قالا بيلىگى سۋ باسۋ ماسەلەسىن جويۋ ءۇشىن سورعى ستانتسياسىن سالىپ, ارىق جۇيەسىن جاڭعىرتۋ قاجەت دەگەن شەشىمگە كەلىپ وتىر.
الماتى اكىمى دارحان ساتىبالدى جۇمىس ساپارى بارىسىندا تۇرعىندارعا قولايسىزدىق تۋعىزىپ وتىرعان ۋچاسكەلەردە جوبالاۋ مەن قۇرىلىس-مونتاج جۇمىستارىن جەدەلدەتۋدى تاپسىردى.
ماسەلەن, بوستاندىق اۋدانىنداعى جاڭگىر حان كوشەسىندە نوسەر جاۋىننان كەيىن ۇنەمى 1,2 مەترگە دەيىن سۋ جينالادى. اكىمنىڭ ايتۋىنشا, بۇل ەڭىستە ورنالاسقان جەر, بۇرىن وزەن ارناسى بولعان. مامانداردىڭ ايتۋىنشا, ماسەلەنىڭ شەشىمى ساعاتىنا 400 تەكشە مەتر سۋ ايدايتىن كارىز سورعى ستانتسياسىن سالۋ.
بۇدان كەيىن قالا باسشىسى ءال-فارابي داڭعىلى بويىنداعى جاعدايدى كوردى. بىلتىرعى نوسەر جاۋىن بۇل ايماقتا دا ۇلكەن زارداپ اكەلگەن ەدى. قازىر بۇل باعىتتا جوبا دايىندالىپ, مەملەكەتتىك ساراپتامادان وتكەن. وندا قاپپاروۆ كوشەسىندە ارىق جۇيەسىن سالۋ, ال ۇشكەمپىروۆ كوشەسىندە ەكى ءىرى سۋ قابىلداعىش ورناتۋ قاراستىرىلعان. دارحان ساتىبالدى جوبالاۋشىلاردىڭ قابىلدايتىن شەشىمدەرىنىڭ ساپاسىنا جاۋاپ بەرەتىنىن جانە قاتەلىككە جول بەرىلمەيتىنىن قاداپ ايتتى.
قابانباي باتىر كوشەسىندە دە سۋ بۇرۋ جۇيەسىنىڭ ولقىلىعى انىقتالدى. ارىق وتكەلى وپىرىلىپ, جاۋىن كەزىندە سۋ تاسىپ, جولعا شىعىپ كەتەدى. اكىم مۇندا ۇلكەن ديامەترلى تەمىربەتون قۇبىرلارىن ورناتىپ, جۇمىستى سوزبالاڭعا سالماي ءبىتىرۋدى تاپسىردى.
مەدەۋ اۋدانىندا دارحان ساتىبالدى شىعىس اينالما جولى – حاليۋللين – تايروۆ – شاقشاق جانىبەك كوشەلەرىنىڭ اۋماعىنداعى سۋ قۇبىرى جانە كارىز جۇيەسىن سالۋمەن تانىستى. مۇندا مەردىگەر ۇيىم جولعا تۇسەتىن سالماقتى ازايتۋ ءۇشىن جەردى تەسۋ ءادىسىن قولدانىپ جاتىر. قالا باسشىسى نەگىزگى جۇمىستاردى تۇندە – كولىك قوزعالىسى ازايعان كەزدە ىستەۋدى تاپسىردى.
ساپاردىڭ سوڭىندا اكىم كولىك جۇيەسىن دامىتۋدا جۇيەلى كوزقاراستىڭ قاجەتتىگىن جەتكىزدى. ونىڭ ايتۋىنشا, الداعى ۋاقىتتا قالانىڭ جوعارعى بولىگىنەن ءال-فارابي داڭعىلىنا شىعاتىن راديالدى جولداردى كەڭەيتۋ مۇمكىندىگى قارالادى.
«تەحنيكالىق مۇمكىندىك بار جەردە جولدى ەكى جولاقتان ءتورت جولاققا دەيىن كەڭەيتىپ, ورتالىق كوشەلەردىڭ جۇكتەمەسىن ازايتامىز», – دەدى اكىم.
قالا اكىمى قاۋىپتى اۋماقتاردا جوبالاۋ قۇجاتتارىن جەدەل دايىنداپ, سۋ بۇرۋ جۇيەسىن ساپالى جاڭعىرتۋدى, مەرزىمنىڭ قاتاڭ ساقتالۋىن جانە جۇمىس بارىسىندا قالا تۇرعىندارىنا مۇمكىندىگىنشە قولايسىزدىق تۋعىزباۋدى تاپسىردى.
