وقيعا 22 تامىز كۇنى بولدى. كولىكتەگى پوليتسيا دەپارتامەنتىنىڭ ءباسپاسوز قىزمەتىنىڭ حابارلاۋىنشا, تۇركىستان وبلىسىنىڭ 48 جاستاعى تۇرعىنى ماس كۇيىندە جانجال شىعارعان. ول اۋە كومپانياسىنىڭ قىزمەتكەرلەرىن بالاعاتتاپ, ەكيپاجدىڭ تالاپتارىن ورىنداماعان.
- «اقتوبە-شىمكەنت» باعىتىنداعى اۋە كەمەسى كومانديرىنىڭ اكتىسىنە سايكەس پوليتسيا قىزمەتكەرلەرى 48 جاستاعى تۇركىستان وبلىسىنىڭ تۇرعىنىن رەيستەن ءتۇسىرىپ الدى. پوليتسيا بارعان كەزدە دە ول بيلىك وكىلدەرىنىڭ زاڭدى تالاپتارىنا باعىنباي, قاساقانا قارسىلىق تانىتقان. قۇقىقبۇزۋشىعا قاتىستى اكىمشىلىك قۇقىقبۇزۋشىلىق تۋرالى كودەكستىڭ ءۇش بابى, ياعني قوعامدىق ورىندارعا الكوگولدىك ماساڭ كۇيدە كەلگەنى, ۇساق بۇزاقىلىق جاساعانى جانە قۇقىق قورعاۋ ورگانى قىزمەتكەرىنىڭ زاڭدى تالابىنا باعىنباۋ بويىنشا اكىمشىلىك حاتتامالار تولتىرىلدى. ماتەريال پروتسەسسۋالدىق شەشىم قابىلداۋ ءۇشىن سوتقا جولداندى, - دەپ حابارلادى كولىكتەگى پوليتسيا دەپارتامەنتىنىڭ ءباسپاسوز قىزمەتى.
