فوتو: مەملەكەتتىك قىزمەت ىستەرى اگەنتتىگى
شارا بارىسىندا كادر ساياساتىن اۆتوماتتاندىرۋعا ارنالعان زاماناۋي پلاتفورمالار مەن مەملەكەتتىك قىزمەتتىڭ ارالاس (گيبريدتى) مودەلىن قالىپتاستىرۋعا باعىتتالعان جوبالار ۇسىنىلدى. جيىنعا مەملەكەتتىك جانە جەكەمەنشىك ۇيىمداردىڭ HR-ماماندارى, سونداي-اق تسيفرلىق HR-تەحنولوگيالاردى ەنگىزۋ باعىتىندا جۇمىس ىستەيتىن ساراپشىلار قاتىسقان.
اگەنتتىك توراعاسى دارحان جازىقباي مەملەكەتتىك جانە جەكە سەكتور اراسىنداعى ارىپتەستىكتى دامىتۋدىڭ ماڭىزدىلىعىن جانە HR سالاسىندا تسيفرلىق ترانسفورماتسيا جۇرگىزۋدىڭ وزەكتىلىگىن اتاپ ءوتتى. ول پرەزيدەنت جولداۋىندا ايتىلعان باستامالارمەن تولىق ۇندەسەتىنىن جەتكىزدى. ناقتىراق ايتقاندا, قازاقستاندى تسيفرلىق مەملەكەتكە اينالدىرۋ, جاساندى ينتەللەكت قۇزىرەتتەرىن دامىتۋ جانە مەملەكەتتىك ينستيتۋتتاردىڭ اشىقتىعى مەن تيىمدىلىگىن ارتتىرۋ ءۇشىن پلاتفورمالىق شەشىمدەر مەن ۇلكەن دەرەكتەردى كەڭىنەن قولدانۋ مىندەتتەرى العا قويىلىپ وتىر.
كەزدەسۋ شەڭبەرىندە قاتىسۋشىلار اگەنتتىكتىڭ قىزمەتىمەن جانە باسىم باعىتتارىمەن تانىستى. ولاردىڭ قاتارىندا مەملەكەتتىك قىزمەتكە تسيفرلىق فورماتتاعى ىرىكتەۋ جۇيەسى, «e-Qyzmet» پلاتفورماسى جانە بىرىڭعاي كادرلىق جۇيە ارقىلى HR-پروتسەستەردى اۆتوماتتاندىرۋ ماسەلەلەرى بولدى.
سونداي-اق پرەزيدەنت باستاماسىمەن ىسكە اسىرىلعان اۋقىمدى جوبالاردىڭ ءبىرى – پرەزيدەنتتىك جاستار كادر رەزەرۆى تانىستىرىلدى. بۇل جوبا تالانتتى جاستاردى قولداۋ مەن مەملەكەتتىك باسقارۋ جۇيەسىنە جاڭا بۋىن كاسىبي كادرلاردى تارتۋدا ماڭىزدى قۇرالعا اينالىپ وتىر.
اگەنتتىك توراعاسىنىڭ ورىنباسارى ءا.ع. احمەديار جيىن بارىسىندا مەملەكەتتىك قىزمەتتى دامىتۋدىڭ 2024–2029 جىلدارعا ارنالعان تۇجىرىمداماسىنا سايكەس ازىرلەنىپ جاتقان «مەملەكەتتىك قىزمەت تۋرالى» زاڭنىڭ جاڭا رەداكتسياسىنىڭ جوباسىن ۇسىندى.
مۇنداي اشىق ءىس-شارالار كادرلىق ساياساتتىڭ ايقىندىلىعىن قامتاماسىز ەتىپ قانا قويماي, مەملەكەتتىك ورگاندار مەن كۆازيمەملەكەتتىك سەكتور اراسىندا كاسىبي بايلانىستاردى نىعايتۋعا, تاجىريبە الماسۋعا جانە ءتيىمدى ديالوگ ورناتۋعا ىقپال ەتەدى.
