قاتىسۋشىلار ۇلتتىق قۇندىلىقتاردىڭ قوعامداعى ورنى مەن ماڭىزىن, جاھاندانۋ داۋىرىندە ۇلتتىق بولمىس پەن ءداستۇردى ساقتاۋدىڭ جولدارىن, ەل دامۋىنا ىقپال ەتەتىن رۋحاني-مادەني قۇندىلىقتاردى نىعايتۋدىڭ ماڭىزىن تالقىلادى.
دەباتتىڭ العاشقى بولىمىندە ءار توپتىڭ ءۇش مۇشەسى جەكە-جەكە ءسوز سويلەپ, ءوز ۇستانىمدارىن 4 مينۋت ىشىندە دالەلدەۋگە تىرىستى. مۇندا سپيكەرلەر تاقىرىپتى جان-جاقتى تالداپ, وزدەرىنىڭ جاقتاۋشى جانە داتتاۋشى كوزقاراسىن ناقتى دايەكتەرمەن جەتكىزدى. ودان كەيىنگى كەزەڭدە تاراپتار ءبىر-بىرىنە وتكىر ساۋال قويىپ, قارسىلاس پىكىرىنىڭ ءالسىز تۇسىن اشۋعا, دالەلدى تۇردە تەرىستەۋگە ۇمتىلدى.
قورىتىندى بولىمدە توپ جەتەكشىلەرىنە ءسوز بەرىلىپ, ولار ءوز كوماندالارىنىڭ ۇستانىمىنا سايكەس ءتۇيىندى ويلارىن ايتتى. بۇل كەزەڭ پىكىرسايىستىڭ مازمۇنىن جيناقتاپ, تىڭداۋشىلارعا سالماقتى وي قالدىرۋعا باعىتتالدى.
وسىلايشا پىكىرسايىس مەملەكەتتىك قىزمەتكەرلەر اراسىندا تاجىريبە الماسۋ, تىڭ يدەيالار مەن جاڭا كوزقاراستاردىڭ قالىپتاسۋىنا ىقپال ەتكەن الاڭعا اينالدى. دەباتتى ۇيىمداستىرۋعا «Amanat» پارتياسى استانا قالالىق «بىرلىك» اۋماقتىق فيليالى مەن «Debat Eli» قوعامدىق قورى اتسالىستى.
«پارتيانىڭ ماقساتى ۇكىمەتكە قارايتىن ەكى مينيسترلىكتى جارىستىرۋ ەمەس. ءبىز ادىلەتتى قازاقستانعا قادام باسۋ ءۇشىن وسىنداي مىنبەرلەردە حالىقتىڭ پىكىرىن ايتۋىمىز كەرەك. پىكىرسايىس بارىسىندا قاتىسۋشىلاردىڭ تاقىرىپتار بويىنشا دايىندىعى, بىراۋىزدىلىعى جانە ءوز پوزيتسياسىن قورعاپ ءبىلۋى ەسكەرىلدى», دەيدى قازىلار القاسىنىڭ توراعاسى ابدىعاني ءبازىلحان ۇلى.
دەبات قورىتىندىسىندا ەكىنشى ورىندى كولىك مينيسترلىگىنىڭ قىزمەتكەرلەرى يەلەنسە, باس جۇلدەنى ونەركاسىپ جانە قۇرىلىس مينيسترلىگى قانجىعالادى. بارلىق قاتىسۋشىلارعا ارنايى ديپلومدار مەن دەمەۋشىلەر اتىنان قارجىلاي سەرتيفيكاتتار تابىستالدى.
جالپى مۇنداي ءىس-شارالار مەملەكەتتىك قىزمەتشىلەردىڭ مارتەبەسىن كوتەرۋدى, سىني ويلاۋدى, شەشەندىك ونەرىن شىڭداۋدى كوزدەيدى. سونداي-اق مەملەكەتتىك باسقارۋداعى جاستاردىڭ كوشباسشىلىق قابىلەتىن جەتىلدىرۋدى ماقسات ەتەدى.
