وبلىستاعى حالىقارالىق ماڭىزى بار «باتىس ەۋروپا – باتىس قىتاي» اۆتوجولى بويىندا تۇڭعىش رەت زاماناۋي قوناقۇي پايدالانۋعا بەرىلدى. مەركى اۋدانىنا قاراستى اقتوعان اۋىلىنىڭ ماڭىندا بوي كوتەرگەن جاڭا نىسان پرەزيدەنت تاپسىرماسىنا سايكەس ۇكىمەت جانىنداعى ينۆەستيتسيالار تارتۋ جونىندەگى كەڭەستە ماقۇلدانعان «Qazaq Oil-دىڭ 2025–2029 جىلدارعا ارنالعان جول بويىنداعى
60 قوناقۇي» باعدارلاماسى اياسىندا سالىنعان.
«Keruen Inn» قوناقۇيى تولىقتاي جەكە ينۆەستيتسيالار ەسەبىنەن قارجىلاندىرىلعان. جوبا جەتەكشىلەرىنىڭ ايتۋىنشا, كۇرە جولدىڭ بويىنداعى جايلى قوناقۇيدە كەلۋشىلەردى قابىلداۋعا بارلىق مۇمكىندىك قاراستىرىلعان. رەسمي دەرەككە سەنسەك, مۇنداي زاماناۋي قوناقۇيلەر جەلىسى تۋريستىك الەۋەتى جوعارى وڭىرلەردە, شەكارا بەكەتتەرىنە جاقىن ماڭداردا دا بوي كوتەرەدى ەكەن.
«ەل پرەزيدەنتى قاسىم-جومارت توقاەۆتىڭ باستامالارى قاي كەزدە دە نازارىمىزدان تىس قالعان ەمەس. مەملەكەت باسشىسىنىڭ تاپسىرماسىنا ساي ەلىمىزدە كولىك-لوگيستيكالىق ينفراقۇرىلىمىن دامىتۋ, حالىققا ساپالى قىزمەت كورسەتۋ باعىتىندا اۋقىمدى جۇمىس اتقارىلىپ جاتىر. جامبىل وڭىرىندە دە وسى باعىتتا قولعا الىنعان جوبالار از ەمەس. ولاردىڭ بىرقاتارى جۇزەگە اسىرىلىپ جاتىر. سونىڭ ارقاسىندا وڭىرىمىزدە ۋاقىت سۇرانىسىنا ساي كەلەتىن سەرۆيستىك كەشەندەر سانى ارتا ءتۇستى. مۇنداي قوناقۇي جەلىلەرى ەرسىلى-قارسىلى اعىلعان حالىققا قولايلى جاعداي جاساۋمەن قاتار, جەرگىلىكتى تۇرعىنداردىڭ جاڭا جۇمىس ورنىمەن قامتىلۋىنا مۇمكىندىك تۋعىزادى. سونداي-اق كاسىپكەرلىكتى دامىتۋعا جول اشادى. وسىنداي يگى باستامالار ەل ەكونوميكاسىنىڭ وسۋىنە, ازاماتتاردىڭ ءال-اۋقاتىنىڭ ارتۋىنا ايتارلىقتاي ۇلەس قوسادى», دەيدى وبلىس اكىمىنىڭ ورىنباسارى ءابىلحايىر تامابەك.
مەركى اۋدانىنىڭ اۋماعىندا سالىنعان جاڭا قوناقۇيدىڭ اشىلۋ سالتاناتىنا «Qazaq Oil» كومپانياسىنىڭ باس ديرەكتورى تولەمىس شوتانوۆ, «قازاۆتوجول» ۇك» اق-نىڭ باسقارما توراعاسى دارحان يماناشەۆ باستاعان مارتەبەلى مەيماندار قاتىسىپ, ويلارىن ورتاعا سالدى. ولاردىڭ ايتۋىنشا, مۇنداي سەرۆيستىك كەشەندەر ەل ەكونوميكاسىنىڭ ەسەلەنۋىنە سۇبەلى ۇلەس قوسادى.
جوبا جەتەكشىلەرى كەلتىرگەن دەرەككە جۇگىنسەك, «Keruen Inn» قوناقۇيىندە ساپاردا جۇرگەن ازاماتتاردىڭ الاڭسىز تىنىعۋىنا بارلىق مۇمكىندىك قاراستىرىلعان. جالپى اۋماعى 900 شارشى مەتردەن اساتىن نىساندا 31 ستاندارت ءنومىرى بار. ءار ءنومىر جەكە سەبەزگى بولمەسىمەن, سانيتارلىق توراپپەن, تەلەديدار, تەگىن
Wi-Fi جەلىسىمەن جابدىقتالعان. قوناقتارعا قاجەتتى بارلىق قولايلى جاعداي جاسالعان, سونىڭ ىشىندە گيگيەنالىق قۇرالدار دا قاراستىرىلعان.
كۇرە جول بويىندا ورنالاسقان كەشەن اۋماعىندا كەڭ ءمازىر ۇسىناتىن مەيرامحانا, كۇزەتپەن قامتىلعان اۆتوتۇراق, كىر جۋ قىزمەتى, جولعا قاجەتتى تاۋارلار دۇكەنى, جانارماي قۇيۋ ستانساسى, ەلەكتر كولىكتەرىنە ارنالعان قۋاتتاۋ بەكەتى بار. جاڭا جوبانى جۇزەگە اسىرعان «Qazaq Oil» كومپانياسى ەلىمىزدە زاماناۋي جول بويى سەرۆيسىنىڭ بىرىڭعاي ەكوجۇيەسىن قالىپتاستىرۋدى ماقسات ەتىپ وتىر. وسى باعىتتا اتقارىلاتىن جۇمىس از ەمەس. بۇل كەشەن باستاماسى عانا.
جوبا جەتەكشىلەرىنىڭ ايتۋىنشا, اياسىندا بوي كوتەرەتىن بارلىق نىسان حالىقارالىق ستاندارتتارعا ساي سالىنىپ, ەنەرگيا تيىمدىلىگى تالاپتارىن ساقتايتىن بولادى.
«مەن شىلدە ايىندا تۋريستىك جەرلەردىڭ بارلىعىن رەتكە كەلتىرۋ تۋرالى تاپسىرما بەردىم. بۇل جۇمىس جەكە باقىلاۋىمدا. جۇرت ءجيى باراتىن دەمالىس ورىندارىنان بولەك, بولاشاعى زور باسقا دا باعىتتاردىڭ الەۋەتىن ارتتىرۋ ماڭىزدى. مىندەتتەردىڭ ارا-جىگىن اجىراتىپ العان ءجون. جەرگىلىكتى اتقارۋشى ورگاندار ءاردايىم تۋريزم ينفراقۇرىلىمىن جان-جاقتى دامىتۋعا باسا ءمان بەرىپ, وسى جۇمىسقا جاۋاپتى بولادى. قازىردە بۇل باعىتتاعى ەڭ وزەكتى ماسەلە – زاماناۋي ينفراقۇرىلىم سالۋ. ەگەر وسى مىندەتتى ويداعىداي ورىنداساق, ەلىمىزدىڭ كۋرورتتارى جەر جۇزىنە تانىلىپ, قازاقستاننىڭ بەتكە ۇستار ۇلتتىق برەندى بولماق», دەگەن پرەزيدەنت تاپسىرماسى جەرگىلىكتى اتقارۋشى بيلىكتىڭ ءاردايىم نازارىندا.
مەركى جەرىنە كەلەتىن ادام سانى ەشقاشان سيرەگەن ەمەس. سوندىقتان دا مۇندا كولىك-لوگيستيكاسىن دامىتۋدىڭ ماڭىزى زور. اۋدان اۋماعىندا بوي كوتەرگەن جاڭا قوناقۇي تۋريستەردى قابىلداۋعا دايىن. جاڭا كەشەن ۋاقىت سۇرانىسىنا ساي سالىنعان.
جالپى, مەركى اۋدانىندا قۇپياسى ءالى كۇنگە دەيىن اشىلماعان «كوككول» باستاعان وزگە دە كورىكتى جەرلەر جەتكىلىكتى. اۋدان اۋماعىندا جاقىندا العاش رەت ەرەكشە قورعالاتىن تابيعي اۋماق مارتەبەسىنە يە «مەركى» مەملەكەتتىك وڭىرلىك تابيعي پاركى قۇرىلدى.
مەركى تورىندە قىزىل كىتاپقا ەنگەن جانۋارلار جورتىپ جۇرگەنىن, مۇنداعى تاۋدا كوپتەگەن تاريحي ورىندار بار ەكەنىن ەسكەرسەك, اۋداندا ەكولوگيالىق ءتۋريزمدى وركەندەتۋگە دە مۇمكىندىك مول. سول تۇرعىدا ۋاقىت سۇرانىسىنا ساي كەلەتىن سەرۆيستىك كەشەندەردىڭ سانى ارتا تۇسكەنى ءجون.
جامبىل وبلىسى,
مەركى اۋدانى
