بۇل جولى تارازدىق كاسىپكەرلەر 18 توننادان استام اۋىل شارۋاشىلىعى تاۋارلارىن ارزانداتىلعان باعامەن ۇسىندى. جەرگىلىكتى اتقارۋشى بيلىك وكىلدەرىنىڭ ايتۋىنشا, كوڭىلگە قونىمدى باعامەن وتكەرىلگەن ازىق-ت ۇلىك ونىمدەرىنىڭ جالپى قۇنى 11,8 ملن تەڭگەنى قۇرايدى.
تارازدىقتار كەلتىرگەن دەرەككە جۇگىنسەك, ولار كارتوپتىڭ كيلوسىن 280, ءسابىزدى 110 تەڭگەدەن ساتىپ العان. سونداي-اق وزگە دە تاۋارلار نارىقتاعى قۇنىنان ارزان باعامەن وتكەرىلگەن. شاھار تۇرعىندارىنىڭ ايتۋىنشا, بارلىق ءونىم قولجەتىمدى ءارى ساپالى بولعاندىقتان ولار جارمەڭكە ۇيىمداستىرىلاتىن كۇنى الەۋمەتتىك بازارعا اسىعاتىن كورىنەدى.
ىلگەرىدە جارمەڭكەگە تارازدىق اۋىل شارۋاشىلىعى تاۋار وندىرۋشىلەرى عانا قاتىسسا, بۇل جولى جامبىل جانە بايزاق اۋداندارىنان قالا قۇرامىنا وتكەن بىرنەشە ەلدى مەكەننىڭ شارۋالارى دا جىلى-جۇمساقتارىن الا كەلىپتى. ولار الداعى ۋاقىتتا دا جارمەڭكەگە ۇدايى قاتىسۋعا نيەت ءبىلدىرىپ وتىر. جەرگىلىكتى اتقارۋشى بيلىك وكىلدەرىنىڭ سوزىنشە, جىل سايىن تۇراقتى تۇردە ۇيىمداستىرىلاتىن اۋىل شارۋاشىلىعى ونىمدەرىنىڭ جارمەڭكەسى الداعى ۋاقىتتا دا توقتاماق ەمەس. بيىلدىققا وسىمەن سەگىزىنشى مارتە وتكىزىلىپتى.
«جوسپار بويىنشا 20 جارمەڭكە وتكىزۋىمىز كەرەك. سوندىقتان بۇل جۇمىس ىلكى ساتكە دە توقتاماق ەمەس. اۋدانداردىڭ قاتىسۋىمەن دە اۋىل شارۋاشىلىعى ونىمدەرى جارمەڭكەسىن وتكىزۋگە قۇلشىنىپ وتىرمىز. ناقتىراق ايتسام, 4 قازان كۇنى قالا كۇنى مەرەكەسى اياسىندا ۇلكەن جارمەڭكە وتكىزەمىز. وعان قالاداعى شارۋالارمەن بىرگە وڭىردەگى 10 اۋداننىڭ كاسىپكەرلەرى دە قاتىسادى», دەيدى تاراز قالالىق اۋىل شارۋاشىلىعى ءبولىمىنىڭ باسشىسى جانبولات تاڭاتاروۆ.
وبلىس ورتالىعىندا تۇراقتى ۇيىمداستىرىلاتىن جارمەڭكە كوپشىلىك ءۇشىن ءتيىمدى ەكەنى انىق. شاھار تۇرعىندارىنىڭ سوزىنە سەنسەك, اۋىل شارۋاشىلىعى تاۋار وندىرۋشىلەرىنىڭ قاتىسۋىمەن وتەتىن جارمەڭكەگە ولار ۇنەمى كەلىپ تۇرادى. ويتكەنى مۇنداعى باعا قالتاعا ارتىق سالماق سالمايدى. ەڭ باستىسى, قالاعان ازىق-ت ۇلىگىڭدى مولىنان ساتىپ الۋعا مۇمكىندىگىڭ بار.
«وبلىس ورتالىعىندا ۇيىمداستىرىلاتىن اۋىل شارۋاشىلىعى جارمەڭكەسى كوڭىلىمىزگە قونادى. مۇندا كۇندەلىكتى ومىرگە قاجەت ازىق-ت ۇلىكتىڭ بارلىعى دەرلىك بار. ەڭ باستىسى, ءاربىر وتباسىنا قاجەت تاۋارلار نارىقتاعى قۇنىنان الدەقايدا تومەن باعامەن ساتىلىپ جاتىر. سوندىقتان جارمەڭكە وتەتىن كۇنى وسىندا اسىعامىز. مۇندا كەلىپ وزىمىزگە قاجەت ونىمدەردى تۇراقتى تۇردە الىپ تۇرامىز. جارمەڭكەنى جۇيەلى تۇردە ۇيىمداستىرىپ جۇرگەن ازاماتتارعا ايتار العىسىمىز شەكسىز», دەيدى قالا تۇرعىنى كۇلايحان ماراتقىزى.
تاراز
