2019 جىلدان باستاپ ەلىمىزدە مەكتەپكە دەيىنگى ءبىلىم بەرۋ سالاسىن رەفورمالاۋ بويىنشا جۇيەلى جۇمىس جۇرگىزىلىپ كەلەدى. ونىڭ ماقساتى – قولجەتىمدىلىكتى, ساپانى جانە اشىقتىقتى ارتتىرۋ. مەملەكەتتىك ساياساتتىڭ باسىم باعىتتارىنىڭ ءبىرى – ءار بالانىڭ ساپالى مەكتەپكە دەيىنگى تاربيە مەن ءبىلىم الۋ قۇقىعىن قامتاماسىز ەتۋ.
ەگەر 2019 جىلى ەلىمىزدە 10,5 مىڭ مەكتەپكە دەيىنگى ۇيىم جۇمىس ىستەپ, وندا 892 مىڭ بالا تاربيەلەنسە, 2025 جىلعا قاراي ولاردىڭ سانى 11,8 مىڭعا جەتىپ, 1 ميلليوننان استام بالا قامتىلدى. سونىمەن قاتار شاعىن ورتالىقتاردان تۇراقتى ماتەريالدىق-تەحنيكالىق بازاسى بار تولىققاندى بالاباقشالارعا كوشۋ جۇزەگە اسىرىلدى.
كەزەك ماسەلەسىندە دە ايتارلىقتاي وزگەرىستەر بار. 2019 جىلى بالاباقشاعا كەزەكتە 446 176 بالا تۇرسا, 2025 جىلى 2 جاستان 6 جاسقا دەيىنگى بالالار اراسىندا بۇل كورسەتكىش 84 مىڭعا دەيىن ازايدى. وسىلايشا, التى جىلدا كەزەكتە تۇرعاندار سانى شامامەن 5 ەسە قىسقاردى.
مۇنداي ناتيجەگە مەكتەپكە دەيىنگى ۇيىمدار جەلىسىن جۇيەلى كەڭەيتۋ, ورىنداردى بولۋگە جاڭا تاسىلدەردى ەنگىزۋ جانە ۆاۋچەرلىك قارجىلاندىرۋ سياقتى ۇدەرىستەردى تسيفرلاندىرۋ ارقىلى قول جەتكىزىلدى. بۇل تەتىك قىزمەتتەردىڭ قولجەتىمدىلىگى مەن ساپاسىن ارتتىرىپ قانا قويماي, مەكتەپكە دەيىنگى ءبىلىم بەرۋ سالاسىنداعى اشىقتىقتى قامتاماسىز ەتەدى.
بۇگىندە جوبا ەلىمىزدىڭ 20 قالاسى مەن 7 اۋدانىندا جۇزەگە اسىرىلىپ وتىر. قاناتقاقتى جوبا ىسكە اسىرىلعان ۋاقىت ىشىندە بالاباقشاعا كەزەك تاعى دا 44%-عا قىسقاردى. ناتيجەسىندە, 7,7 ملرد تەڭگەدەن استام بيۋدجەت قارجىسى ۇنەمدەلدى.
مانار اداموۆا,
وقۋ-اعارتۋ مينيسترلىگى مەكتەپكە دەيىنگى ءبىلىم دەپارتامەنتىنىڭ ديرەكتورى
