فوتو: اقوردا
مەملەكەت باسشىسى سوڭعى وتكەن سەزدەن بەرى الەمدە وتە جاعىمسىز ۇردىستەر بەلەڭ العانىن ايتتى.
«كەيبىر ساياساتكەرلەر مەن ساراپشىلار بۇعان «وركەنيەتتەر داعدارىسى» دەپ ايدار تاقتى. كيپلينگشە ايتساق, «باتىستىڭ اتى – باتىس, شىعىستىڭ اتى – شىعىس. ولار ەشقاشان ءبىر ارنادا توعىسپايدى». بىرقاتار ءىرى مەملەكەتتە ورىن العان كەيىنگى ۋاقيعالاردى شولىپ وتسەك, مۇنداي ۇيعارىمنىڭ دۇرىس كورىنۋى مۇمكىن. بىراق ساياسي فاكتوردى ەشقاشان ەستەن شىعارۋعا بولمايدى. باسقاشا ايتقاندا, باسقارۋشى بيلىكتىڭ مەملەكەتتىك قۇرىلىم تۋرالى تۇجىرىمى مەن تاجىريبەسىن قاپەردە ۇستاعان ءجون. ولار جۇرگىزەتىن ساياساتتىڭ بەيبىت ديالوگتى قولداۋ, مادەنيەتتەردىڭ, ءتۇرلى ءدىن مەن دۇنيەتانىمنىڭ ىقپالداستىعى تۇرعىسىنان ءاردايىم ورىندى ءارى كونسترۋكتيۆتى بولا بەرمەيتىنىن كورىپ وتىرمىز», دەدى پرەزيدەنت.
قاسىم-جومارت توقاەۆ اسىرە ۇلتشىلدىق پەن ءپاتريوتيزمنىڭ ءىس جۇزىندە قوسىلۋ ءۇردىسىنىڭ كۇشەيۋىنە قاتتى الاڭداۋشىلىق ءبىلدىردى. ونىڭ ايتۋىنشا, قازىرگى ۋاقىتتا بولىپ جاتقان ۇعىمداردىڭ اۋىسۋى جاستاردى اداستىرادى.
ء«بىر جاعىنان ءبىز قۇقىقتىق كونسەرۆاتيۆتى جانە ليبەرالدى يدەولوگيالاردىڭ قاقتىعىسىنا كۋامىز. بۇل بىرقاتار ەلدى ساياسي تۇراقسىزدىققا اكەلەدى. قازاقستاندا وسى تەكتەس جاھاندىق پروبلەمالارعا ءجىتى نازار اۋدارىلادى. بۇل – ىشكى ساياساتىمىزدىڭ نەگىزگى وزەگى. ءتۇرلى ەتنوس, ءدىن جانە ۇلت وكىلدەرى اراسىندا تولەرانتتىلىق پەن ءوزارا قۇرمەت ساياساتىن جۇرگىزۋ ماڭىزدى دەپ سانايمىن. «بىرلىگىمىز – ارالۋاندىقتا» ۇستانىمىنا زيان كەلتىرىپ, وعان كۇيە جاققىسى كەلەتىن, سونىڭ ىشىندە مەملەكەتتىك قىزمەتتە جانە قوعامدىق ورىندا ەلىمىزدى تۇراقتى مەكەن ەتەتىن حالىقتاردىڭ ءتىلىن ەركىن قولدانۋعا قارسى ارەكەتتەرگە قاتاڭ توسقاۋىل قويىلادى. وعان «زاڭ جانە ءتارتىپ» قاعيداتىنا ساي قۇقىقتىق باعا بەرىلەدى», دەدى قاسىم-جومارت توقاەۆ.
پرەزيدەنت قازاقستاندا سوڭعى جىلدارى اناعۇرلىم ورنىقتى, اشىق ءارى ءادىل ساياسي جۇيە قالىپتاستىرۋعا باعىتتالعان اۋقىمدى وزگەرىستەر دايەكتى تۇردە جۇرگىزىلگەنىن اتاپ ءوتتى.
«ادام قۇقىعىن قورعاۋ سالاسى ايتارلىقتاي كۇشەيدى: كونستيتۋتسيالىق سوت قۇرىلىپ, ومبۋدسمەن ينستيتۋتى نىعايدى, ارنايى زاڭدار مەن جارلىقتار شىعارىلدى. جالپىۇلتتىق رەفەرەندۋم كەزىندە ازاماتتارىمىزدىڭ باسىم بولىگى قولداعان 2022 جىلعى كونستيتۋتسيالىق رەفورما ساياسي جۇيەمىزدى تۇبەگەيلى جاڭعىرتتى. ءبىز «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىن باسشىلىققا الدىق. پرەزيدەنتتى جەتى جىلعا ءبىر رەت سايلاۋ ءتارتىبى بەكىتىلىپ, سونداي-اق مەملەكەت باسشىسىنىڭ جاقىن تۋىستارىنا ساياسي لاۋازىم اتقارۋعا تىيىم سالاتىن نورمالار ەنگىزىلدى. بۇدان بولەك, جاقىندا قازاقستان حالقىنا ارناعان جولداۋىمدا ەلىمىزدە ءبىرپالاتالى پارلامەنت قۇرۋ باستاماسىن كوتەردىم. اتالعان ۇسىنىس حالىق مۇددەسىنە ساي ساياسي جۇيەنى جاڭعىرتۋ نيەتىنەن تۋىنداپ وتىر. «زاڭ جانە ءتارتىپ» تۇجىرىمداماسى نەگىزىندە قوعامنىڭ تۇراقتىلىعى مەن ازاماتتاردىڭ قاۋىپسىزدىگىن قامتاماسىز ەتۋگە ىشكى ساياساتىمىزدا ەرەكشە ءمان بەرىلەدى», دەدى پرەزيدەنت.
