قايدان بىلەيىن, ءبۇيتىپ بىلگىشسىنگەن ءبىر مەن ەمەس ەكەنىمدى... ەندى مىنە, تاياق لاقتىر – سوتتىڭ, كەدەننىڭ, ەكونوميستىڭ باقىر باسىنا تاق ەتە قالادى. ە, ءبۇيتىپ جۇمىسسىز قالاتىنىن كىم بىلگەن!..» دەگەن بولاتىن.
امال قانشا, اكە ارمانداعان مايشەلپەكتەردىڭ شەتى بۇيىرمايتىنىنا كوزىم جەتكەن سوڭ, نەدە بولسا عىلىم-بىلىمگە تۇمسىق سۇعايىن دەپ ەندى مىنە, ۋنيۆەرسيتەتتىڭ كادر ءبولىمىنىڭ باستىعىنىڭ الدىندا
وتىرمىن.
– بالا, بىزدە مامان جەتىپ ارتىلادى, – دەپ ول كەرەكسىزدىگىمدى كەسىپ ايتتى.
– قىزىل ديپلوممەن ءبىتىرىپ ەدىم, ەڭ كىشى قىزمەتكەر بولسام دا جارار, – دەپ مىڭگىرلەگەن بولامىن.
– اتتەڭ, ايتىسكەر اقىن بولساڭ عوي, بىردەن قىزمەتكە قونجيتىپ, كانديداتتىق ديسسەرتاتسياڭنىڭ تاقىرىبىن دا بەكىتىپ بەرەر ەدىك, – دەپ تۋراسىنان تارتتى.
– تاقىرىبىم بار, تاراۋ-تاراۋلارى دا دايىن, تەك تۇيەر ءتۇيىنى عانا قالىپ ەدى, – دەگەن بولدىم.
– ە, كازىر وقۋ ورنىنىڭ اتىن ايتىسكەر اقىن شىعاراتىن بولدى عوي. بەتكە ۇستار بەكىرە بالامىز جالعىزسىراپ ءجۇر. جاقىندا عانا جالپاق جۇرت قاتىسقان ءدۇيىم دۇرمەكتەن جۇلدەلى ورىن الىپ, ۋنيۆەرسيتەت بەدەلى ءبىر كوتەرىلىپ قالدى. ەڭبەگىن باعالاپ, كەلگەنىنە جىل تولماسا دا جاتاقحانادان بولەك بولمە بەردىك. كەلەسى جولى باس جۇلدە الىپ, ۋنيۆەرسيتەت اتىن اسپانداتىپ جىبەرسە, رەكتوردىڭ ءوزى وعان دوتسەنتتىك قىزمەتتى بىردەن بەرەمىز دەپ وتىر.
– وقۋ ورىندارىنىڭ قازىرگى جاعدايىن ايتىپ, بىرنەشە ماقالا جازىپ, ونىم ورىندى باعاسىن دا الىپ ەدى, – دەپ قالدىم.
– بولار بالانى ءدوپ باسۋ قيىن-اۋ! شىركىن, ەگەر ودان سپورتتان الداعى ۋاقىتتا الەم چەمپيونى شىعاتىنىن الدىن الا بىلەتىن بولساق, «جورگوگىنەن-اق» ۋنيۆەرسيتەتتىڭ تۇلەگى ەتىپ, چەمپيون بولعان كۇنى قىزمەت تۇگىل, كانديداتتىق قۇجاتىن قولىنا ۇستاتار ەدىك.
– عىلىمي كەڭەس الدىدا وتەتىن كونفەرەنتسيادا تاقىرىبىمدى كۇن تارتىبىنە ەنگىزىپتى...
– ەلىمىزدىڭ بەدەلدى ۋنيۆەرسيتەتى بولعان سوڭ, بىزدەردە ەكى كۇننىڭ بىرىندە ءارتۇرلى جيىن ءوتىپ تۇرادى. سونىڭ شىرايىن شىرق ءۇيىرىپ, جىمداستىرا بىلەتىن, ەڭ اقىرى داستارقان ءمازىرىن ءماز ەتەر اسابا قات بىزدە... – دەپ بۇعان قالايسىڭ دەگەندەي سىناي قارادى دا, مەنىڭ سوزىمنەن مەزى بولعان بولۋى كەرەك:
– ە, بالا, اكادەميك اعامىزدان كەلىپ وتىرسىڭ, امال جوق, جارتى شتاتقا وزىمە قىزمەتكە الايىن. اينالىساتىن جۇمىسىڭ – جوعارىدا ايتقانداي, بىزگە قات مايتابان مامانداردى تابۋ. سولاردىڭ ءبىرىن تاۋىپ, ابىرويىمىزدى اسپانداتقان كۇنى ماماندىعىڭ بويىنشا قىزمەتكە كىرىسەسىڭ, – دەدى.
...امال جوق, مايتابان ماماندار تابۋعا بەل شەشىپ كىرىسىپ كەپ كەتتىم.
بەرىك سادىر
