سۋرەت: primeminister.kz
جيىندا ءارتۇرلى سالادا رەتتەۋ تەتىكتەرىن ەنگىزۋگە قاتىستى بىرقاتار ماسەلە قارالدى. اتاپ ايتقاندا, موتور مايلارىن تاڭبالاۋ مەن قاداعالاۋ جۇيەسىن ەنگىزۋ ماسەلەسى قاراستىرىلدى. ەنەرگەتيكا مينيسترلىگىنىڭ مالىمەتىنشە, بۇل شارا ءونىمنىڭ وندىرۋشىدەن تۇتىنۋشىعا دەيىنگى قوزعالىسىن تولىق قاداعالاۋعا مۇمكىندىك بەرمەك. تسيفرلىق تاڭبالاۋ ءار تاۋار بىرلىگىنىڭ جەتكىزۋ تىزبەگىندەگى قوزعالىسىن ايقىن كورسەتىپ, ونىڭ شىعۋ تەگى مەن قولدانىلۋى جونىندە دالمە-ءدال دەرەك بەرەدى.
سونداي-اق سىرا جانە سىرا ونىمدەرىن تاڭبالاۋ, پەستيتسيدتەردىڭ اينالىمىن رەتتەۋ ماسەلەلەرى قارالدى. اتاپ ايتقاندا, تىركەلمەگەن پەستيتسيدتەردى وندىرۋگە (قۇرامداستىرۋعا) كەلىسىم بەرۋ ءتارتىبىن ەنگىزۋ ۇسىنىلدى.
كوميسسيا كۇن تارتىبىندە ەلەكتروندى جانە ينتەرنەت-كازينو جارناماسىنا قاتىستى دا ماسەلە قوزعالدى. ۇيالى بايلانىس وپەراتورلارى تاراپىنان وسىنداي SMS-حابارلامالاردى تاراتۋعا اكىمشىلىك جاۋاپكەرشىلىك بەلگىلەۋ ۇسىنىلدى. تۋريزم جانە سپورت مينيسترلىگىنىڭ وكىلدەرى اتاپ وتكەندەي, بۇل باستاما ويىنعا اۋەس ازاماتتاردىڭ سانىن ازايتۋعا جانە بايلانىس سالاسىندا قىزمەت كورسەتەتىن كاسىپكەرلەردىڭ الەۋمەتتىك جاۋاپكەرشىلىگىن ارتتىرۋعا باعىتتالعان.
وتىرىستىڭ قورىتىندىسىندا ۆەدومستۆوارالىق كوميسسيا مەملەكەتتىك ورگاندار مەن قاتىسۋشىلاردىڭ ۇسىنىس-پىكىرلەرىن ەسكەرە وتىرىپ, بارلىق ماسەلە بويىنشا جاسالعان رەتتەۋ تالداۋلارىنىڭ ناتيجەلەرىن كەلىستى.
