋعا بولاتىن مۇلكى بولماۋى; 12 اي بويى تولەم جاسالماۋى; قارىز الۋشى جەكە كاسىپكەر بولماۋى; كەيىنگى 7 جىلدا بانكروتتىقتان وتپەگەن; كەيىنگى 5 جىلدا قارىزىن قايتا قۇرماعان بولۋى ءتيىس. ءراسىم تەگىن جانە ونى eGov.kz پورتالى ارقىلى نەمەسە حقكو-عا بارىپ باستاۋعا بولادى.
بانكروتتىق راسىمىنەن كەيىن بورىشتار كەشىرىلگەنىمەن, ونىڭ سالدارى بار. قارىز الۋشى 5 جىل بويى جاڭا كرەديت پەن قارىز الا المايدى, 3 جىل بويى مەملەكەتتىك جانە كۆازيمەملەكەتتىك ۇيىمداردا قارجى باسقارۋعا بايلانىستى قىزمەت اتقارا المايدى. سونىمەن بىرگە بانكروتتىق تۋرالى مالىمەت رەسمي تىزىلىمدە ساقتالىپ, بولاشاقتاعى قارجىلىق بەدەلگە اسەر ەتۋى مۇمكىن. سوندىقتان بانكروتتىقتى باستاماس بۇرىن ونىڭ بارلىق ارتىقشىلىعى مەن سالدارىن مۇقيات ويلانۋ قاجەت.
