فوتو: سەنات
اتالعان ءىس-شاراعا ريم پاپاسى فرانتسيسك, ءال-ازھاردىڭ جوعارعى يمامى شەيح احمەد ات-تايەب قاتىسقان بولاتىن. وسى ارالىقتا ساياباق قازاقستانداعى ءتۇرلى كونفەسسيالار اراسىنداعى دوستىق پەن بىرلىكتىڭ جارقىن ۇلگىسىنە اينالدى.
ماۋلەن اشىمباەۆ مارتەبەلى مەيماندارعا ءىلتيپات بىلدىرە كەلىپ, بەيبىتشىلىك جانە كەلىسىم ساياباعىنىڭ نەگىزىن 2022 جىلى الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسۋشىلار قالاعانىن ايتتى.
«سەزگە قاتىسۋشىلاردىڭ ىزگى باستاماسىنىڭ ناتيجەسىندە ەسىل وزەنىنىڭ جاعالاۋىندا جاڭا ساياباق بوي كوتەردى. بۇل – بىرلىكتىڭ, ءوزارا سەنىمنىڭ جانە بەيبىتشىلىك پەن كەلىسىمنىڭ جارقىن سيمۆولى. بارلىق حالىقتىڭ داستۇرىندە تال ومىرشەڭدىكتى, ءوسۋدى جانە وركەندەۋدى بىلدىرەدى. سوندىقتان بۇل ساياباقتى سەنىم مەن ەتنوسقا قاراماستان كەمەل كەلەشەككە ورتاق ۇمتىلىسىمىزدىڭ بەلگىسى دەپ قابىلدايمىز. قازاقستان استاناسىنىڭ ورتاسىندا ورنالاسقان بەيبىتشىلىك جانە كەلىسىم ساياباعى دىندەر مەن مادەنيەتتەر اراسىنداعى رۋحاني كوپىر بولادى دەپ سەنەمىز. مۇنداي قادام قازىرگىدەي كۇردەلى كەزەڭدە ايرىقشا ماڭىزعا يە», دەپ, الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ساياباقتىڭ اشىلۋىنا ءوز ۇلەسىن قوسقان بارلىق قاتىسۋشى مەن نيەتتەستەرگە العىس ءبىلدىردى.
سونىمەن قاتار ماۋلەن اشىمباەۆ ءوز سوزىندە قازاقستان ءتۇرلى ۇلت, مادەنيەت جانە ءدىن وكىلدەرى بەيبىت قاتار ءومىر ءسۇرىپ جاتقان بىرەگەي ەل ەكەنىن اتاپ ءوتتى. بۇل ەتنوسىنا جانە دىنىنە قاراماستان بارشاعا اشىقتىق, سەنىم, توزىمدىلىك, قۇرمەت سياقتى قۇندىلىقتاردىڭ ناقتى كورىنىسى ەكەنى انىق. بەيبىتشىلىك پەن كەلىسىم ساياباعىنىڭ ءدال ورتاسىنداعى ء«ومىر اعاشى» مونۋمەنتى دە وسى رۋحاني ۇستانىمدى بەينەلەيدى. ءۇش جىل بۇرىن مۇندا دەلەگاتتار 60-تان استام تال وتىرعىزعان ەدى. مونۋمەنتتىڭ ورتاسىنا كۇمبەز ۇلگىسىندە ەمەن اعاشى وتىرعىزىلىپ, سۋبۇرقاق ورناتىلعان.
جوبا اۆتورلارىنىڭ ايتۋىنشا, سۋ مەن تامىرى تاريح تەرەڭىنە بويلاعان ءومىر اعاشى جەردەگى ماڭگىلىك تىرشىلىكتى جانە ونىڭ قۇندىلىعىن دارىپتەيدى. سول ارقىلى اتالعان ينستاللياتسيا, سەنىمى مەن نانىمىنا قاراماستان, پلانەتاداعى بارلىق ادامدى كەلىسىمگە, بەيبىتشىلىك پەن دوستىققا شاقىرادى. كۇمبەز ءبىر اسپان استىنداعى بەيبىتشىلىكتى, ال, 4 جاعىنداعى كىرەبەرىس دۇنيەنىڭ ءتورت بۇرىشى: وڭتۇستىك, سولتۇستىك, باتىس جانە شىعىستى بىلدىرەدى. كۇمبەزدىڭ قابىرعالارىندا دۇنيەنىڭ جاراتىلىسى, قازاقستان ءۇشىن تاريحي ماڭىزى بار وقيعالار جانە ەجەلگى سۋرەتتەر – پەتروگليفتەر بەينەلەنگەن.
ساياباقتىڭ اشىلۋىنا قاتىسقان VIII سەزد دەلەگاتتارى «بالا بوياۋىنداعى الەم» اتتى سۋرەت كورمەسىن تاماشالادى. وندا رەسپۋبليكالىق جاس سۋرەتشىلەر بايقاۋىنىڭ جەڭىمپازدارى مەن جۇلدەگەرلەرىنىڭ قىلقالامىنان تۋعان ۇزدىك 20 كارتينا قويىلعان كوپشىلىك نازارىنا ۇسىنىلعان. اتالعان ەكسپوزيتسيالار جاس بۋىننىڭ شىعارماشىلىعىمەن تانىسۋعا مۇمكىندىك بەرىپ, جارقىن جانە ۇيلەسىمدى بولاشاققا دەگەن سەنىمدى نىعايتۋعا ءوز ۇلەسىن قوسادى.
