ماۋلەن اشىمباەۆ ءوز سوزىندە جارىسقا قاتىسۋشىلارعا ءىلتيپات ءبىلدىرىپ, قازاقستان پرەزيدەنتى قاسىم-جومارت توقاەۆ ەلىمىزدە ينكليۋزيۆتى قوعام قالىپتاستىرۋعا ۇلكەن كوڭىل ءبولىپ وتىرعانىنا جانە بۇل باعىتتىڭ نەگىزگى باسىمدىقتارىنا نازار اۋداردى. سونداي-اق فەدەراتسيا پرەزيدەنتى ەلىمىزدە العاش رەت وتكىزىلىپ وتىرعان ءىرى حالىقارالىق جارىستىڭ ماڭىزىنا توقتالىپ, تۋرنيرگە كورەيا, سينگاپۋر, ءۇندىستان, يتاليا, يران, وزبەكستان, ساۋد ارابياسى, موڭعوليا, كيپر, بىرىككەن اراب امىرلىكتەرى جانە باسقا دا ەلدەردەن كەلگەن 56 ۇزدىك سپورتشى قاتىسىپ جاتقانىن ايتتى. مۇنداي اۋقىمدى ءىس-شارا ەلىمىزدە پاراليمپيادالىق سپورتتى دامىتۋ جانە بارشاعا تەڭ مۇمكىندىك جاساۋ جولىندا اتقارىلىپ جاتقان جۇمىستاردىڭ ناقتى ناتيجەسى ەكەنى انىق.
«ەلىمىزدىڭ ينكليۋزيا, تەڭدىك, قۇرمەت پەن ەرىك-جىگەر دارىپتەلەتىن جاھاندىق قوعامداستىقتىڭ بەلدى وكىلىنە اينالعانىن ماقتان تۇتامىز. پرەزيدەنت قاسىم-جومارت توقاەۆ ەلىمىزدە پاراسپورتتى دامىتۋعا جانە بۇل سالانىڭ قوعام ءۇشىن ماڭىزى زور ەكەنىنە ۇنەمى باسا ءمان بەرىپ كەلەدى. بۇگىندە ەلىمىزدە پاراسپورتشىلارعا ءوز الەۋەتىن ىسكە اسىرىپ, ماقساتتارىنا جەتۋلەرى ءۇشىن بارلىق جاعداي جاسالىپ وتىر. بۇل رەتتە «World Boccia Challenger» ءتۋرنيرى دە ەلىمىزدە پاراسپورتتى جانە ينكليۋزيا مادەنيەتىن ىلگەرىلەتۋگە ىقپال ەتەدى دەپ سەنەمىز», دەپ م.اشىمباەۆ بەدەلدى سايىستى قازاقستاندا وتكىزۋدى ۇيعارعانى ءۇشىن حالىقارالىق بوچچا فەدەراتسياسىنا جانە وسى ىسكە اتسالىسقان كومانداعا العىس ءبىلدىردى.
سونداي-اق اشىلۋ راسىمىندە قىسقا مەرزىم ىشىندە قازاقستان بوچچا فەدەراتسياسى, جاتتىقتىرۋشىلار, پاراسپورتشىلار, اتا-انالار جانە نيەتتەس جاندار مەن ەرىكتىلەر وراسان زور جۇمىس اتقارعانى ايتىلدى. قازىرگى تاڭدا ەلىمىز بويىنشا 250-دەن اسا مۇمكىندىگى شەكتەۋلى جان وسى سپورتپەن تۇراقتى شۇعىلدانىپ كەلەدى. ولاردىڭ قاتارىندا بالالارمەن بىرگە ەرەسەكتەر دە بار.
«فەدەراتسيانىڭ, اتا-انالار مەن جاتتىقتىرۋشىلاردىڭ ەرىك-جىگەرىنىڭ ارقاسىندا قازاقستاندا بوچچا قارقىندى دامىپ كەلەدى. قازىردىڭ وزىندە ەلىمىزدىڭ 20 قالاسىندا جاتتىعۋلار جۇيەلى تۇردە وتكىزىلەدى. ۇلتتىق فەدەراتسيادان بولەك, 10 وڭىرلىك فەدەراتسيا قۇرىلدى. تۇراقتى ۇيىمداستىرىلاتىن ۇلتتىق تۋرنيرلەر پاراسپورتشىلارعا جاڭا مۇمكىندىكتەر بەرىپ, ولاردى جىگەرلەندىرە تۇسەدى. قازىرگى تاڭدا ءبىزدىڭ ەل الەمدىك رەيتينگتە 18-ورىندا جانە ورتالىق ازيادا كوش باستاپ تۇرعانىن دا اتاپ وتكەن ءجون. كوزدەگەن ماقساتقا جەتۋ جولىنداعى تاباندىلىق پەن ادالدىقتارىڭىز ءۇشىن بارشاڭىزعا العىسىمدى بىلدىرەمىن. سىزدەر ءوز ءىس-ارەكەتتەرىڭىزبەن شىن جۇرەكتەن سەنىپ, تەك العا ۇمتىلعان جان كەز كەلگەن بيىكتى باعىندىرا الاتىنىن دالەلدەپ كەلەسىزدەر», دەدى م.اشىمباەۆ.
ۇيىمداستىرۋشىلار اتاپ وتكەندەي, مۇنداي تۋرنيرلەر – ماڭىزدى سپورتتىق سايىس قانا ەمەس, سونىمەن قاتار تاجىريبە الماسۋ, حالىقارالىق ىنتىماقتاستىقتى دامىتۋ جانە وڭىردە ينكليۋزيۆتى سپورت تۇرلەرىن دارىپتەۋ الاڭى. بۇگىندە ۇلتتىق قۇراما ءىرى حالىقارالىق جارىستارعا بەلسەندى قاتىسىپ كەلەدى. سونداي-اق قاتارىندا 50-دەن اسا ەل بار BISFed-ءتىڭ الەمدىك رەيتينگىندە اقش, يسپانيا جانە باسقا دا جەتەكشى قۇرامالاردان جوعارى تۇر. ال ورتالىق ازيادا قازاقستان – بوچچادان ءابسوليۋتتى كوشباسشى. ودان بولەك, كەيىنگى جىلداردا ۇلىبريتانيا, ءۇندىستان, تايلاند جانە وڭتۇستىك كورەيا ماماندارىنىڭ قاتىسۋىمەن حالىقارالىق جاتتىقتىرۋشىلار مەن تورەشىلەرگە ارنالعان كۋرستار, جاتتىقتىرۋشىلاردىڭ بىلىكتىلىگىن ارتتىرۋ بويىنشا كەشەندى جۇمىستار جۇيەلى جۇرگىزىلىپ كەلەدى. وسىنداي ناقتى قادامداردىڭ ارقاسىندا ءۇش جىل ىشىندە بوچچادان رەسپۋبليكانىڭ 12 سپورت شەبەرى شىقتى.
ايتا كەتەيىك, «Astana 2025 World Boccia Challenger» سايىسىن تۋريزم جانە سپورت مينيسترلىگىنىڭ, «سامۇرىق-قازىنا» اق-نىڭ, «Sport Qory» تۋريزم جانە سپورت يندۋسترياسىن قولداۋ قورىنىڭ جانە باسقا دا سەرىكتەستەردىڭ قولداۋىمەن قازاقستان بوچچا فەدەراتسياسى ۇيىمداستىردى.
