فوتو: sportpress.kz
4,5 ميلليوننان استام بالا پروفيلاكتيكالىق تەكسەرۋگە بارادى. شامامەن 1,5 ميلليون بالا ۇلتتىق ەكپە كۇنتىزبەسىنە سايكەس يممۋنداۋدان وتەدى. بالالارعا مەديتسينالىق كومەك مەملەكەت كەپىلدىك بەرىلگەن كولەم, مىندەتتى الەۋمەتتىك مەديتسينالىق ساقتاندىرۋ شەڭبەرىندە تەگىن كورسەتىلەدى. مەكتەپ جاسىنداعى بالالاردىڭ دەنساۋلىعى دا اركەز نازاردا.
انا مەن بالا دەنساۋلىعى سالاسىنا باعىتتالعان جۇيەلى ستراتەگيا مەن ەلەۋلى ينۆەستيتسيالاردىڭ ارقاسىندا ەلدە بالا ءولىمىنىڭ كورسەتكىشى ەڭ تومەن دەڭگەيگە تۇسكەن. پەريناتالدىق ورتالىقتار بازاسىندا نەوناتالدىق حيرۋرگيا بولىمشەلەرىنىڭ توسەك قورى 20%-عا ۇلعايدى. بۇل جىل سايىن تۋا بىتكەن كەمىستىگى بار شامامەن 1500 جاڭا تۋعان سابيگە وپەراتسيالىق ەم جۇرگىزۋگە مۇمكىندىك بەرىپ وتىر. وپەراتسيانىڭ 40%-ى ەندوبەينەحيرۋرگيالىق ادىسپەن جاسالادى. سونىڭ ناتيجەسىندە وپەراتسيادان كەيىنگى سابيلەردىڭ ومىرشەڭدىگى 88%-دان 93%-عا ارتىپ, ءولىم 15%-عا تومەندەگەن.
بۇگىندە ەلىمىز ورتالىق ازيادا نەوناتالدىق كومەكتى ۇيىمداستىرۋ ستاندارتىن بەكىتكەن العاشقى جانە جالعىز مەملەكەت. ونداعى باستى قاعيدات – رەانيماتسيا بولىمشەلەرىندە 1 مەيىرگەر – 1 جاڭا تۋعان نارەستەگە قاتىناسىن ساقتاۋ. ەلىمىزدە نەوناتولوگتار مەن مەيىرگەرلەردىڭ قۋاتتى ونلاين-كاسىبي قاۋىمداستىعى قۇرىلدى. بۇل – موڭعوليا, قىرعىزستان, وزبەكستان, تاجىكستاننان كەلگەن ساراپشىلاردى قوسا العاندا, 1000-نان استام ماماندى بىرىكتىرەتىن قۋاتتى ءبىلىم بەرۋ پلاتفورماسى. 2008 جىلدان باستاپ وتاندىق دارىگەرلەر سالماعى 500 گراممنان اساتىن جاڭا تۋعان نارەستەلەردى ومىرگە بەيىمدەۋدى قولعا الدى. پەريناتالدىق ورتالىقتاردىڭ بازاسىندا نەوناتالدىق حيرۋرگيانىڭ توسەك قورى 20%-عا ۇلعايدى. بالالارعا ونكوگەماتولوگيالىق كومەك جۇيەسى قارقىندى دامىپ كەلەدى. تسيتولوگيا مەن يممۋنوگيستوحيميادان باستاپ پەت-توموگرافيا, مولەكۋلالىق-گەنەتيكالىق تەحنولوگيالارعا دەيىنگى زاماناۋي دياگنوستيكالىق ادىستەردىڭ تولىق سپەكترى ەنگىزىلدى.
ەمشارالار تۇگەل حالىقارالىق حاتتامالارعا سايكەس جۇرگىزىلەدى. پوليحيميوتەراپيا, ساۋلەلىك تەراپيادان بولەك, حيرۋرگيا مەن گەموپوەزدىك ءدىڭ جاسۋشالارىن ترانسپلانتتاۋ مۇمكىندىگى بار. بۇل اللوگەندى, اۋتولوگتى, گاپلويدەنتيكالىق ادىستەردى قامتيدى. 2013 جىلدان بەرى 515 بالاعا ترانسپلانتاتتاۋ جۇرگىزىلگەن. ونىڭ ىشىندە 28-ءى حالىقارالىق دونورلار تىركەلىمىنەن (رەسەي, گەرمانيا, پولشا) الىنعان تۋىستىق ەمەس دونورلاردىڭ ارقاسىندا ىسكە استى. يننوۆاتسيالىق تاسىلدەردىڭ – ينتراارتەريالىق حيميوتەراپيا, «وسەتىن» ەندوپروتەزدەردىڭ 3D-مودەلدەۋ تەحنولوگياسى, تارگەتتىك يممۋنوتەراپيانىڭ ارقاسىندا بالالارداعى ونكولوگيالىق اۋرۋلار جونىندەگى جالپى ومىرشەڭدىك 70%-دان اسقان.
ەلىمىزدەگى جەتەكشى كلينيكالاردىڭ بازاسىندا بالالار دەنساۋلىعىن ساقتاۋعا قاتىستى تاسىلدەر ۇنەمى جەتىلدىرىلىپ, جاڭا تەحنولوگيالار مەن دياگنوستيكالاۋ, ەمدەۋدىڭ زاماناۋي ادىستەرى ەنگىزىلەدى. مىسالى, بيىل 1–3-دارەجەلى ەستۋ قابىلەتى بۇزىلعان بالالاردى ەستۋ اپپاراتتارىمەن, سويلەۋ پروتسەسسورلارىن اۋىستىرۋمەن قامتاماسىز ەتۋگە مۇمكىندىك بەرەتىن جاڭا زاڭنامالىق نورمالار قابىلداندى. دەنساۋلىق ساقتاۋ مينيسترلىگى ءار بالانىڭ دەنى ساۋ بولىپ, ساپالى مەديتسينالىق كومەكپەن قامتىلۋىنا بارىنشا قارايلاسىپ كەلەدى. بالاعا قامقورلىق ولاردىڭ دەنساۋلىعىن نىعايتۋدان باستالادى.
