فوتو: akorda.kz
«الماتى – ازاتتىعىمىزدىڭ التىن بەسىگى, جاسامپاز جاستاردىڭ قۇتتى مەكەنى. وركەنيەتىمىزدىڭ ءورىسىن كەڭەيتۋگە ولشەۋسىز ۇلەس قوسقان كوپتەگەن ۇلى تۇلعالارىمىز وسى قالادا ءوسىپ-ونگەن. شىن مانىندە, ءتول مادەنيەتىمىزدىڭ تەمىرقازىعىنا اينالعان شەجىرەلى شاھار قازاق ەلىنىڭ عانا ەمەس, تۇركى مەملەكەتتەرىنىڭ دە رۋحاني ورداسى سانالادى.
بۇگىن اسقارالى الاتاۋدىڭ باۋرايىندا ءتۇبى ءبىر تۇركى جۇرتىنىڭ ءبىلىمپاز, دارىندى ءارى بەلسەندى جاستارى باس قوسىپ وتىر. ىرگەلى ءىس-شارا اياسىندا جاڭا دوستار تاۋىپ, تىڭ يدەيالار مەن جوبالاردى جۇزەگە اسىراسىزدار دەپ سەنەمىن. ورەندەرىمىزدىڭ بىرلىگى بەكەم بولسا, تۇركى الەمىنىڭ تۇعىرى مىعىم, بولاشاعى جارقىن بولارى ءسوزسىز.
قازاقستان باۋىرلاس حالىقتاردىڭ يگى باستامالارىنا ۇنەمى قولداۋ كورسەتىپ كەلەدى. ءبىز ەلدەرىمىزدىڭ اراسىنداعى جان-جاقتى ىقپالداستىقتى نىعايتۋعا ايرىقشا ءمان بەرەمىز. استانادا دۇنيەجۇزىلىك كوشپەندىلەر ويىندارىنىڭ ءوتۋى, اقتاۋدىڭ تۇركى الەمىنىڭ مادەني استاناسى جانە الماتىنىڭ تۇركى جاستارىنىڭ استاناسى اتانۋى – سونىڭ ايقىن دالەلى», دەلىنگەن مەملەكەت باسشىسىنىڭ قۇتتىقتاۋىندا.
مينيستر ايدا بالاەۆا ءوز سوزىندە الماتىنىڭ مادەنيەت پەن عىلىمنىڭ, ءبىلىم مەن يننوۆاتسيانىڭ توعىسقان ورتالىعى ەكەنىن اتاپ ءوتتى. ونىڭ ايتۋىنشا, قالا بۇگىندە تۇركى الەمىنىڭ جاس كوشباسشىلارى مەن شىعارماشىل وكىلدەرى ءۇشىن جاڭا يدەيالار مەن سەرىكتەستىكتىڭ ورداسىنا اينالىپ كەلەدى.
سالتاناتتى شاراعا تمۇ باس حاتشىسى كۋبانىچبەك ومۋراليەۆ تە ارنايى قاتىستى.
«بۇگىن ءبىز تۇركى الەمىنىڭ جاستار استاناسى اتاعىن لەنكوران قالاسىنان قارقىندى دامىپ كەلە جاتقان الماتى قالاسىنا تابىستاۋ ءساتىنىڭ كۋاسى بولىپ وتىرمىز. بۇل قادام – ورتاق قۇندىلىقتارىمىزدىڭ ساباقتاستىعىن, سونداي-اق بولاشاق تۇركى الەمىن قالىپتاستىرۋداعى جاستاردىڭ ءوسىپ كەلە جاتقان ءرولىن ايقىن كورسەتەدى.
وزدەرىڭىز بىلەتىندەي, الماتى قالاسىنا بۇل مارتەبە تۇركى مەملەكەتتەرى ۇيىمىنا مۇشە ەلدەردىڭ جاستار جانە سپورت مينيسترلەرىنىڭ 8-ءشى وتىرىسىنىڭ شەشىمى نەگىزىندە بەرىلگەن بولاتىن. قالانىڭ زاماناۋي مادەني ءومىرى, بەلسەندى ءبىلىم بەرۋ مەكەمەلەرى جانە ىنتالى جاستارى – تۇركى الەمىنىڭ جاڭا بۋىنىنىڭ رۋحى مەن الەۋەتىنىڭ ايقىن كورىنىسى», دەدى كۋبانىچبەك ومۋراليەۆ.
الماتى قالاسىنىڭ اكىمى دارحان ساتىبالدى دا ءسوز الىپ, تۇركى جاستارىنىڭ داۋىسى وسى الماتىدان ەستىلىپ, يدەيالارى باستاۋ الىپ جاتقانىن اتاپ, ولاردىڭ دوستىعىنىڭ بەكي تۇسۋىنە تىلەكتەستىك ءبىلدىردى.
سالتاناتتى ءىس-شارا اياسىندا باۋىرلاستىقتىڭ, سەنىم مەن جاڭا مۇمكىندىكتەردىڭ نىشانىنا اينالعان جاستار استاناسى كىلتىن 2024 جىلعى جاستار استاناسى - لەنكوران قالاسى, ازەربايجان ەلىنىڭ وكىلدەرى الماتى جاستارىنا تابىستاپ, باۋىرلاستىق ەستافەتاسىن جالعادى. وسىلايشا الماتى «2025 جىلعى تۇركى الەمىنىڭ جاستار استاناسى» مارتەبەسىن يەلەندى.
سونداي-اق, اباي الاڭىندا ۇيىمداستىرىلعان سالتاناتتى ءىس-شارادا الماتى تۇرعىندارى مەن قوناقتارىنا ەسترادا جۇلدىزدارى مەن شىعارماشىلىق ۇجىمداردىڭ قاتىسۋىمەن كەڭ كولەمدى كونتسەرت ۇسىنىلدى.
فەستيۆال 19 تامىز كۇنى دە جالعاسادى. تۇركى مەملەكەتتەرى ۇيىمىنا مۇشە ەلدەر – قازاقستان, ازەربايجان, قىرعىزستان, تۇركيا جانە وزبەكستاننان كەلگەن دەلەگاتتار جاستار ساياساتى, كاسىپكەرلىك, ازاماتتىق بەلسەندىلىك جانە الەۋمەتتىك باستامالاردى دامىتۋ تاجىريبەلەرىمەن بولىسەدى. سونداي-اق جاس كوشباسشىلار مەن كاسىپكەرلەردىڭ كەزدەسۋى وتەدى.
