وتىرىستى اشقان ماۋلەن اشىمباەۆ پرەزيدەنت قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىندا بەرگەن تاپسىرمالارىن نەگىزگە الا وتىرىپ, سەنات قىزمەتىنىڭ باسىم باعىتتارىنا نازار اۋداردى. سوعان سايكەس پالاتا دەپۋتاتتارى قازاقستاننىڭ الەۋمەتتىك-ەكونوميكالىق دامۋىنا جانە باسقا دا ستراتەگيالىق باعىتتارعا قاتىستى ماڭىزدى رەفورمالاردى ىسكە اسىرۋعا باسا ءمان بەرۋگە ءتيىس.
«بۇگىن پرەزيدەنت قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالادى. سول ارقىلى مەملەكەت باسشىسى ەلىمىزدىڭ الەۋمەتتىك-ەكونوميكالىق دامۋىنا قاتىستى ماڭىزدى مىندەتتەردى بەلگىلەپ بەردى. بۇل رەتتە ەكونوميكانى ءارتاراپتاندىرۋ جانە حالىقتىڭ ءال-اۋقاتىن ارتتىرۋ ماسەلەلەرى ايرىقشا مانگە يە. سونداي-اق ولاردى ىسكە اسىرۋ جولىنداعى ناقتى شارالار ايقىندالدى. مەملەكەت باسشىسىنىڭ بارلىق باستاماسىن زاڭنامالىق تۇرعىدان قامتاماسىز ەتۋ – باستى مىندەتىمىز. سوندىقتان ءتيىستى زاڭداردى ۋاقتىلى ازىرلەپ, قابىلداۋىمىز كەرەك. جولداۋدا كوتەرىلگەن ماسەلەلەر مەن تاپسىرمالاردى ەسكەرە وتىرىپ, ءىV سەسسياعا ارنالعان سەناتتىڭ نەگىزگى ءىس-شارالار جوسپارىن دا پىسىقتاپ الۋىمىز قاجەت», دەدى سەنات توراعاسى.
سونىمەن قاتار پالاتا سپيكەرى ستراتەگيالىق باعىتتار بويىنشا ىسكە اسىرىلاتىن شارالار توپتاماسىنا كەڭىرەك توقتالدى. اتاپ ايتقاندا, مەملەكەت باسشىسىنىڭ تسيفرلاندىرۋ جونىندەگى تاپسىرمالارى, سونىڭ ىشىندە جاساندى ينتەللەكت, پلاتفورمالىق ەكونوميكا, ۇلكەن دەرەكقورلاردى پايدالانۋ سياقتى ماسەلەلەر ءسوز بولدى. ودان بولەك, «بانكتەر تۋرالى» زاڭدى, تسيفرلىق جانە قۇرىلىس كودەكستەرىن ۋاقتىلى قابىلداۋ قاجەت ەكەنى ايتىلدى. سونداي-اق م.اشىمباەۆ ارىپتەستەرىن «Alatau City» قالاسىنىڭ ارنايى مارتەبەسى تۋرالى زاڭدى ازىرلەۋ, «مەملەكەتتىك م ۇلىك تۋرالى» زاڭدى جاڭارتۋ, پارلامەنتتىك رەفورمانى ىسكە اسىرۋ جانە باسقا دا ماڭىزدى باعىتتار بويىنشا بەلسەندىلىك تانىتۋعا شاقىردى.
«پرەزيدەنت قاسىم-جومارت توقاەۆ قازاقستاندى ءۇش جىل ىشىندە جاپپاي تسيفرلى مەملەكەتكە اينالدىرۋ جونىندە ستراتەگيالىق ماقساتتى بەلگىلەپ بەردى. وسى باعىتتا پارلامەنتتىڭ الدىندا ءتيىستى زاڭنامالىق بازا قۇرۋ مىندەتى تۇر. سونىڭ اياسىندا ءبىز تسيفرلىق كودەكستىڭ ساپالى قارالۋىن جانە ۋاقتىلى قابىلدانۋىن قامتاماسىز ەتۋىمىز قاجەت. ودان بولەك, جىل اياعىنا دەيىن قۇرىلىس كودەكسى مەن «بانكتەر تۋرالى» زاڭ قابىلداۋىمىز كەرەك. سونداي-اق «Alatau City»-ءدى دامىتۋعا ارنالعان ارنايى زاڭ قابىلداۋ تاپسىرىلدى. جولداۋدا مەملەكەت باسشىسى ينۆەستيتسيالار تارتۋ جۇيەسىن قايتا قاراۋ, مەملەكەتتىك سەكتوردى رەفورمالاۋ جانە پارلامەنتتىك رەفورما جۇرگىزۋ قاجەت ەكەنىن دە اتاپ ءوتتى. قورشاعان ورتانى قورعاۋ جانە سۋدى ۇنەمدەۋ ماسەلەلەرىنە دە ەرەكشە نازار اۋدارىلدى. الداعى ۋاقىتتا ءتيىستى زاڭنامالاردى قابىلداۋ ءۇشىن وسى باعىتتاردا ناتيجەلى جۇمىس ىستەيمىز دەپ سەنەمىن», دەدى م.اشىمباەۆ.
سونىمەن قاتار دەپۋتاتتار جاز كەزىندە وڭىرلەرگە جاساعان ساپارلارىن قورىتىندىلاپ, ماسليحاتتارداعى ارىپتەستەرىمەن جانە ازاماتتارمەن كەزدەسۋلەردىڭ ناتيجەسىندە انىقتالعان وزەكتى ماسەلەلەردى تالقىلادى. سەناتورلار اتاپ وتكەندەي, تۇرعىنداردى الاڭداتقان تۇيتكىلدەر ۇكىمەت پەن جەرگىلىكتى اتقارۋشى ورگاندار الدىندا كوتەرىلەدى. سونداي-اق ولار زاڭداردى قاراۋ بارىسىندا نازارعا الىنادى.
بيۋرودا سەناتتىڭ ءىس-شارالار جوسپارىن ىسكە اسىرۋ ءۇشىن الداعى ۋاقىتتا اتقارىلاتىن جۇمىستار دا ءسوز بولدى. بۇل رەتتە م.اشىمباەۆ الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق بارىسىنا ەرەكشە توقتالدى. اۋقىمدى حالىقارالىق فورۋم مەملەكەت باسشىسىنىڭ قاتىسۋىمەن 17–18 قىركۇيەكتە استانادا وتەدى. سەزد اياسىندا العاش رەت بىرىككەن ۇلتتار ۇيىمىنىڭ وركەنيەتتەر اليانسىمەن بىرلەسىپ ارنايى سەسسيا ۇيىمداستىرىلماق.
ودان بولەك, بيۋرو مۇشەلەرى سەنات وتىرىسىنىڭ كۇن ءتارتىبىن بەكىتتى. سوعان سايكەس الداعى بەيسەنبىدە پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە يننوۆاتسيالىق قىزمەت سالاسىن مەملەكەتتىك قولداۋ جۇيەسىن جەتىلدىرۋ جانە مەملەكەتتىك ستاتيستيكا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارايدى.
اتالعان زاڭ يننوۆاتسيالىق قىزمەتتى مەملەكەتتىك قولداۋ جۇيەسىن ودان ءارى جەتىلدىرۋ, جاڭا تەحنولوگيالار ەنگىزۋ جانە ەل ەكونوميكاسىنىڭ باسەكەگە قابىلەتتىلىگىن ارتتىرۋ ءۇشىن قولايلى جاعدايلار جاساۋدى كوزدەيدى.
سونداي-اق بيۋرو مۇشەلەرى بۇعان دەيىن پارلامەنت ءماجىلىسى قابىلداعان زاڭداردى جۇمىس ءۇشىن سەناتتىڭ كوميتەتتەرىنە ءبولىپ بەردى.
