بۇل – ارينە, بۇرىننان قولعا الىنىپ, اتقارىلىپ جاتقان جۇمىس. الايدا ويداعىداي دەڭگەيدە ەمەس. سوندىقتان مەملەكەت باسشىسى ينۆەستيتسيا تارتۋ ءۇشىن ۇكىمەتكە جەڭىلدىكتەردى قاراستىرۋ ماسەلەسىن تاپسىردى.
ەكىنشى ۇلكەن ماسەلە – وندىرىلگەن شيكىزاتتى تەرەڭ وڭدەۋ ماسەلەسى. مۇنىڭ ىشىندە ءتۇستى مەتاللۋرگيا سالاسىنا توقتالىپ ءوتتى. سونىمەن قاتار اۋىل شارۋاشىلىعى جايىندا دا ايتتى. قازىرگى تاڭدا ءتۇستى مەتاللۋرگيا سالاسىندا ءونىمنىڭ ءبارى, مۇنايىمىز بەن گازىمىز دا شيكىزات رەتىندە شەتەلگە كەتىپ جاتىر. ماسەلەن, قازىر ەلىمىزدە ءۇش مۇناي وڭدەۋ زاۋىتىمىز بار. سونىڭ ءبىرى تۇرىپ قالسا, ەلدە جانار-جاعارماي پروبلەماسى تۋىندايدى. ءوزىمىز مۇنايدىڭ ورتاسىندا وتىرىپ, وڭدەلگەن مۇناي ونىمدەرىنە جارىماي جاتاتىنىمىز راس. مۇنىڭ ءبارى – جەرىمىزدىڭ استىنان شىعىپ جاتقان بايلىعىمىزدى وزىمىزدە وڭدەمەۋدىڭ كەسىرى.
سونىمەن قاتار پرەزيدەنت جولداۋدا كولىك-لوگيستيكا ماسەلەسىن شەشۋ جونىندە تاپسىرما بەردى. ءبىز – توعىز جولدىڭ تورابىندا تۇرعان ەلمىز. ەۋرازيانىڭ ترانزيتتىك حابىنا اينالۋ الەۋەتىمىز جوعارى. دەگەنمەن بۇل ماقساتقا جەتۋ ءۇشىن تاسجولداردىڭ قاۋىپسىزدىگى, تەمىرجولدا ۆاگونداردىڭ جەتىسپەۋشىلىگى, شەكارا بەكەتتەرىندەگى قوزعالىستىڭ رەتكە كەلۋى سەكىلدى ماسەلەلەر شەشىمىن تابۋعا ءتيىس. بۇعان قوسا قازىر ەلىمىزدە بەكەتتەر جوندەۋدەن ءوتىپ جاتىر. كاسپي تەڭىزى ارقىلى الىس-بەرىس پەن بارىس-كەلىستى ارتتىرۋ جايىنا دا كەڭىنەن توقتالدى.
پرەزيدەنت بيىل دا ادەتتەگىدەي قوعام نازارىن اۋداراتىن باستامالارى مەن ويلارىن ورتاعا سالدى. ونىڭ ىشىندە ءبىلىم بەرۋ, مادەنيەت, ونەر, دەنساۋلىق ساقتاۋ سالالارى دا قامتىلدى. قاي سالانى الساق تا, شەشىمىن كۇتكەن ماسەلە كوپ. جەتىستىكتەرىمىز دە از ەمەس. مەملەكەت باسشىسى الدىمىزعا قويعان مىندەتتەردى تالاپقا ساي جۇزەگە اسىرىپ, ەڭبەك ەتە بەرسەك, ادىلەتتى دە گۇلدەنگەن قازاقستاندى قۇرۋعا تولىق مۇمكىندىگىمىز بار.
الىبەك ناۋتيەۆ,
سەنات دەپۋتاتى
