مانات مۋسين باسقاراتىن «ۋكستروي» كومپانياسى قۇرىلىس جۇمىسىن وتە ساپالى اتقارىپتى. وسى مەكەمە اپەرگەن سپورتتىق قۇرال-جابدىقتار دا كوزدىڭ جاۋىن الادى. رەسپۋبليكانىڭ ءىرى قالالارىنداعى سپورت عيماراتتارىن كورىپ ءجۇرمىز. زەرەندى سپورت كەشەنى ءسان-سالتاناتى مەن قۇرال-جابدىعى جاعىنان ەلوردا جانە الماتى عيماراتتارىنان كەم سوقپايدى.
بۇل كەشەننىڭ ۋاقتىندا ءارى ويداعىداي سالىنۋىن وبلىس اكىمى مارات مۇرات ۇلى قاتاڭ نازاردا ۇستاعان ەكەن. مامانداندىرىلعان مەكتەپتە سپورتتىڭ 7 تۇرىنەن جاتتىعۋ وتەدى: قازاق كۇرەسى, ەركىن كۇرەس, بوكس, شاڭعى, سامبو,فۋتبول, سپورتتىق تۋريزم. الداعى ۋاقىتتا گرەك-ريم كۇرەسى, اۋىر اتلەتيكا, بياتلون بولىمدەرى اشىلادى. ازىرگە ۇجىمداعى 24 باپكەردىڭ قول استىندا 807 سپورتشى شەبەرلىكتەرىن شىڭداپ ءجۇر.
كۇرەس زالىنا كىردىك. اۋماعى – 24 ح 12 مەتر. توبەسىنىڭ بيىكتىگى التى مەتر ەڭسەلى زالدىڭ تورىندە ەكى كۇرەس كىلەمى جارقىراپ جاتىر. تىنىسى كەڭ زالدا ءبىر مەزگىلدە 29 بالۋان جاتتىعا الادى.
بوكس زالىنىڭ اۋماعى – 18 ح 12 مەتر. سۋ جاڭا رينگ قۇرۋلى تۇر. جاتتىعۋعا قاجەتتى قۇرال-جابدىقپەن تولىق قامتاماسىز ەتىلىپتى. مۇندا ءبىر مەزگىلدە 25 سپورتشىنىڭ جاتتىعۋعا مۇمكىندىگى بار.
بۇدان باسقا اۋماعى اتشاپتىرىم 2 ترەناجەر زالى بار. ءبىرىنىڭ كولەمى 70,40 شارشى مەتر, ەكىنشىسى 86,00 شارشى مەتر. ەكەۋىندە ءبىر ۋاقىتتا 24 ادام ەمىن-ەركىن جاتتىعا الادى.
تۇمسا تابيعات اياسىنداعى, جان-جاعىن جاسىل جەلەك قورشاعان مەكتەپتە وقۋ-جاتتىعۋ جيىنىن وتكىزۋ ءۇشىن 48 ورىندىق جاتاقحانا بار ەكەن. ماماندار مەن سپورتشىلاردىڭ اس-سۋ ماسەلەسى دە ويلاستىرىلعان.
وسىنداي ساۋلەتتى عيماراتتىڭ اۋىل ورتالىعىندا سالىنعانى تاماشا بولعان. كوپتەگەن اۋىلداردىڭ حالقى قالالارعا كوشىپ, قازاقتىڭ قاراشاڭىراقتارى قۇلازىپ, بوس قالىپ جاتقاندا وبلىس اكىمدىگىنىڭ مىنا قادامى كوڭىلگە قۋانىش سىيلادى. سەبەبى اۋىل – قازاقتىڭ بەرەكەسى, قۇتتى وشاعى. ەل بولۋىمىزدىڭ نەگىزگى ۇيىتقىسى دا قاراشا اۋىلدار. تۋعان ءتىلىمىزدىڭ تامىرى دا اۋىلدا. سالت-ءداستۇرىمىزدىڭ ورداسى دا اۋىل. سوندىقتان قازاعى باسىم زەرەندىدەگى عاجاپ سپورت كەشەنى سونداعى قاراشا حالىقتىڭ كوزقۋانىشى, نەسىبەسى ءارى ارمان قۋعان قارادومالاقتاردى شىڭدايتىن مادەني ۇستاحانا. مۇنداي عيماراتتا جاتتىققان بالالار ەرتەڭ توكيو مەن دۋبايدىڭ سپورت كەشەندەرىنە ەركىن كىرەتىن بولادى. مۇنداي عيماراتتا ەڭبەك ەتكەن قازاق مامانى جەر شارىنىڭ كەز كەلگەن تۇكپىرىندە الشاڭ باسىپ جۇرەدى.
قوشتاساردا زەرەندى سپورت مەكتەبىنىڭ باسشىسى قايىربەك ءامىرجان ۇلىنا «مەكەمەڭىز چەمپيوندار ۇستاحاناسىنا اينالسىن!» دەپ تىلەك ايتتىق.
قىدىربەك رىسبەك,
جۋرناليست
