جۇمىس ساپارى اياسىندا مينيستر كارديوحيرۋرگ, بىلىكتى مامان يۋري پيامەن كەزدەسىپ, اتالعان پروفەسسوردان جۇرەكتەرىنە اشىق وتا جاساعان ناۋقاستاردىڭ قازىرگى جاعدايىن ءبىلدى. مينيستر بۇل وتانىڭ وڭىردەگى دەنساۋلىق ساقتاۋ سالاسىنداعى ۇلكەن جەتىستىك ەكەندىگىن اتاپ ءوتتى. ارالاۋ جۇمىستارى بارىسىندا مينيستر اقمارال ءالنازاروۆا بىلىكتى كادرلاردى تارتۋدى, ونىڭ ىشىندە ونكولوگ ماماندارىن شاقىرۋ جۇمىستارىن كۇشەيتۋ قاجەتتىگىن اتاپ ءوتتى.
جۇمىس ساپارى اياسىندا ۇلىتاۋ وبلىسىنىڭ دەنساۋلىق ساقتاۋ جۇيەسىنە قاتىستى كەڭەس ءوتىپ, ۇلىتاۋ وبلىسى اكىمدىگى, قر دەنساۋلىق ساقتاۋ مينيسترلىگى جانە «قازاقمىس» كورپوراتسياسى اراسىندا 2026-2029 جىلدارعا ارنالعان وڭىرلىك باعدارلامانى ازىرلەۋگە باعىتتالعان ۇشجاقتى مەموراندۋمعا قول قويىلدى. قۇجات مەديتسينالىق ۇيىمداردى بىلىكتى كادرلارمەن قامتاماسىز ەتۋ, دەنساۋلىق ساقتاۋ ينفراقۇرىلىمىن جەتىلدىرۋ, سالانى تسيفرلاندىرۋ, مەديتسينالىق تەحنيكامەن جابدىقتاۋ دەڭگەيىن ارتتىرۋدى كوزدەيدى.
ۇلىتاۋعا جۇمىس ساپارىنىڭ ەكىنشى كۇنى دەنساۋلىق ساقتاۋ ءمينيسترى اقمارال ءالنازاروۆا ءوڭىردىڭ مەديتسينالىق جۇرتشىلىعىمەن كەزدەستى.
ۆەدومستۆو باسشىسى دەنساۋلىق ساقتاۋ سالاسىنداعى زاڭناماداعى نەگىزگى وزگەرىستەر تۋرالى ايتتى. ول مەديتسينالىق كومەكتىڭ بىرىڭعاي پاكەتىن ەنگىزۋگە, ءمامس شەڭبەرىندە تەگىن مەديتسينالىق كومەك پەن قىزمەتتەردىڭ كەپىلدىك بەرىلگەن كولەمىن ۇسىنۋدىڭ جاڭا تاسىلدەرىنە تولىعىراق توقتالدى. مەديتسينالىق كومەكتىڭ ساپاسىن باقىلاۋ بولىگىندە مينيستر بيىلعى 15 قىركۇيەكتەن باستاپ مەديتسينالىق جانە فارماتسەۆتيكالىق باقىلاۋ كوميتەتىنە قاداعالاۋ فۋنكتسيالارى بەرىلەتىنىن, بۇل كورسەتىلەتىن قىزمەتتەردىڭ قاۋىپسىزدىگىن باقىلاۋدى كۇشەيتۋگە مۇمكىندىك بەرەتىنىن ەسكە سالدى.
وڭىردە ونكولوگيالىق قىزمەتتى دامىتۋ ماسەلەلەرىنە ەرەكشە نازار اۋدارىلدى. مينيستر ەرتە دياگنوستيكا, پاتسيەنتتەردى ۋاقتىلى جىبەرۋ جانە جوعارى تەحنولوگيالىق كومەكتىڭ قولجەتىمدىلىگىن قامتاماسىز ەتۋ ونكولوگيالىق اۋرۋلارمەن كۇرەستە نەگىزگى فاكتور بولىپ تابىلاتىنىن اتاپ ءوتتى. مەديتسينا قىزمەتكەرلەرى كادر تاپشىلىعى, مەديتسينالىق كومەكتى ۇيىمداستىرۋ جانە ينفراقۇرىلىمنىڭ جاي-كۇيى تاقىرىپتارىن كوتەردى. سونداي-اق, مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ تەتىگى قىزىعۋشىلىق تۋدىردى, ول پاتسيەنتتەردىڭ قۇقىقتارىن قورعاۋدى قامتاماسىز ەتۋى, دارىگەرلەر ءۇشىن زاڭدى قاۋىپتەردى تومەندەتۋى جانە داۋلى جاعدايلاردى شەشۋگە كومەكتەسۋى كەرەك.
كەڭەس قورىتىندىسى بويىنشا مينيستر وڭىردە ارنايى جۇمىس توبىنىڭ قۇرىلعانى تۋرالى حابارلادى. «كەلەسى اپتادان باستاپ دەنساۋلىق ساقتاۋ مينيسترلىگىنىڭ ارنايى جۇمىس توبى جۇمىس ىستەي باستايدى. ونىڭ مىندەتى – اعىمداعى جاعدايعا ەگجەي-تەگجەيلى تالداۋ جۇرگىزۋ, ينفراقۇرىلىمنىڭ جاي-كۇيىن باعالاۋ, جۇيەلىك پروبلەمالاردى انىقتاۋ جانە مەديتسينالىق كومەكتىڭ ساپاسىن جاقسارتۋ بويىنشا ناقتى شارالار ازىرلەۋ», دەپ تۇيىندەدى مينيستر.
ساپار سوڭىندا مينيستر ۇلىتاۋ وبلىسىنىڭ تۇرعىندارىمەن كەزدەسىپ, ازاماتتاردى جەكە سۇراقتارى بويىنشا قابىلدادى. سونداي-اق جەرگىلىكتى باق ءۇشىن بريفينگ وتكىزىلىپ, ءوڭىردىڭ دەنساۋلىق ساقتاۋ سالاسىن دامىتۋعا باعىتتالعان جۇمىستار تۋرالى مالىمەت بەرىلدى.
ۇلىتاۋ وبلىسى
