فوتو: سۋ رەسۋرستارى جانە يرريگاتسيا مينيسترلىگى
«مينيسترلىكتىڭ قۇرىلۋى سۋدىڭ قازاقستان ءۇشىن باسىم ماڭىزعا يە ەكەنىن كورسەتەدى. قازىردىڭ وزىندە اۋقىمدى وزگەرىستەر بايقالىپ وتىر. بۇل – گيدروتەحنيكالىق قۇرىلىسجايلاردى جاڭعىرتۋ باعدارلاماسى, سۋ رەسۋرستارىنىڭ ۇلتتىق اقپاراتتىق جۇيەسىن قۇرۋ, تسيفرلىق مونيتورينگ پەن ەسەپكە الۋدى ەنگىزۋ, كادرلاردىڭ بىلىكتىلىگىن ارتتىرۋ مەن سۋ سالاسى قىزمەتكەرلەرىن ماتەريالدىق ىنتالاندىرۋ بويىنشا كەڭ كولەمدى باعدارلاما. سونداي-اق ترانسشەكارالىق سۋ قاتىناستارىنىڭ دامۋى دا وڭ باعىتتا ءجۇرىپ جاتىر. بۇل – ۇزاق مەرزىمدى ۇدەرىس, دەگەنمەن بولاشاق دامۋعا نەگىز بولاتىن ماڭىزدى جۇيەلى وزگەرىستەردىڭ ىرگەتاسى قازىردىڭ وزىندە قالاندى», دەدى مسشۇك عىلىمي-زەرتتەۋ ورتالىعىنىڭ ديرەكتورى دينارا زيگانشينا.
ساراپشىنىڭ ايتۋىنشا, مينيسترلىك ەنگىزىپ جاتقان وزگەرىستەر سۋ سالاسىنىڭ بارلىق دامۋ باعىتىن قامتىپ وتىر.
«جۇيەلى جانە كەشەندى جۇمىس جۇرگىزىلىپ جاتىر. بۇعان دالەل بولاتىن مىسالدار دا جەتكىلىكتى. سونىڭ ىشىندە ەكولوگيالىق باعىتتى كۇشەيتكەن جاڭا سۋ كودەكسىنىڭ قابىلدانۋى, ودان كەيىن قابىلدانعان ادىستەمەلىك ۇسىنىستار – سونىڭ ايعاعى. مەنىڭشە, مينيسترلىك بۇل باعىتتا ۇيلەستىرۋشى رەتىندە ماڭىزدى ءرول اتقارىپ وتىر. جالپى وزگەرىستەر بارلىق باعىتتا ءجۇرىپ جاتىر. ەڭ ماڭىزدىسى – قابىلدانىپ جاتقان شەشىمدەر جۇيەلى ءارى كەشەندى, جانە ولاردىڭ العاشقى ناتيجەلەرى قازىردىڭ وزىندە كورىنە باستادى», دەپ اتاپ ءوتتى ساراپشى د.زيگانشينا.
