اشىلۋ سالتاناتىنا پرەمەر-ءمينيسترىنىڭ ورىنباسارى ەرمەك كوشەرباەۆ, كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجو تە يك, عىلىم جانە جوعارى ءبىلىم ءمينيسترى ساياسات نۇربەك, تۇركىستان وبلىسىنىڭ اكىمى نۇرالحان كوشەروۆ, سونداي-اق «ۆۋسونگ ءبىلىم قورىنىڭ» قۇرمەتتى توراعاسى جانە باسقارما مۇشەسى كيم سون كيونگ مىرزا قاتىستى.
«پرەزيدەنت قاسىم-جومارت كەمەل ۇلى توقاەۆتىڭ تاپسىرماسى بويىنشا ەلىمىزدە شەتەلدىك جەتەكشى جوعارى وقۋ ورىندارىنىڭ فيليالدارىن اشۋ جۇمىستارى جۇرگىزىلۋدە. قازىرگى ۋاقىتتا ءتۇرلى فورماتتا 40 ستراتەگيالىق ارىپتەستىك جۇزەگە اسىرىلدى, ونىڭ 33-ءى – شەتەلدىك ۋنيۆەرسيتەتتەر فيليالدارى. بۇگىن ءبىز تاريحي وقيعانىڭ كۋاسى بولىپ وتىرمىز – رۋحاني باي ءارى كونە تۇركىستان قالاسىندا كورەيا رەسپۋبليكاسىنىڭ جەتەكشى ۋنيۆەرسيتەتىنىڭ فيليالى اشىلدى. بۇل جوعارى وقۋ ورنى جاي عانا ءبىلىم بەرۋ الاڭى ەمەس, حالىقارالىق ىنتىماقتاستىق پەن يننوۆاتسيالار ورتالىعى جانە ەلىمىزدىڭ زياتكەرلىك كاپيتالىن قالىپتاستىراتىن جوعارى بىلىكتى ماماندار دايارلايتىن ورتاعا اينالادى», دەدى ۆيتسە-پرەمەر ەرمەك كوشەرباەۆ فيليالدىڭ اشىلۋ سالتاناتىندا.
ال عىلىم جانە جوعارى ءبىلىم ءمينيسترى ساياسات نۇربەك قازاقستاننىڭ ورتالىق ازياداعى جەتەكشى ءبىلىم بەرۋ حابىنا اينالدىرۋعا باعىتتالعان جوبالاردىڭ ماڭىزدىلىعىن اتاپ ءوتتى. ەلىمىزدە شەتەلدىك جوعارى وقۋ ورىندارىنىڭ فيليالدارىن اشۋ وسى ستراتەگيالىق ماقساتقا جەتۋدىڭ ماڭىزدى بولىگى ەكەنىن ايتتى. «Woosong University Kazakhstan» ديرەكتورى حۆا چون يون ۋنيۆەرسيتەتتىڭ ميسسياسى, نەگىزگى ءبىلىم بەرۋ باعدارلامالارى, عىلىمي باعىتتارى جانە حالىقارالىق سەرىكتەستىك تۋرالى كەڭىنەن باياندادى.
جالپى اۋدانى 16 252 شارشى مەتردى قۇرايتىن ۋنيۆەرسيتەتتە ەكى ءبىلىم بەرۋ باعدارلاماسى جۇزەگە اسىرىلادى. ستۋدەنتتەر «جاساندى ينتەللەكت» جانە «دەرەكتەر تۋرالى عىلىم» ماماندىقتارى بويىنشا ءبىلىم الادى. جوعارىدا اتالعان باعدارلامالار اياسىندا «قوس ديپلوم» جانە «اكادەميالىق ۇتقىرلىق» مۇمكىندىكتەرى قاراستىرىلعان. «قوس ديپلوم» باعدارلاماسى اياسىندا ستۋدەنتتەر 2 جىلدى «Woosong University Kazakhstan» ۋنيۆەرسيتەتىندە جانە 2 جىلدى Woosong University (كورەيا) نەمەسە Woosong University-ءدىڭ الەمدەگى سەرىكتەس وقۋ وردالارىنىڭ بىرىندە وقي الادى. باعدارلامانى اياقتاعان ستۋدەنتتەر ەكى ديپلومعا يە بولادى. «الماسۋ باعدارلاماسى» اياسىندا شەتەلدە وقۋ, تاجىريبەدەن ءوتۋ مۇمكىندىكتەرى بار.
ۋنيۆەرسيتەتتە ارنايى پروفەسسورلىق-وقىتۋشىلار قۇرامى جاساقتالعان. ۋنيۆەرسيتەتتىڭ ماتەريالدىق-تەحنيكالىق بازاسىندا 600 ورىندىق جاتاقحانا, Woosong University (كورەيا) بازاسىنداعى ەلەكتروندىق كىتاپحانا بار. بۇگىندە تۇركىستانعا كورەيادان 100-گە جۋىق ستۋدەنت ارنايى كەلدى. ولار الداعى ءبىر اي بويى وسىندا ءبىلىم الىپ, جەرگىلىكتى جاستارمەن تاجىريبە الماسادى. ال تۇركىستان وبلىسى اكىمدىگى تاراپىنان ۋنيۆەرسيتەتكە 100 گرانت ءبولىنىپ, ولاردىڭ باسىم بولىگى ءوڭىر جاستارىنا بەرىلدى. ءبىلىم ورداسىنىڭ 2000 ستۋدەنتكە دەيىن قابىلداۋعا مۇمكىندىگى بار. بيىل ۋنيۆەرسيتەتتە ءبىلىم الۋعا تۇركىستان وبلىسىنان بولەك, استانا, الماتى, شىمكەنت قالالارىنان, سونداي-اق قىزىلوردا, جامبىل جانە قاراعاندى وبلىستارىنان 400-گە جۋىق تالاپكەر قۇجات تاپسىرعان.
