سۋرەتتى تۇسىرگەن – ءالي عالىم
«Amanat» پارتياسى جامبىل وبلىستىق فيليالىنىڭ ۇيىتقى بولۋىمەن تاراز قالاسىنداعى «قازفوسفات» مينەرالدى تىڭايتقىشتار زاۋىتىنىڭ ءوندىرىس الاڭىندا «جۇمىسشى جاستار اماناتى» تاقىرىبىندا فورۋم وتكىزىلدى. بۇعان دەيىن «Amanat» پارتياسى جۇمىسشى جاستاردىڭ الەۋمەتتىك ماسەلەسىن شەشۋ, ولاردىڭ كادرلىق الەۋەتىن دامىتۋ ماقساتىندا ۇكىمەتپەن بىرگە «جۇمىسشى جاستار اماناتى» جوباسىن قولعا العان بولاتىن. بۇل فورۋم وسى جوبانى جۇيەلى جۇزەگە اسىرۋدىڭ ناقتى كورىنىسى دەۋگە تولىق نەگىز بار.
ءىس-شارا بارىسىندا ءسوز سويلەگەن ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى مۇقاش ەسكەندىروۆ ءوز ءىسىنىڭ ناعىز مامانى اتانۋدىڭ ءمان-ماڭىزىنا توقتالىپ, جاستار قاۋىمىن ەل يگىلىگى جولىندا ەڭبەك ەتۋگە شاقىردى.
«ەلىمىزدە جىل سايىن اۋقىمدى جوبا جۇزەگە اسىرىلىپ جاتىر. ونىڭ بىرقاتارى وسى جامبىل وبلىسىندا قولعا الىنعانى ءمالىم. بۇل جوبالاردى جۇيەلى تۇردە جۇزەگە اسىرۋ ءۇشىن, ارينە, جۇمىسشى جاستار قاجەت. ەلىمىزدىڭ بولاشاعى جۇمىسشى ماماندىق يەلەرىمەن تىكەلەي بايلانىستى. قازىردىڭ وزىندە قوعامدا ءوندىرىس سالاسىنىڭ ماماندارى ەرەكشە باعالانادى. ال وسىنداي ءىس-شارالار ارقىلى بەلسەندى جاستاردى قولداۋ ىسىنە جارقىن جول اشىلىپ وتىر. سەبەبى ومىردە بارلىق جەتىستىك تەك ادال ەڭبەكپەن, قاجىرلى قىزمەتپەن كەلەدى», دەدى م.ەسكەندىروۆ.
«جاستار رۋحى» جاستار قاناتىنىڭ توراعاسى اقەركە يسكاندەروۆانىڭ ايتۋىنشا, ۇيىم جاستاردى قولداۋ ماقساتىندا اۋقىمدى جۇمىس اتقارعان. ماسەلەن, «جاستارعا جۇمىس» جوباسى اياسىندا ەلىمىزدىڭ بارلىق وڭىرىندە بوس جۇمىس ورىندارى جارمەڭكەسى تۇراقتى وتكىزىلەدى. تاياۋدا استانادا ۇيىمداستىرىلعان جارمەڭكەگە ءۇش مىڭعا جەتەعابىل ادام قاتىسىپ, جەتپىستەن استام كاسىپورىن 2000-نان استام بوس جۇمىس ورنىن ۇسىنىپتى.
جاستار فورۋمىندا ءسوز العان ءوڭىر باسشىسىنىڭ ورىنباسارى قاناتبەك مادىبەك وبلىس اۋماعىندا جۇمىسشى جاستاردى قولداۋ ماقساتىندا اۋقىمدى جۇمىس اتقارىلىپ جاتقانىن تىلگە تيەك ەتتى.
«جامبىل وبلىسىنا ينۆەستيتسيا تارتۋ باعىتىندا جوسپارلى جۇمىس جۇرگىزىلىپ جاتىر. الداعى ۋاقىتتا وڭىردە 62 ينۆەستيتسيالىق جوبانى قولعا الۋ كوزدەلىپ وتىر. بۇل جوبالار جۇزەگە اسقان كەزدە 6 مىڭعا جۋىق جۇمىس ورنى اشىلادى. جوعارى وقۋ ورىندارى مەن كوللەدج تۇلەكتەرىن جىل سايىن جۇمىسقا ورنالاستىرۋعا مۇمكىندىك تۋادى. وسى ورايدا وڭىردەگى جوعارى وقۋ ورىندارىندا كادر دايارلاۋ جۇمىسى قولعا الىنىپ جاتقانىن ايتا كەتكەن ءجون. ءبىزدىڭ باستى مىندەتىمىز – كاسىبي مامانداردىڭ جاڭا بۋىنىن تاربيەلەۋ, ولاردىڭ بويىنا ادالدىق, جاۋاپكەرشىلىك سىندى اسىل قاسيەتتەردى ءسىڭىرۋ», دەدى ول.
رەسمي دەرەككە سەنسەك, جامبىل وبلىسىندا 355 مىڭنان استام جاس بار. بۇل كورسەتكىش ءوڭىر تۇرعىندارىنىڭ 29,1%-ىن قۇراپ وتىر. ولاردىڭ 41,8%-ى قالادا, 58,2%-ى اۋىلدا تۇراقتاعان. وسى كورسەتكىشكە قاراپ-اق ەلدى مەكەندەردە جۇمىس ىستەۋگە قابىلەتتى جاستار جەتكىلىكتى ەكەنىن باعامداۋعا بولادى.
ء«بىزدىڭ كاسىپورىندا جۇزدەگەن مامان ەڭبەك ەتەدى. سولاردىڭ قاتارىندا ەڭبەك جولىمدى سلەسار رەتىندە باستاپ, كەيىن قازاندىق وپەراتورى, كومپرەسسورلىق, توڭازىتقىش قوندىرعىلارى اۋماعىنىڭ شەبەرى, قازاندىق اۋماعىنىڭ شەبەرى بولىپ جۇمىس ىستەدىم. قازىر ەنەرگەتيكا رەسۋرستارىمەن قامتاماسىز ەتۋ تسەحى باستىعىنىڭ ورىنباسارى قىزمەتىن ابىرويمەن اتقارىپ ءجۇرمىن. وسىنداي ءىرى ءوندىرىس ورنىندا ەڭبەك ەتۋ – جاس ماماندار ءۇشىن زور مارتەبە. كومپانيا بىزگە بارىنشا قولايلى جاعداي جاساپ جاتىر. مۇندا كاسىپتىك ماشىعىمىزدى جەتىلدىرۋگە قاجەت بارلىق مۇمكىندىك بار. ۇجىمىمىزعا بىلىكتى, ادال جۇمىسشى جاستار قاشاندا قاجەت», دەيدى «Talas investment company» جسش قىزمەتكەرى, جاس مامان بەكسۇلتان بولعانبەك.
رەسمي دەرەككە جۇگىنسەك, «قازفوسفات» جشس-عا قاراستى «مينەرالدى تىڭايتقىشتار» زاۋىتىندا 35 جاسقا تولماعان 1128 جاس مامان ەڭبەك ەتەدى ەكەن. ولاردىڭ ءوندىرىس وشاعىندا جۇيەلى جۇمىس ىستەۋىنە كاسىپورىن تاراپىنان بارلىق جاعداي قاراستىرىلعان.
تاراز
