بەلگىلى ادامداردىڭ بەلگىسىز قىرلارى جونىندە كوپ بىلە بەرمەيمىز. ماسەلەن, اكادەميك شورا سارىباەۆ فۋتبول دەسە, ىشكەن اسىن جەرگە قويادى. ول ءوز داۋىرىندەگى بۇكىل اياق دوپ شەبەرلەرىنىڭ ەسىمدەرىن تۇگەل جاتقا ايتىپ بەرەتىن بولعان. ءتىپتى ۇلىنىڭ اتىن قايرات دەپ قويعان (مەملەكەت قايراتكەرى, ديپلومات قايرات سارىبايدى ايتىپ وتىرمىز)
تاعى ءبىر جۇيرىك جانكۇيەر, ايگىلى فۋتبولتانۋشى تۇمانباي مولداعاليەۆ قازاق جۇرتىنا وسى قىرىنان مول تانىمال. سونداي-اق ءتىلشى-اكادەميك رابيعا سىزدىقتىڭ دا دوپ دوداسىنا قىزىعۋشىلىعى ەشكىمنەن كەم بولماعان دەسەدى. الەم چەمپيوناتى باستالار كەزدە شورا اعامىز ەكەۋى ءتىل ينستيتۋتىنان ارنايى دەمالىس الىپ, تەلەۆيزوردىڭ ماڭىندا وتىرادى ەكەن دەگەن اڭىزعا بەرگىسىز اڭگىمە ارا-تۇرا ايتىلىپ قالاتىن. انىق-قانىعىن كىم بىلگەن؟ دەگەنمەن رابيعا اپايدىڭ ءوزى دە جاس شاعىندا سپورتتىڭ كەيبىر تۇرلەرىمەن شىنداپ شۇعىلدانعانعا ۇقسايدى.
ءتىل عۇلاماسىنىڭ تاعى ءبىر ەرمەگى فوتوعا ءتۇسىرۋ بولىپتى. ول ساپارعا شىققاندا فوتواپپاراتىن ۇنەمى الا جۇرگەن. بارعان جەرىنەن ءتاپ-ءتاۋىر سۋرەتتەر سەرياسىن ازىرلەگەن. ءوزىنىڭ الەۋەتتى ارىپتەستەرى, قاناتتاس قۇرداستارى ءابدۋالي قايدار مەن شورا سارىباەۆتى دا تالاي رەت فوتووبەكتيۆكە ىلىكتىرگەن. ءتىل ءبىلىمى ينستيتۋتىنىڭ ءار جىلدارداعى ساتتەرىن كادرعا ەنگىزىپ, سالانىڭ شەجىرەسىنە ءبىرشاما ۇلەس قوسقان. ياعني رابيعا سىزدىق – «قازاق قالامگەرلەرىنىڭ ءحوببيى» يدەياسىنىڭ اۆتورى, بۇل تاقىرىپقا ارناپ سەريالى ماقالالار جازعان قۇلتولەۋ مۇقاشقا تاپتىرمايتىن كەيىپكەر. ارينە, اپايدىڭ سيرەك كادرلارى شۇكىر شاحايدىڭ شىعارماشىلىق شەدەۆرلەرى سەكىلدى شيراتىلىپ تۇسە قويمايدى. ونىڭ ەسەسىنە, ول ءوز زامانىنىڭ سيپاتىن تانىتاتىن شىنايى دۇنيەلەردى قاتارعا قوسقان. حوش, مۇنىڭ ءبارىن ەجىكتەپ نە ءۇشىن ايتىپ وتىرمىز؟ مىناۋ «زەنيت-س» دەپ اتالاتىن قاستەرلى قۇرال – سول رابيعا اپامىز موينىنا اسىپ الىپ, ساۋلەتتى ساتتەردى تامسانا تاڭبالاعان باعا جەتپەس فوتواپپارات! ءوز كەزەڭىندە ءتۇسىرۋ تەحنيكاسىنىڭ سۇلتانى سانالعان تاريحي جادىگەر. اپايدىڭ سالالى ساۋساقتارىنىڭ تابى قالعان وسى بۇيىم قازىر قازاقستان عىلىمىنىڭ تاريحى مۋزەيىندە ساقتاۋلى. عيبراتتى عىلىم ورداسىنىڭ تورىندە تۇرعان ەلەۋلى ەسكەرتكىشتىڭ ءبىرى...
باۋىرجان ومار ۇلى
