شىمكەنتتەن شىققان ءۇش ەر ادام مەن ءۇش ايەل پيك ۇلكەن تۋراعا (بايدىبەك اۋدانى) ساياحاتتاپ بارعان. بىرنەشە ساعات بويى بايلانىسقا شىقپاعان سوڭ, ولاردىڭ تۋىستارى قۇتقارۋشىلارعا حابار بەرگەن.
قۇتقارۋ جۇمىستارى «سىرداريا–تۇركىستان» ۇلتتىق تابيعي پاركىنىڭ اۋماعىندا جۇرگىزىلدى. ىزدەۋ توبىنا بەس شاقىرىمنان اسا تاۋلى ايماق پەن وزەن بويىنداعى قيىن وتكەلدەردەن وتۋگە تۋرا كەلگەن.
توتەنشە جاعدايلار مينيسترلىگىنىڭ مالىمەتىنشە, تۋريستەر تۇنگى ۋاقىتتا تابىلدى. بەلگىلى بولعانداي, توپتاعى ءبىر ايەل اياعىن سىندىرىپ العان. سول سەبەپتى سەرىكتەرى ونى تاۋدان ءوز بەتىنشە تۇسىرە الماعان.
«جاراقات العان ايەلگە العاشقى مەديتسينالىق كومەك كورسەتىلىپ, ەۆاكۋاتسيا جاسالدى. قالعان ساياحاتشىلاردىڭ جاعدايى قاناعاتتانارلىق», – دەپ حابارلادى تجم.
ماماندار قازاقستاندىق تۋريستەردى تاۋعا شىعار الدىندا مىندەتتى تۇردە قاۋىپسىزدىك شارالارىن ساقتاۋعا شاقىرادى:
- مارشرۋتتى تۋىستارىڭىزعا حابارلاۋ;
- بايلانىس قۇرالدارىن (راتسيا, قوسىمشا تەلەفون) الۋ;
- قاجەتتى ءدارى-دارمەك جيناعىن دايىنداۋ;
- قيىن جاعدايدا قۇتقارۋشىلارعا دەر كەزىندە حابارلاسۋ.
