پرەزيدەنت بۇل باستامانى جۇزەگە اسىرۋ ءۇشىن ەڭ الدىمەن مەكتەپ وقۋشىلارىنا ارنالعان جاساندى ينتەللەكت نەگىزدەرى تۋرالى باعدارلاما مەن وقۋ ماتەريالدارىن ازىرلەۋ قاجەت ەكەنىن جەتكىزدى. سونىمەن قاتار بالاعا ساباق بەرەتىن ۇستازداردىڭ جاساندى ينتەللەكت تەحنولوگياسىن مەڭگەرۋ داعدىسىن دا قالىپتاستىرۋ كەرەك بولاتىنىنا توقتالدى.
قاشىقتان وقىتۋ ءتاسىلى مەن جاساندى ينتەللەكت تەحنولوگياسى نەگىزىندە «Qazaq digital mektebi» اتتى شاعىن جيناقتى مەكتەپ ۇلگىسىن ازىرلەۋ اۋىلداعى وقۋشىلاردى ساپالى بىلىممەن قامتاماسىز ەتۋگە مۇمكىندىك بەرەدى. بۇل پلاتفورما ولاردىڭ زاماناۋي ءبىلىم الۋىنا قول جەتكىزىپ قانا قويماي, تسيفرلىق ساۋاتىن دا ارتتىرۋعا جول اشپاق. ناتيجەسىندە, وقۋشى مەن مۇعالىم اراسىنداعى قارىم-قاتىناس جەڭىلدەيدى, وقۋ ماتەريالدارىن مەڭگەرۋ ۇدەرىسى جىلدام ءارى ءتيىمدى بولادى.
«كەلەشەك مەكتەپتەرى» جوباسى – ءبىلىم ۇدەرىسىنە يننوۆاتسيا مەن تسيفرلىق مۇمكىندىكتەردى ەنگىزۋدىڭ ناقتى قادامى. بۇل جوبا اياسىندا وقۋ كابينەتتەرى جاڭارىپ, جاڭا تەحنولوگيالارمەن جابدىقتالعانىن, ينتەراكتيۆتى قۇرالدار مەن تسيفرلىق رەسۋرستار قولجەتىمدى بولىپ جاتقانىن ايتتى. بۇنىڭ ناتيجەسىن ءوزىمىز دە كورىپ جاتىرمىز.
ءبىز, ۇستازدار قاۋىمى, مەملەكەت باسشىسىنىڭ اتالعان باستامالارىن قولداپ, ونىڭ جۇزەگە اسۋىنا ءوز ۇلەسىمىزدى قوسا بەرەمىز. ويتكەنى سانالى دا ساپالى ۇرپاق ءوسىرۋ – ءبارىمىزدىڭ ورتاق مىندەتىمىز. بۇگىنگى وقۋشى – ەرتەڭگى ەل تۇتقاسىن ۇستايتىن ازامات. ولاردىڭ بولاشاعى ءۇشىن ءاربىرىمىز جاۋاپتىمىز.
گۇلنازيا بايۇلوۆا,
№9 «زەردە» مامانداندىرىلعان ليتسەي ديرەكتورىنىڭ وقۋ ءىسى جونىندەگى ورىنباسارى
